(ភ្នំពេញ)៖ គិតត្រឹមថ្ងៃទី៣០ ខែមិថុនា ដែលជាថ្ងៃបិទបញ្ចប់យុទ្ធនាការ, មូលនិធិគន្ធបុប្ផាកម្ពុជា ទទួលបានថវិកាបរិច្ចាគ សរុបសមមូលនឹងប្រមាណ ៦ ៣៨២ ០០០ ដុល្លារអាម៉េរិក ពីសប្បុរសជនចំនួនជាង ៣៥ ម៉ឺននាក់ ដែលបានបរិច្ចាគក្នុង យុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៦។
នេះបើយោងតាមលោកជំទាវ បណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសនៃ មូលនិធិគន្ធបុប្ផាកម្ពុជា បានបញ្ជាក់ក្នុងបណ្តាញ សង្គមការងារផ្លូវការនាថ្ងៃទី១ ខែកក្កដា ឆ្នាំ២០២៦នេះ។
លោកជំទាវ បណ្ឌិត ពេជ ចន្ទមុន្នី បានថ្លែងអំណរគុណ ដល់ពុកម៉ែបងប្អូន និងអរព្រះគុណព្រះសង្ឃ គ្រប់ព្រះអង្គ ដែលបានចូលរួម បរិច្ចាគក្នុងយុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៦ របស់មូលនិធិគន្ធបុប្ផាកម្ពុជា ក្នុងគោលដៅរួមគ្នា រក្សានិរន្តរភាពនៃកិច្ច ដំណើរការរបស់មន្ទីរ ពេទ្យគន្ធគន្ធបុប្ផា ដើម្បីបន្តបេសកកម្ម សង្គ្រោះជិវិតទារក និងកុមារ ក៏ដូចជាស្ត្រីមានផ្ទៃពោះនៅកម្ពុជា។
មូលនិធិគន្ធបុប្ផាកម្ពុជា នៅតែត្រូវការការចូលរួម បរិច្ចាគពីពុកម៉ែ បងប្អូន និងព្រះសង្ឃគ្រប់ព្រះអង្គ ដើម្បីឱ្យមន្ទីរ ពេទ្យគន្ធបុប្ផាអាចនៅ បន្តបេសកកម្មនាំភាពញញឹម និងក្ដីសង្ឃឹមដល់ទារក និងកុមារនៅកម្ពុជា ទោះបីជាបន្ទាប់ពីយុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៦ ត្រូវបិទបញ្ចប់ក៏ដោយ។
