ខេត្តស្ទឹងត្រែង៖ ករណីគ្រោះថ្នាក់ចរាចរណ៍មួយបានកើតឡើងរវាងរថយន្តរបស់សាលារៀនគ្រូយើង និងម៉ូតូសង់ឌ្រីម បណ្តាលអោយអ្នកបើកបរម៉ូតូបានរងរបួសស្រាលនិងខូចខាតម៉ូតូផ្នែកចំហៀងខាងឆ្វេង។
ហេតុការណ៍នេះបានកើតឡើងនៅថ្ងៃទី២៦តុលា២០២៦ នៅចំណុចកែងខាងក្រោយវត្តស្រះកែវមុន្នីវណ្ណ ហៅវត្តលើ ស្ថិតក្នុងក្រុងស្ទឹងត្រែង ខេត្តស្ទឹងត្រែង ។
យោងតាមការបញ្ជាក់ពីលោក ឈឿន ម៉េង ប្រធានការិយាល័យចរាចរណ៍ជើងគោកនៃស្នងការដ្ឋាននគរបាលខេត្តស្ទឹងត្រែង បានឱ្យដឹងថា អ្នកបើកបររថយន្តស៉ាំយ៉ុងរបស់សលារៀនគ្រូយើង ពាក់ស្លាកលេខ ស្ទឹងត្រែង 2B-0999 មានឈ្មោះ នួន រស្មី ភេទប្រុស អាយុ ៤៥ឆ្នាំ ។រីឯអ្នកបើកបរម៉ូតូពាក់ស្លាកលេខ តាកែវ 1AB-5506 មានឈ្មោះ សែន វិច្ឆិកា អាយុ ២៥ឆ្នាំ មានទីលំនៅភូមិដូង ឃុំរីករាយ ស្រុករវៀង ខេត្តព្រះវិហារ។
នៅក្រោយកើតហេតុ ភាគីទាំង២បានធ្វើការសម្របសម្រួលគ្នារួចរាល់ ដោយមិនមានការប្តឹងផ្តល់ទៅតុលាការឡើយ។
ហេតុការណ៍នេះគឺជាការរំឭកដល់អ្នកប្រើប្រាស់ផ្លូវទាំងអស់ ឱ្យបង្កើនការប្រុងប្រយ័ត្ន ពេលបើកបរ គោរពច្បាប់ចរាចរណ៍ និងបន្ថយល្បឿននៅតាមចំណុចផ្លូវប្រសព្វ ឬកន្លែងដែលមានមនុស្សធ្វើដំណើរឆ្លងកាត់ច្រើន ដើម្បីចូលរួមទប់ស្កាត់គ្រោះថ្នាក់ចរាចរណ៍។ SamNeang
