(ភ្នំពេញ)៖ លោកជំទាវ ជា រដ្ឋា រដ្ឋលេខាធិការ ក្រសួងពាណិជ្ជកម្ម បានអញ្ជើញជា អធិបតីភាពក្នុង «កម្មវិធីផ្គូផ្គងធុរកិច្ច ជំរុញពាណិជ្ជកម្ម ឌីជីថល កម្ពុជា-ជប៉ុន» ដែលប្រារព្ធឡើងនៅ មជ្ឈមណ្ឌលអាស៊ាន-ជប៉ុន (AJC) និងមានការអញ្ជើញចូលរួម និងថ្លែងសុន្ទរកថាគាំទ្រពី ឯកឧត្តម KUNIHIKO Hirabayashi អគ្គលេខាធិការមជ្ឈមណ្ឌល AJC និងឯកឧត្តម TAKAHASHI Fumiaki ប្រធានសមាគមជប៉ុន-កម្ពុជា (JCA) ក្នុងគោលដៅពង្រឹង កិច្ចសហប្រតិបត្តិការ ពាណិជ្ជកម្មទ្វេភាគី ឱ្យកាន់តែរឹងមាំ។
កម្មវិធីនេះត្រូវបានរៀបចំ ស្របតាមផែនការ សកម្មភាពឆ្នាំ២០២៦ នៃគម្រោង «ការកសាងសមត្ថភាព ឌីជីថល និងការជំរុញ ផលិតផលខ្មែរទៅកាន់ ទីផ្សារអន្តរជាតិតាមរយៈ CambodiaTrade.com» ក្រោមការគាំទ្រពីមូលនិធិ CBRD Fund និងកិច្ចសហការជា មួយមជ្ឈមណ្ឌលអាស៊ាន-ជប៉ុន (AJC) និងសមាគម ជប៉ុន-កម្ពុជា (JCA)។
កម្មវិធី ដែលបានធ្វើឡើង នារសៀលថ្ងៃសុក្រ ទី២៦ ខែមិថុនា ឆ្នាំ២០២៦ នៅប្រទេសជប៉ុន បានផ្តោតលើការពង្រឹងបណ្តាញ ធុរកិច្ចរវាងអ្នកផលិត និងអ្នកនាំចេញកម្ពុជា ជាមួយអ្នកបញ្ជាទិញជប៉ុន ព្រមទាំងជំរុញការធ្វើ ពាណិជ្ជកម្មតាមប្រព័ន្ធ អេឡិចត្រូនិកសម្រាប់ ផលិតផល #MadeInCambodia និង #MadeByHer។
ប្រភពព័ត៌មានពី ក្រសួងពាណិជ្ជកម្ម បានឱ្យដឹងថា ក្នុងអំឡុងពេលនៃកម្មវិធីនេះ អ្នកបញ្ជាទិញជប៉ុន ក៏បានទទួលការណែនាំ អំពីការប្រើប្រាស់ថ្នាល CambodiaTrade.com ចុះឈ្មោះបង្កើតគណនី និងធ្វើការបញ្ជាទិញ ផលិតផលដោយផ្ទាល់តាមថ្នាល ឌីជីថលនេះដោយជោគជ័យ។
ជាមួយគ្នានេះ កម្មវិធីផ្គូផ្គងធុរកិច្ច (Business Matching) បានបង្កើតឱកាសឱ្យសហគ្រាស និងពាណិជ្ជករកម្ពុជា ជួបពិភាក្សាផ្ទាល់ជា មួយដៃគូធុរកិច្ចជប៉ុន ដើម្បីស្វែងរកភាពជាដៃគូថ្មី ពង្រីកបណ្តាញអាជីវកម្ម និងបង្កើនវត្តមានផលិតផល កម្ពុជានៅលើទីផ្សារជប៉ុន និងទីផ្សារអន្តរជាតិ។
ក្នុងអំឡុងបេសកកម្មនេះ លោកជំទាវរដ្ឋលេខាធិការ ក៏បានដឹកនាំគណៈ ប្រតិភូក្រសួងពាណិជ្ជកម្ម និងតំណាងវិស័យឯកជនកម្ពុជា អញ្ជើញទស្សនកិច្ច សិក្សានៅតាមហាងលក់រាយ និងបណ្តាញចែកចាយ ផលិតផលសំខាន់ៗ នៅប្រទេសជប៉ុន ដើម្បីសិក្សាអំពី ការរៀបចំតាំងបង្ហាញផលិតផល យុទ្ធសាស្ត្រទីផ្សារ និងនិន្នាការតម្រូវការរបស់អ្នកប្រើប្រាស់ ព្រមទាំងផ្លាស់ប្តូរទស្សនៈ ជាមួយដៃគូវិស័យឯកជនជប៉ុន ដើម្បីពង្រឹងកិច្ច សហប្រតិបត្តិការពាណិជ្ជកម្ម និងការវិនិយោគ រវាងប្រទេសទាំងពីរ៕
