ខណ្ឌរដ្ឋបាលជលផលស្ទឹងត្រែង ឃាត់ខ្លួនជនសង្ស័យប្រព្រឹត្តបទល្មើសនេសាទ ៨នាក់ បញ្ជូនទៅតុលការ និងរឹបអូសឧបករណ៍ល្មើសច្បាប់ជលផល បានជាច្រើនប្រភេទ សម្រាប់ឆ្នាំ២០២៥ !

ខ
ខេត្តស្ទឹងត្រែង៖ ខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង នៅក្នុងរយៈពេល ១ឆ្នាំ២០២៥ កន្លងទៅនេះ បានសហការជាមួយប្រជាសហគមន៍នេសាទ ឆ្នាំទន្លេ ប៉ុស្តិ៍នគរបាលរដ្ឋបាល និងមន្ត្រីពាក់ព័ន្ធ បើកប្រតិបត្តិការចុះទប់ស្កាត់ និងបង្ក្រាបបទល្មើសនេសាទខុសច្បាប់ ដោយធ្វើការឃាត់ខ្លួនជនល្មើស ៨នាក់ បញ្ជូនទៅតុលាការខេត្តចាត់ការតាមនីតិវិធី និងរឹបអូសឧបករណ៍នេសាទល្មើសច្បាប់ បានជាច្រើនប្រភេទ មនុស្ស ៦៩នាក់ត្រូវបានធ្វើការណែនាំ អប់រំ និងធ្វើកិច្ចសន្យាបញ្ឈប់សកម្មភាពនេសាទខុសច្បាប់ និងបានធ្វើការផ្សព្វផ្សាយច្បាប់ជផលផលដល់ប្រជាពលរដ្ឋ ២៥៧នាក់ ឲ្យមានការយល់ដឹងពីច្បាប់ជលផល។
នាយខណ្ឌរដ្ឋបាលជលផលស្ទឹងត្រែង លោក ស្រី សំវិចិត្រ បានបង្ហាញរបាយការណ៍ឲ្យដឹងនៅថ្ងៃទី៦មករា២០២៦នេះថា នៅក្នុងរយៈពេល ១ឆ្នាំ២០២៥ កន្លងទៅនេះ ខណ្ឌរដ្ឋបាលជលផលស្ទឹងត្រែង បានសហការរួមគ្នាជាមន្ត្រីពាក់ព័ន្ធ ចុះទប់ស្កាត់ និងបង្ក្រាបបទល្មើសនេសាទបានជាច្រើនករណី ដោយក្នុងនោះ ខណ្ឌរដ្ឋបាលជលផល បានធ្វើការឃាត់ខ្លួនជនល្មើស ៨នាក់ បញ្ជូនទៅតុលាការខេត្ត និងសាលាដំបូងខេត្ត បានសម្រេចឃុំខ្លួនជនល្មើសទាំង ៨នាក់នោះ ក្នុងពន្ធនាគារខេត្តស្ទឹងត្រែង រួចហើយ ។
របាយការណ៍ដដែលបានបង្ហាញទៀតថា ក្រៅពីការឃាត់ខ្លួនជនល្មើស ៨នាក់ បញ្ជូនទៅតុលការ ខណ្ឌរដ្ឋបាលជលផល បានដកហូតមង ដែលនេសាទក្នុងតំបន់ហាមឃាត់ និងលួចនេសាទខុសច្បាប់ប្រវែង ៣ម៉ឺន ៣ពាន់ ៤៩០ម៉ែត្រ ,ដកហូតសន្ទូចរនងនេសាទក្នុងតំបន់អភិរក្សសត្វផ្សោត និងតំបន់ហាមឃាត់ចំនួន ១ម៉ឺន ២ពាន់ ២៧៧ផ្លែ ,បានធ្វើកិច្ចសន្យាប្រជានេសាទ ៦៩នាក់ ,ផ្សព្វផ្សាយ-អប់រំ ណែនាំ ២៥៧នាក់ ,ដកហូតទូកចំនួន ២៩គ្រឿង ,ដកហូតម៉ាស៊ីន ២៩គ្រឿង ,អាគុយ ១៦គ្រឿង ,ក្បាលឆក់ ១៥គ្រឿង ,ដងឆក់ ០១គ្រឿង ,ថ្នងដងត្រី ១៥គ្រឿង ,កាំភ្លើងកែច្នៃ ០១ដើម ,ខ្សែកាបប្រវែង ៤៥ម៉ែត្រ ,ខែ្សភ្លើងប្រវែង ៣១ម៉ែត្រ ,ប្រដាប់ជក់គ្រឿងញៀន ០២ឈុត ,ដាយបិទអូរ ១០មាត់ និងសាច់អួនប្រវែង ២២៩ម៉ែត្រ ,របាំងស្បៃមុងប្រវែង ២៤០ម៉ែត្រ និងលូស្បៃមុង ៨មាត់ ,លបប្រើស១០០ ប្រវែង ១០ម៉ែត្រ និងបានលែងត្រីមេពូជ និងត្រីកំពុងរងគ្រោះថ្នាក់ចូលក្នុងទន្លេវិញ ប្រមាណ ៥០គីឡូក្រាម ថែមទៀតផង៕