ខេត្តក្រចេះ៖ ស្ពានអូរឆ្លូងដែលជាប្រភេទស្ពានកម្រាលដែកបេឡេត៍ មានប្រវែង ៣៩ម៉ែត្រ និងផ្ទៃទទឹង ៤,៥ម៉ែត្រ ត្រង់គីឡូម៉ែត្រ ០១+៥២០ ស្ថិតក្នុងភូមិសែនអភិវឌ្ឍន៍ ឃុំគ្រញូងសែនជ័យ ស្រុកស្នួល នាម៉ោងប្រមាណ ៧ព្រឹក ថ្ងៃទី៣០ ខែតុលា ឆ្នាំ២០២៥ បានរងការបាក់ស្រុតទាំងស្រុង ដោយសាររថយន្តធុនធំដឹកកសិផលដំឡូងឆ្លងកាត់។
ក្រោយពេលកើតហេតុ អ្នកបើកបររថយន្ត ត្រូវគេកត់សម្គាល់ឃើញថា បានរត់គេចខ្លួនបាត់ស្រមោល តែបានបន្សល់ទុកវត្ថុតាងរថយន្តម៉ាក HYUNDAI ក្បាលសណ្តោងពណ៌ស និងរ៉ឺម៉កពណ៌ក្រហម (មិនមានស្លាកលេខ) ជាប់គាំងនៅលើស្ពានដែលរងការបាក់ស្រុតនោះ។
ស្របពេលជាមួយគ្នានោះ ក្រុមការងារមន្ទីរសាធារណការ និងដឹកជញ្ជូនខេត្តក្រចេះ សហការជាមួយ រដ្ឋបាលស្រុកស្នួល កម្លាំងអធិការដ្ឋាននគរបាលស្រុក រួមទាំងអាជ្ញាធរមូលដ្ឋាន បានចុះពិនិត្យ និងសម្របសម្រួលស្ថានភាពនៅទីតាំងកើតហេតុ ដើម្បីចាត់ចែងតាមនិតិវិធី និងក៏កំពុងរកវិធានក្នុងការជួសជុលស្ពាននោះ ជាបណ្តោះអាសន្នឡើងវិញផងដែរ។
ដើម្បីបញ្ចៀសការធ្វើចរាចរណ៍ឆ្លងកាត់ និងគ្រោះថ្នាក់អាចកើតឡើងជាយថាហេតុ អាជ្ញាធរខេត្ត ក៏ដូចមន្ទីរសាធារណការ និងដឹកជញ្ជូនខេត្តក្រចេះ បានប្រកាសផ្អាកជាបណ្តោះអាសន្ន យានយន្តគ្រប់ប្រភេទធ្វើដំណើរឆ្លងកាត់តាមទីតាំងស្ពានអូរឆ្លូង និងត្រូវធ្វើដំណើរតាមផ្លូវវាងឈ្មោះផ្លូវ១០៧ ស្ថិតក្នុងភូមិ១០៤ ឃុំគ្រញូងសែនជ័យ ស្រុកស្នួល រហូតដល់ការជួសជុលស្ពានបាន
រួចរាល់ឡើងវិញ។
អាជ្ញាធរខេត្តក្រចេះ បានអំពាវនាវដល់ម្ចាស់ និងអ្នកបើកបររថយន្តធុនធំទាំងអស់ ឲ្យគោរពច្បាប់ចរាចរណ៍ និងការផ្ទុកទំនិញតាមទំងន់អនុញ្ញាត ដើម្បីការពារសុវត្ថិភាពសាធារណៈ និងសម្ភារៈរបស់រដ្ឋ៕SAMNEANG
