អង្គកឋិនទានសាមគ្គីមួយ ដែលផ្តួចផ្តើមឡើងដោយឧត្តមសេនីយ៍កង សៅគុណ ប្រមូលបច្ច័យបាន ១៩លាន ៦០ម៉ឺនរៀល នាំយកមកវេរប្រគេនព្រះសង្ឃគង់ចាំត្រីមាស នៅវត្តព្រះមេរុ នៃស្រុកត្បែងមានជ័យ ខេត្តព្រះវិហារ !

ខេត្តព្រះវិហារ៖ បច្ច័យសង្កត់ត្រៃយ៍ចំនួន ១៩លាន និង ៦០ម៉ឺនរៀល ដែលបានមកពីការធ្វើអង្គកឋិនទានសាមគ្គីមួយ ដែលផ្តួចផ្តើមឡើងដោយ លោកឧត្តមសេនីយ៍ត្រី កង សៅគុណ មេបញ្ជាការកងរាជអាវុធហត្ថខេត្តព្រះវិហារ និងលោកស្រីជាភរិយា រួមជាមួយសហការី នាយនិងពលអាវុធហត្ថ នៃបញ្ជាការដ្ឋានកងរាជអាវុធហត្ថខេត្ត និងក៏មានការចូលរួមពីប្រជាពុទ្ធបរិស័ទ លោកគ្រូ អ្នកគ្រូ និងសិស្សានុសិស្ស ផងដែរ នាថ្ងៃ២៩តុលា២០២៥ បានរួមគ្នាដង្ហែរត្រៃយ៍ និងនាំយកបច្ច័យទាំងនោះ ទៅប្រគេនព្រះសង្ឃគង់ចាំត្រីមាសក្នុងពុទ្ធសីមា នៅវត្តព្រះមេរុ ស្ថិតក្នុងភូមិប្រមេរុ ឃុំប្រមេរុ ស្រុកត្បែងមានជ័យ ។
នាឱកាសនោះ លោកឧត្តមសេនីយ៍ត្រី កង សៅគុណ មានប្រសាសន៍ថា ការផ្តួចផ្តើមធ្វើអង្គកឋិនទានសាមគ្គីប្រាក់នាពេលនេះ ក្នុងគោលបំណងប្រមូលបច្ច័យ ដើម្បីវេរប្រគេនព្រះសង្ឃ ដែលជាការរួមចំណែកលើការទ្រទ្រង់ក្នុហវិស័យព្រះពុទ្ធសាសនា សម្រាប់កសាងនូវរាល់សមិទ្ធិផលនានា ដែលបាន និងកំពុងកសាងនាពេលបច្ចុប្បន្ន ហើយកំពុងជួបប្រទះការខ្វះខាតបច្ច័យសម្រាប់បន្តការសាងសង់។
លោកឧត្តមសេនីយ៍ត្រី កង សៅគុណ បានថ្លែងទៀតថា ការកសាងវត្តអារាមមួយ គឺត្រូវប្រើរយៈពេលយូរ និងចំណាយថវិកាច្រើន ដែលកត្តាចាំបាច់តម្រូវឲ្យយើងទាំងអស់គ្នា ចូលរួមគ្នាឲ្យបានច្រើន មិនចំពោះសប្បុរសជនក្នុងប្រទេស ឬក្រៅសប្បុរសជននៅក្រៅប្រទេសនោះទេ បើមានការចូលរួម គឺកាន់តែប្រសើរថែមទៀត។
លោកឧត្តមសេនីយ៍ត្រី កង សៅគុណ បានបញ្ជាក់ថា ក្នុងគ្រាបច្ចុប្បន្ន ក្រោមការដឹកនាំប្រទេសរបស់ សម្តេចតេជោ ប្រធានព្រឹទ្ធសភាកម្ពុជា និងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា សម្តេចប្រមុខដឹកនាំទាំងទ្វេរ តែងបានគិតគូ និងចាត់ទុកវិស័យពុទ្ធចក្រ និងអាណាចក្រ បានដើរទន្ទឹមគ្នាក្នុងការទ្រង់វិស័យព្រះពុទ្ធសាសនានៅកម្ពុជា ដែលជាកត្តាធ្វើឲ្យមានសុខសន្តិភាព ហើយប្រជាពលរដ្ឋខ្មែរ ៩៥ភាគរយ គឺជាអ្នកបដិបត្តិព្រះពុទ្ធសាសនា ដែលសាសនានេះហើយ គឺជាបន្ទាត់សម្រាប់គូសវាសតម្រូវឲ្យយើងដើរលើផ្លូវត្រូវ ប្រតិបត្តិតាមផ្លូវព្រះសម្មាសម្ពុទ្ធ ដែលជាព្រះបរមគ្រូនៃយើង៕SAMNEANG