អគ្គស្នងការនគរបាលជាតិ បានណែនាំស្នងការនគរបាលថ្មី ខេត្តស្ទឹងត្រែង បន្តខិតខំពង្រឹងសន្តិសុខ សុវត្ថិភាពសាធារណៈ ទប់ស្កាត់ និងបង្ក្រាបបទល្មើសគ្រប់ប្រភេទ ពិសេសបទល្មើសគ្រឿងញៀនឆ្លងដែនខុសច្បាប់ ឲ្យមានប្រសិទ្ធភាព !
ខេត្តស្ទឹងត្រែង៖ ប្រសាសន៍ណែនាំរបស់ អគ្គស្នងការនគរបាលជាតិ នាយឧត្តមសេនីយ៍ ស ថេត តំណាងឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានធ្វើឡើងនៅថ្ងៃទី២២ ខែតុលា ឆ្នាំ២០២៥ ក្នុងគ្រាដែលលោកនាយឧត្តមសេនីយ៍ បានអញ្ជើញជាអធិបតីភាពក្នុងពិធី ប្រកាស ផ្ទេរភារកិច្ច ស្នងការនគរបាលខេត្តស្ទឹងត្រែង ដោយមានការអញ្ជើញចូលរួមពី លោក ឈាង ឡាក់ ប្រធានក្រុមប្រឹក្សាខេត្ត លោក សរ សុពុត្រា អភិបាលខេត្តស្ទឹងត្រែង មន្ទីរ អង្គភាពពាក់ព័ន្ធជុំវិញខេត្ត និងកងកម្លាំងទាំង៣ ក៏បានចូលរួមផងដែរ ដែលពិធីនេះបានធ្វើឡើងនៅសាលាខេត្តស្ទឹងត្រែង។
យោងតាមសេចក្តីសម្រេចរបស់រាជរដ្ឋាភិបាល លោកឧត្តមសេនីយ៍ទោ សារី បុត្រសត្យា អតីតអនុប្រធានមន្ទីរប្រឆាំងគ្រឿងញៀន នៃស្នងការដ្ឋាននគរបាលជាតិ ចូលកាន់មុខតំណែង ជាស្នងការនគរបាលថ្មី ខេត្តស្ទឹងត្រែង ជំនួសលោកឧត្តមសេនីយ៍ទោ អ៊ូត ស៊ីវុត្ថា ដែលត្រូវទទួលភារកិច្ចថ្មី ក្នុងមុខតំណែងជា អគ្គនាយករង នៃអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ។
អគ្គស្នងការនគរបាលជាតិ នាយឧត្តមសេនីយ៍ ស ថេត មានប្រសាសន៍ថា ការផ្លាស់ប្តូរមុខតំណែងនាពេលនេះ មានគោលបំណងក្នុងការកែលម្អប្រសិទ្ធភាពដឹកនាំ និងបង្កើនសមត្ថភាពអង្គភាពនគរបាលឱ្យកាន់តែរឹងមាំ។ នាយឧត្តមសេនីយ៍ បានលើកទឹកចិត្តដល់ថ្នាក់ដឹកនាំ និងកម្លាំងនគរបាលខេត្តស្ទឹងត្រែង ឱ្យបន្តរក្សាសាមគ្គីភាពផ្ទៃក្នុង បំពេញភារកិច្ចដោយភាពចិត្តអំណត់ និងវិជ្ជាជីវៈខ្ពស់។
នាយឧត្តមសេនីយ៍ ស ថេត បានជំរុញឱ្យស្នងការនគរបាលថ្មី ខេត្តស្ទឹងត្រែង ប្រើប្រាស់បទពិសោធន៍ និងចំណេះដឹង ដើម្បីអនុវត្តការងារបានប្រសើរជាងមុន ជាពិសេសត្រូវផ្តោតសកម្មភាពលើការបង្ក្រាបបទល្មើសគ្រឿងញៀន បទល្មើសបំពានច្បាប់ ត្រូវរឹតបន្តឹងបទល្មើសឆ្លងដែនគ្រប់ប្រភេទ ការរត់ពន្ធមនុស្ស និងបទល្មើសផ្សេងៗទៀត ដែលប៉ះពាល់ដល់សន្តិសុខសង្គម។
ស្នងការនគរបាលថ្មី ខេត្តស្ទឹងត្រែង លោកឧត្តមសេនីយ៍ទោ សារី បុត្រសត្យា បានថ្លែងអំណរគុណយ៉ាងជ្រាលជ្រៅ ចំពោះថ្នាក់ដឹកនាំក្រសួងមហាផ្ទៃ និងអគ្គស្នងការនគរបាលជាតិ ដែលបានផ្តល់ទំនុកចិត្តតែងតាំង ឱ្យកាន់តំណែងដ៏មានកិត្តិយសនេះ។
លោកឧត្តមសេនីយ៍ទោ សារី បុត្រសត្យា បានប្តេជ្ញាចិត្តថា នឹងបន្តសម្របសម្រួលការងារយ៉ាងសាមគ្គី ជាមួយថ្នាក់ដឹកនាំខេត្ត និងអង្គភាពពាក់ព័ន្ធ ដើម្បីរក្សាសន្តិសុខ សណ្ដាប់ធ្នាប់ សុវត្ថិភាពសាធារណៈ និងការអភិវឌ្ឍខេត្តស្ទឹងត្រែង ឱ្យកាន់តែរីកចម្រើន៕SAMNEANG
