(ភ្នំពេញ)៖ លោកជំទាវ ម៉ាលី សុជាតា អ្នកនាំពាក្យ ក្រសួងការពារជាតិ បានថ្លែងថា “ការយកច្បាប់ អាជ្ញាសឹក និងច្បាប់ក្នុងស្រុករបស់ថៃ មកអនុវត្តក្នុងដែន អធិបតេយ្យកម្ពុជា គឺជាការបំពាន យ៉ាងធ្ងន់ធ្ងរមកលើ អធិបតេយ្យភាពកម្ពុជា និងច្បាប់អន្តរជាតិ រួមមាន ធម្មនុញ្ញអង្គការ សហប្រជាជាតិ ធម្មនុញ្ញអាស៊ាន សន្ធិសញ្ញាមិត្តភាព និងកិច្ចសហប្រតិបត្តិការ ក្នុងតំបន់អាស៊ីអាគ្នេយ៍ ព្រមទាំងគោលការណ៍ ច្បាប់ដែលទទួល ស្គាល់ជាសកលដទៃទៀត។
ក្នុងសេចក្តីថ្លែងការណ៍ ស្ដីពី «អំពើហិង្សានៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ» គិតត្រឹមវេលាម៉ោង ២០:៣០ នាទីយប់ថ្ងៃពុធ ១០រោច ខែភទ្របទ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៧ ខែកញ្ញា ឆ្នាំ២០២៥ នៅទីស្តីការគណៈរដ្ឋមន្ត្រី លោកជំទាវ អ្នកនាំពាក្យ បានគូសបញ្ជាក់ថា ក្រសួងការពារជាតិនៃ ព្រះរាជាណាចក្រកម្ពុជា សូមបញ្ជាក់ថា ចំពោះមុខទង្វើហិង្សា របស់ភាគីថៃ បងប្អូនប្រជាពលរដ្ឋកម្ពុជា ដែលជាម្ចាស់ដី និងប្រជាជនដទៃ ទៀតបានរួមគ្នាតវ៉ា និងឆ្លើយតបដោយសន្តិវិធី ដែលសកម្មភាពទាំងនេះ គឺស្តែងចេញពីការព្រួយ បារម្ភរបស់ពួកគាត់ ចំពោះផលប៉ះពាល់ និងការគំរាមកំហែង ពីការរាយលួសបន្លា និងការប្រើប្រាស់កម្លាំងជា ឯកតោភាគីរបស់ភាគីថៃ មកលើដែនអធិបតេយ្យ របស់កម្ពុជា ព្រមទាំង ទ្រព្យសម្បត្តិស្របច្បាប់ ដែលពួកគាត់បានគ្រប់គ្រង និងអាស្រ័យផលជា ច្រើនឆ្នាំមកហើយ៕
