ខេត្តស្ទឹងត្រែង៖ ក្រុមហ៊ុនទេសចរណ៍ឯកជនមួយឈ្មោះ Hybrid Travel Agenvcy បានសហការជាមួយមន្ទីរទេសចរណ៍ ក្នុងការផ្សព្វផ្សាយពីសក្តានុពលទេសចរណ៍ក្នុងខេត្តស្ទឹងត្រែងទៅកាន់ពិភពលោក ជាពិសេសគឺទីក្រុងឌូបៃ ។ នេះជាការលើកឡើងរបស់លោក Alexis Tomfaya (CEO)ក្រុមហ៊ុន Hybrid travel angcy in Dubai កាលពីព្រឹកថ្ងៃទី១៥ ខែកញ្ញា ឆ្នាំ២០២៥ នៅមន្ទីរទេសចរណ៍ខេត្តក្នុងកម្មវិធីសិក្ខាសាលាផ្សព្វផ្សាយស្តីពីទេសចរណ៍វៃឆ្លាតឌីជីថល ។
លោក Alexis Tomfaya (CEO) និងលោកស្រី ផាន់ សុភាព (GM )Hybrid travel angcy in Dubai បានរួមគ្នាលើកឡើងថា៖ចាប់តាំងពីរាជរដ្ឋាភិបាល ដាក់សម្ភោធឱ្យប្រើប្រាស់ជាផ្លូវការព្រលានយន្តហោះអន្តរជាតិតេជោថ្មី កាលពីថ្ងៃទី៩ ខែកញ្ញា ឆ្នាំ២០២៥ មកនោះ ក្រុមហ៊ុនមានការជឿទុកចិត្តចាប់អារម្មណ៍ ចង់ស្វែងរកដៃគូទាក់ទាញភ្ញៀវទេសចរណ៍មកប្រទេសកម្ពុជា ជាពិសេសខេត្តស្ទឹងត្រែងតែម្តង ។
លោក Alexis ក៏បានជំរុញទៅដល់ពលរដ្ឋ និងមន្រ្តីរាជការ យុវជន និងភ្នាក់ងារទេសចរណ៍ ដែលកំពុងបម្រើក្នុងវិស័យសេវាកម្មទេសចរណ៍ក្នុងខេត្ត ឱ្យសិក្សាឈ្វេងយល់ ពីការប្រើប្រាស់ប្រព័ន្ធ អេអាយ(AI)Digital System បែបទំនើប តាមបណ្តាញសង្គមដើម្បីទទួលបានចំណេះដឹង និងប្រាក់ចំណូលផងដែរ ។
លោក អ៊ន់ ប៉ោសឿន ប្រធានមន្ទីរទេសចរណ៍ខេត្តស្ទឹងត្រែងបានមានប្រសាសន៍បង្ហាញថា៖ទឹកដីខេត្តស្ទឹងត្រែង សំបូរទៅដោយធម្មជាតិ និងមានទន្លេលក្ខណៈពិសេសខុសពីកន្លែងដទៃទៀតដែលពុំមាន ហេតុដូចនេះហើយ ទើបក្រុមហ៊ុនទេសចរណ៍ធំៗមួយចំនួន ចាប់អារម្មណ៍ ចង់ចូលរួមសហការជួយផ្សព្វផ្សាយពីសក្តានុពលអស់ទាំងនេះ ក្នុងនោះមានក្រុមហ៊ុនមកពីៈ ប្រទេសអារ៉ាប់រួម (ទីក្រុងឌូបៃ) ដែលចង់ផ្សព្វផ្សាយ ទៅកាន់ពិភពលោក ដើម្បីនាំភ្ញៀវមកកម្សាន្ត ។
សូមបញ្ជាក់ថា មូលហេតុ ដែលក្រុមហ៊ុនចង់ជួយផ្សព្វផ្សាយពីកម្ពុជាទៅកាន់ពិភពលោក ជាពិសេសពីខេត្តស្ទឹងត្រែង ទៅកាន់ឌូបៃ គឺដោយសារមានការចាប់អារម្មណ៍លើសម្បត្តិវប្បធម៌ និងធនធានធម្មជាតិ ដ៏ល្អឯកក្នុងខេត្តស្ទឹងត្រែង ពីព្រោះវាខុសពីនៅឌូបៃមានតែអគារខ្ពស់ៗ៕Samneang
