(ខេត្តកែប)៖ ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារ រាជរដ្ឋាភិបាលចុះ មូលដ្ឋានខេត្តកែប បានណែនាំដល់ អាជ្ញាធរខេត្ត ត្រូវរៀបចំសណ្តាប់ធ្នាប់ តាមតំបន់ទេសចរណ៍ ឲ្យបានល្អប្រសើរ ត្រៀមលក្ខណៈ ទទួលភ្ញៀវទេសចរ ដែលនឹងមកលេង កម្សាន្តក្នុងឱកាស ឈប់សម្រាកក្នុង ពិធីបុណ្យភ្ជុំបិណ្ឌ និងពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ។
ឯកឧត្តមមាន ប្រសាសន៍ដូចនេះ ក្នុងកិច្ចប្រជុំបូក សរុបលទ្ធផល ការងារឆមាសទី១ ឆ្នាំ២០២៥ និងលើក ទិសដៅអនុវត្តបន្ត នារសៀលថ្ងៃទី១១ ខែកញ្ញា ឆ្នាំ២០២៥។ កិច្ចប្រជុំដ៏សំខាន់នេះ បានធ្វើឡើងនៅ សាលប្រជុំសេះស សាលាខេត្តកែប ដោយបានការអញ្ជើញ ចូលរួមពីសំណាក់ ឯកឧត្តម អ៊ុក ថា ប្រធានក្រុមប្រឹក្សាខេត្ត ឯកឧត្តមបណ្ឌិត សោម ពិសិដ្ឋ អភិបាលខេត្ត នឹងជាអនុប្រធានអចិន្ត្រៃយ៍ ក្រុមការងាររាជរដ្ឋាភិបាល ចុះមូលដ្ឋានខេត្ត ឯកឧត្តម លោកជំទាវ លោក លោកស្រី អនុប្រធាន សមាជិក សមាជិកា ក្រុមការងារគ្រប់លំដាប់ថ្នាក់។
ក្នុងរបាយការណ៍ស្វាគមន៍របស់ ឯកឧត្ដមបណ្ឌិត សោម ពិសិដ្ឋ អភិបាលខេត្តកែប បានគូសបញ្ជាក់ពី សមិទ្ធផលក្នុងឆមាសទី១ ឆ្នាំ២០២៥ ដែលក្រុមការងារ បានចូលរួមគាំទ្រ យ៉ាងសកម្ម លើការអនុវត្ត កម្មវិធីគោលនយោបាយ អាទិភាពទាំង៦ និងវិធានការគន្លឹះទាំង៥ របស់រាជរដ្ឋាភិបាល។ ជាពិសេស គឺការជំរុញការអនុវត្ត គោលនយោបាយ “ភូមិ-ឃុំ-សង្កាត់ មានសុវត្ថិភាព” និងការផ្តល់សេវា សាធារណៈតាម យន្តការច្រកចេញ ចូលតែមួយប្រកប ដោយប្រសិទ្ធភាព និងតម្លាភាព។
ក្នុងនាមជាប្រធានកិច្ចប្រជុំ ឯកឧត្ដមឧបនាយករដ្ឋមន្ត្រី សាយ សំអាល់ ក៏បានដាក់ចេញនូវ អនុសាសន៍សំខាន់ៗ មួយចំនួនសម្រាប់ ក្រុមការងារ និងអាជ្ញាធរមូលដ្ឋាន ត្រូវបន្តយកចិត្ត ទុកដាក់ខ្ពស់ ក្នុងការអនុវត្ត គោលនយោបាយ “ភូមិ-ឃុំ-សង្កាត់ មានសុវត្ថិភាព” ឲ្យបានកាន់តែរឹងមាំ និងមានប្រសិទ្ធភាពខ្ពស់។ ការរៀបចំសណ្តាប់ធ្នាប់តាមតំបន់ទេសចរណ៍ ឲ្យបានល្អប្រសើរ ដើម្បីត្រៀមលក្ខណៈ សម្រាប់ពិធីបុណ្យ សំខាន់ៗ នាពេលខាងមុខ។
បន្ថែមពីនោះឯកឧត្តម បានណែនាំឲ្យបង្កើន គុណភាពសេវា សាធារណៈ និងបដិសណ្ឋារកិច្ច ពិសេសត្រូវគិត គូរជួយសម្រួល ដល់បងប្អូនប្រជាពលរដ្ឋ ដែលខ្វះខាត និងប្រកបរបរលក់ ដូរនៅតាមតំបន់ ទេសចរណ៍ជាដើម។
គួរបញ្ជាក់ជូនដែរថា ក្នុងដំណើរចុះត្រួតពិនិត្យការ អនុវត្តការសាង សង់គម្រោង ឆ្នេរតេជោសន្តិភាព កែប កាលពីពេលថ្មីៗនេះ ឯកឧត្តមឧបនាយករដ្ឋមន្រ្តី សាយ សំអាល់ ក៏បានណែនាំដល់ ក្រុមហ៊ុនម៉ៅការ ត្រូវពន្លឿនការងាររបស់ខ្លួន ធ្វើយ៉ាងណាអាច អោយប្រជាពលរដ្ឋចូល លេងកម្សាន្ត និងទស្សនានូវ សមិទ្ធផលថ្មី របស់ខេត្តកែប នៅខែវិច្ឆិកា ខាងមុខនេះ ពោលត្រៀមទទួល អ្នកទេសចរក្នុង អំឡុងពេល ពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ នេះតែម្តង៕ សេង ណារិទ្ធ
