(ភ្នំពេញ)៖ តបតាមសំណើរបស់ ក្រសួងរៀបចំដែនដី នគរូបនីយកម្ម និងសំណង់ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្ត្រីក្រសួង មុខងារសាធារណៈ និងឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានជួបប្រជុំពិភាក្សាគ្នា ដើម្បីពិនិត្យលើសេចក្តី ព្រាងអនុក្រឹត្យស្តីពីការរៀបចំ និងការប្រព្រឹត្តទៅរបស់ ក្រសួងរៀបចំដែនដី នគរូបនីយកម្ម និងសំណង់ នៅទីស្តីការ ក្រសួងមុខងារសាធារណៈ នាព្រឹកថ្ងៃទី៣ ខែកញ្ញា ឆ្នាំ២០២៥។
សេចក្តីព្រាងអនុក្រឹត្យ ស្តីពីការរៀបចំនិង ការប្រព្រឹត្តទៅរបស់ ក្រសួងរៀបចំដែនដី នគរូបនីយកម្ម និងសំណង់ ដែលពិភាក្សានាព្រឹកនេះ បានឆ្លងកាត់ការ ពិភាក្សាយ៉ាងហ្មត់ចត់ ការប្រមូលធាតុចូល និងមតិយោបល់ជាច្រើនលើក ទាំងក្នុងកម្រិតបច្ចេកទេស និងកម្រិតអន្តរក្រសួង ដើម្បីធានាឱ្យការរៀបចំមុខងារ និងរចនាសម្ព័ន្ធក្រសួង កាន់តែមានភាពច្បាស់លាស់ មានសង្គតិភាព និងមានប្រសិទ្ធភាពខ្ពស់ ស្របតាមអភិក្រម «ពង្រឹង ជាជាងពង្រីក» និង «រៀបចំផ្ទះឱ្យរៀបរយ» ព្រមទាំងមានភាព ប្រទាក់ក្រឡាគ្នាក្នុង «ជវភាពនៃប្រព័ន្ធតួអង្គតែមួយ»។
គួររម្លឹកផងដែរថា ស្របតាមអភិក្រមរបស់ ក្រសួងមុខងារសាធារណៈ «ពិគ្រោះយោបល់ឱ្យបានច្រើន ហើយស្តាប់មតិយោបល់ ពីគ្រប់ភាគីពាក់ព័ន្ធទាំងអស់» នារយៈពេលកន្លងមកនេះ ក្រសួងមុខងារសាធារណៈ ក្រោយពីបានអនុវត្ត ការវិភាគមុខងារដែល ជាកិច្ចការងារក្នុងវិធានគន្លឹះទី២ បានបន្តរៀបចំកិច្ចប្រជុំកម្រិត បច្ចេកទេសជាមួយក្រសួង ស្ថាប័នម្តងមួយៗ ដើម្បីពិនិត្យ និងពិភាក្សាទៅលើខ្លឹមសារ ព្រមទាំងទិដ្ឋភាពផ្សេងៗ ទៀតនៃសេចក្តីព្រាង អនុក្រឹត្យស្តីពី ការរៀបចំប្រព្រឹត្តទៅ របស់ក្រសួង ស្ថាប័ន ដើម្បីធ្វើយ៉ាងណា ស្របទៅតាមគោល នយោបាយ នៃការកែទម្រង់ រដ្ឋបាលសាធារណៈ របស់រាជរដ្ឋាភិបាល នីតិកាលទី៧ នៃរដ្ឋសភា និងឆ្លើយតបទៅនឹង លទ្ធផលនៃការវិភាគ មុខងារផងដែរ។
បន្ថែមលើជំនួបនាព្រឹកនេះ ថ្នាក់ដឹកនាំនៃក្រសួង មុខងារសាធារណៈ ក៏បានជួបប្រជុំជាមួយ ថ្នាក់ដឹកនាំនៃក្រសួង ស្ថាប័នដទៃទៀត ជាបន្តបន្ទាប់ ដើម្បីពិនិត្យ និងពិភាក្សាទៅ លើសេចក្តីព្រាង អនុក្រឹត្យស្តីពីការរៀបចំ និងការប្រព្រឹត្តទៅ របស់ក្រសួង ស្ថាប័ននីមួយៗ ដោយអនុលោមតាម អភិក្រមរបស់ សម្តេចធិបតី និងរាជរដ្ឋាភិបាល ដូចគ្នានោះគឺ «ពង្រឹង ជាជាងពង្រីក» និង «រៀបចំផ្ទះឱ្យរៀបរយ»៕
