(ភ្នំពេញ)៖ នៅព្រឹកថ្ងៃទី៣ ខែកញ្ញា ឆ្នាំ២០២៥ ឯកឧត្តម វង្សី វិស្សុត ឧបនាយករដ្ឋមន្ត្រី ប្រចាំការ រដ្ឋមន្ត្រីទទួលបន្ទុក ទីស្តីការគណៈរដ្ឋមន្ត្រី អញ្ជើញដឹកនាំ កិច្ចប្រជុំស្ដីពីការជំរុញ បរិវត្តកម្មឌីជីថល ដើម្បីពិនិត្យវឌ្ឍនភាព ប្រមូលធាតុចូលបន្ថែម និងកំណត់មុខសញ្ញា អាទិភាពសម្រាប់ការ រៀបចំកម្មវិធីបរិវត្តកម្ម ឌីជីថលនៅទីស្តីការ គណៈរដ្ឋមន្ត្រី ដោយមានការចូលរួម ពីសំណាក់ថ្នាក់ដឹកនាំ ទីប្រឹក្សា ជំនួយការ និងមន្ត្រីដែលមានជំនាញផ្នែក បច្ចេកវិទ្យាព័ត៌មានវិទ្យា។
ឯកឧត្តម វង្សី វិស្សុត មានប្រសាសន៍ថាកិច្ច ប្រជុំនេះក៏ជាឱកាស ក្នុងការជួបជាមួយថ្នាក់ដឹកនាំ ទីប្រឹក្សា ជំនួយការ និងមន្ត្រីរាជការទាំងអស់ ដែលមានជំនាញ ព័ត៌មានវិទ្យានៅទីស្តី ការគណៈរដ្ឋមន្ត្រី ហើយដែលត្រូវបានកប់បាត់ ឬ ពុំមានឱកាសបញ្ចេញ សមត្ថភាពលើការដ្ឋាន ការងារដ៏សំខាន់នេះ ដើម្បីប្រមូលជា កម្លាំងសរុបនិងប្រើប្រាស់ ធនធានឱ្យអស់សក្តានុពល សម្រាប់ជំរុញការធ្វើ បរិវត្តកម្មឌីជីថលនៅ ទីស្ដីការគណៈរដ្ឋមន្ត្រី។
នៅក្នុងកិច្ចប្រជុំនេះ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ បានគូសរំលេចអំពីទិស ដៅរបស់រាជរដ្ឋាភិបាល នីតិកាលទី៧នៃរដ្ឋសភា ក្រោមការដឹកនាំរបស់ សម្តេចមហាបវរធិបតី នាយករដ្ឋមន្ត្រី ដែលបានផ្ដល់អាទិភាព ខ្ពស់ទៅលើការកសាង រដ្ឋាភិបាលឌីជីថល និងពលរដ្ឋឌីជីថល។
ឯកឧត្តមបាន បន្តថាការងារជំរុញ បរិវត្តកម្មរបស់ទីស្ដី ការគណៈរដ្ឋមន្រ្តី គឺជាការរួមចំណែក ក្នុងការផ្សារភ្ជាប់ ជាមួយនឹងចំណែកធំរួម ដែលបង្កើតជា Ecosystem នៃការធ្វើបរិវត្តកម្មឌីជី ថលរបស់រាជរដ្ឋាភិបាល ក្នុងគោលដៅ បង្កើនប្រសិទ្ធភាព គុណភាពការងារ របស់ក្រសួង ស្ថាប័ន ព្រមទាំងជាឃ្នាស់ ឬ ជាកម្លាំងចលករ សម្រាប់បម្រើឱ្យ បរិវត្តកម្មសង្គមជាតិ។
ក្នុងនោះ ទីស្តីការគណៈរដ្ឋមន្ត្រីក្នុង នាមជាសេនាធិការ របស់គណៈរដ្ឋមន្ត្រី និងនាយករដ្ឋមន្ត្រី ចាំបាច់ត្រូវចាប់យក និងបញ្ជ្រាបបច្ចេកវិទ្យា ទៅក្នុងប្រព័ន្ធការងារ ជាពិសេសទៅក្នុង មុខងារស្នូលសំខាន់ៗ របស់ទីស្តី ការគណៈរដ្ឋមន្ត្រី ដើម្បីបម្រើដល់ គណៈរដ្ឋមន្ត្រីទាំងមូល។
ជាមួយគ្នានេះ ឯកឧត្តម វង្សី វិស្សុត ក៏បានចង្អុលបង្ហាញ មុខសញ្ញាជាក់ស្តែង សម្រាប់ការធ្វើបរិវត្ត កម្មឌីជីថល ដោយផ្អែកលើមុខងារ និងការដ្ឋានសំខាន់ៗ របស់ទីស្តីការគណៈរដ្ឋមន្ត្រី ជាពិសេស មុខងារស្នូល និងមុខងារគាំទ្រ ដែលរួមមាន ការរៀបចំហេដ្ឋារចនាសម្ព័ន្ធ ឌីជីថលបង្គោល ប្រព័ន្ធគ្រប់គ្រង រំហូរឯកសារ ការធ្វើទំនើបកម្ម ប្រព័ន្ធមូលទិន្នន័យ មន្ត្រីរាជការនិងថ្នាក់ដឹកនាំ ប្រព័ន្ធគ្រប់គ្រងកិច្ចប្រជុំ ប្រព័ន្ធមូលទិន្នន័យឯកសារ និងប្រព័ន្ធមូល ទិន្នន័យសំខាន់ៗផ្សេងទៀត ដែលការដ្ឋានទាំងនេះគឺជា កិច្ចការចាំបាច់សម្រាប់ គាំទ្រដល់ដំណើរការ ការងាររបស់គណៈរដ្ឋមន្ត្រី និងនាយករដ្ឋមន្ត្រី។
ដើម្បីឱ្យការអនុវត្ត កម្មវិធីបរិវត្តកម្មឌីជីថល នៅទីស្តីការគណៈរដ្ឋមន្ត្រី មានវឌ្ឍនភាពទៅមុខ ឯកឧត្តមឧបនាយក រដ្ឋមន្ត្រីប្រចាំការ បានផ្ដល់ការណែនាំ ឱ្យរៀបចំយន្តការក្រុម ការងារដើម្បីរៀបចំ កម្មវិធីបរិវត្តកម្មឌីជីថល នៅទីស្ដីការគណៈរដ្ឋមន្ត្រី និងក្រុមការងាររៀបចំ គម្រោងនីមួយៗស្រប តាមអាទិភាព និងអភិក្រមដែលបានកំណត់ ដោយត្រូវរៀបចំឱ្យ មានទស្សនា ទានច្បាស់លាស់ ផែនការបណ្តុះបណ្តាល និងតម្រូវការធនធាន ព្រមទាំងជំរុញឱ្យ មានការចូលរួម និងភាពប្រតិសកម្ម និងមន្ត្រីពីគ្រប់មជ្ឈដ្ឋាន បណ្ដាអង្គភាព និងអគ្គនាយកដ្ឋាន ជំនាញពាក់ព័ន្ធ នៅក្នុងទីស្តីការ គណៈរដ្ឋមន្ត្រី៕
