(ខេត្តបាត់ដំបង)៖ រដ្ឋបាលខេត្តបាត់ដំបង បានជូនដំណឹងដល់ អាជ្ញាធរមូលដ្ឋាន គ្រប់លំដាប់ថ្នាក់ ត្រូវយកចិត្តទុក ដាក់ក្នុងការ ត្រៀមរៀបចំផែនការ អន្តរាគមន៍ និងត្រៀមរៀបចំ ទីទួលសុវត្ថិភាពឱ្យ បានសមរម្យ ក្នុងការជម្លៀស ប្រជាពលរដ្ឋ នៅពេលដែលមាន គ្រោះមហន្តរាយ ទឹកជំនន់កើតឡើង។ សេចក្តីជូនដំណឹង របស់រដ្ឋបាល ខេត្តនាថ្ងៃទី០២ខែកញ្ញាបញ្ជាក់បន្ថែម ថាបន្ថែមពីនោះត្រូវផ្សព្វផ្សាយ ណែនាំឱ្យប្រជាពលរដ្ឋ យកចិត្តទុកដាក់លើ បញ្ហាការថែរក្សាសុខភាព អនាម័យ ដើម្បីជៀសវាងបាន ពីជំងឺឆ្លងផ្សេងៗផងដែរ។
ការជូនដំណឹងខាងលើនេះ ខណៈស្ថានភាពបច្ចុប្បន្ន កម្រិតកម្ពស់ទឹកស្ទឹងសង្កែ នាព្រឹកថ្ងៃទី០២ខែកញ្ញា ឆ្នាំ២០២៥ នៅចំណុចស្ពាន សម្តេចតេជោ ហ៊ុន សែន ក្រុងបាត់ដំបង មានកម្ពស់ ១៣,៧៦ម៉ែត្រ ជាកម្រិតកម្ពស់ទឹកអាច បង្កហានិភ័យ ហើយបច្ចុប្បន្នកំពុង មានការកើនឡើងជាបន្ត បន្ទាប់តាមរយៈ ជំនន់ទឹកភ្លៀងនៅតំបន់ ទីជម្រាលនៃ ស្ទឹងសង្កែផ្នែកខាងលើ។
រដ្ឋបាលខេត្តបញ្ជាក់ថា ក្នុងស្ថានភាពបែបនេះ ដើម្បីជៀសវាង បាននូវគ្រោះថ្នាក់ផ្សេងៗ ដែលអាចកើតឡើង ជាយថាហេតុ សូមបងប្អូន ប្រជាពលរដ្ឋក្នុង ខេត្តទាំងអស់ ជាពិសេស បងប្អូនដែល រស់នៅតាមបណ្តោយ ដងស្ទឹងសង្កែ និងតំបន់ងាយរងគ្រោះ មេត្តាបង្កើនការ ប្រុងប្រយ័ត្នខ្ពស់ ដោយហាមកូន ចៅតូចៗកុំឱ្យចុះលេងទឹក និងត្រៀមរៀបចំទុកដាក់ នូវសម្ភារៈ ឯកសារសំខាន់ៗឱ្យបានត្រឹមត្រូវ និងស្វែងរក ទីទួលសុវត្ថិភាព ដែលបានកំណត់ ដោយអាជ្ញាធរមូលដ្ឋាន ក្នុងករណីទទួលរងនូវ ការលិចលង់ណា មួយកើតមានឡើង ។
ឯកឧត្តមសុខ លូអភិបាលខេត្ត បាត់ដំបងបានបញ្ជាក់ នាព្រឹកថ្ងៃអង្គារ៍នេះថា ៖ « កំពស់ទឹកស្ទឹងសង្កែក្នុង ក្រុងបាត់ដំបងដល់ កម្រិតប្រុងប្រយ័ត្នហើយ តែនឹងស្រកចុះវិញឆាប់ៗ នេះបើផ្នែកខាងលើ មិនមានភ្លៀងបន្ថែមទេ។ ដោយណែនាំអោយ បងប្អូននៅតាមដងស្ទឹង ពិសេសស្រុកឯកភ្នំ មេត្តាប្រុងប្រយ័ត្នខ្ពស់» ៕
