(ខេត្តបន្ទាយមានជ័យ)៖ នៅព្រឹកថ្ងៃអាទិត្យ ទី៣១ ខែសីហា ឆ្នាំ២០២៥ ឯកឧត្តម អ៊ុំ រាត្រី អភិបាល នៃគណៈអភិបាល ខេត្តបន្ទាយមានជ័យ និងលោកជំទាវ ជ័យ ណារី អ៊ុំ រាត្រី អនុប្រធានកិត្តិយស សាខាសមាគមនារី ដើម្បីសន្តិភាព និងអភិវឌ្ឍន៍ខេត្តខេត្ត អមដំណើរ ដោយលោកស្រី រស់ សុផានី អភិបាល រងខេត្ត និងជាប្រធានសមាគមនារី ដើម្បីសន្តិភាព និងអភិវឌ្ឍន៍ខេត្ត រួមនឹងក្រុមការងារ អញ្ជើញចុះសួរសុខទុក្ខ វរៈកងទ័ព ចំនួន៣រូប ដែលមានបញ្ហាសុខភាព ឈរជើងនៅសមរភូមិមុខ កំពុងសម្រាកព្យាបាល នៅមន្ទីរពេទ្យខេត្ត មិត្តភាពកម្ពុជា-ជប៉ុន ស្រុកមង្គលបូរី។
ក្នុងឱកាស នោះឯកឧត្តម អ៊ុំ រាត្រី អភិបាល នៃគណៈអភិបាល ខេត្តបន្ទាយមានជ័យ ក៏បានថ្លែងអំណរគុណ ដល់ក្រុមគ្រូពេទ្យខេត្ត មិត្តភាពកម្ពុជា- ជប៉ុន ស្រុកមង្គលបូរី ដែលបានខ្នះខ្នែង យកចិត្តទុកដាក់ក្នុង ការព្យាបាលជូនដល់ វរៈកងទ័ព យ៉ាងយកចិត្តទុក្ខ ដាក់ទាំងយប់ទាំងថ្ងៃ។ ជាមួយគ្នានោះហើយ ឯកឧត្តម អភិបាលខេត្ត ក៏បានថ្លែងអំណរ គុណចំពោះភាពអង់អាច ក្លាហានរបស់វរៈកងទ័ព ដែលបានលះបង់សាច់ស្រស់ ឈាមស្រស់ ដើម្បីបុព្វហេតុ ជាតិមាតុភូមិ។
នាឱកាសនោះ ឯកឧត្ដម អ៊ុ រាត្រី អភិបាល ខេត្តបន្ទាយមានជ័យ ក៏បានឧបត្ថម្ភក្នុងម្នាក់ៗ រួមមាន៖ អង្ករ២៥គីឡូក្រាម ទឹកសុទ្ធ១កេស មី១កេស ទឹកត្រី១យួរ ទឹកស៊ីអ៉ីវ១យួរ ត្រីខ១យួរ និងថវិកាមួយចំនួន។ ក្នុងនោះសមាគមនារី ដើម្បីសន្តិភាព និងអភិវឌ្ឍន៍ខេត្ត ក៏បានឧបត្ថម្ភនូវ ថវិកាមួយចំនួនជូន វរៈកងទ័ពទាំង៣នាក់ បន្ថែមផងដែរ៕
