(ភ្នំពេញ)៖ ឯកឧត្តម ស៊ី ជីនពីង ប្រធានាធិបតី នៃសាធារណរដ្ឋ ប្រជាមានិតចិន បានបញ្ជាក់ជា ថ្មីពីជំហររបស់ចិន ក្នុងការគាំទ្របទ ឈប់បាញ់រវាងកម្ពុជា-ថៃ, គាំទ្រយន្តការសង្កេត ការណ៍បទឈប់បាញ់ របស់អាស៊ានដែល ដឹកនាំដោយម៉ាឡេស៊ី និងចង់ឱ្យបង្កើត ក្រុមអ្នកសង្កេត ការណ៍អាស៊ាន (AOT) ឱ្យបានឆាប់។
ការគូសបញ្ជាក់របស់ ឯកឧត្តម ប្រធានាធិបតីនៃ សាធារណរដ្ឋ ប្រជាមានិតចិន បានធ្វើឡើង នៅរសៀលថ្ងៃទី៣០ ខែសីហា ឆ្នាំ២០២៥ ក្នុងកិច្ចប្រជុំ ការងារទ្វេភាគី ជាមួយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
តាមរយៈ ជំនួបខាងលើ ឯកឧត្តមប្រធានាធិបតី ក៏បានប្រកាសគាំទ្រ និងផ្តល់ជំនួយ មនុស្សធម៌ដល់ កម្ពុជា ដើម្បីជួយស្តារ ឡើងវិញនូវការខូចខាត និងជួយសម្រួល ដល់ទុក្ខលំបាករបស់ ប្រជាពលរដ្ឋដែល រងគ្រោះពីការប៉ះទង្គិច ប្រដាប់អាវុធកាលពី ចុងខែកក្កដាកន្លងទៅ។
ឆ្លៀតនាឱកាសនោះ សម្តេចបវរធិបតី បានថ្លែងអំណរគុណ ចំពោះការចូលរួម យ៉ាងសកម្មរបស់មិត្តចិន ក្នុងការសម្របសម្រួល ឱ្យមានបទឈប់ បាញ់រវាងកម្ពុជា និងថៃ បានយ៉ាងឆាប់រហ័ស ដែលជាជំហាន ឈានទៅរកការ ការពារអាយុជីវិត ប្រជាពលរដ្ឋ និងជួយស្តារជីវភាព របស់ប្រជាជនដែល រងផលប៉ះពាល់។
ថ្នាក់ដឹកនាំទាំងពីរ បានផ្លាស់ប្ដូរយោបល់ អំពីការពង្រឹង និងពង្រីកកិច្ចសហ ប្រតិបត្តិការឱ្យកាន់ តែស៊ីជម្រៅ លើវិស័យអាទិភាព ដែលរួមមាន៖ វិស័យនយោបាយ-ការទូត សេដ្ឋកិច្ច-ពាណិជ្ជកម្ម ការអភិវឌ្ឍហេដ្ឋារចនាសម្ព័ន្ធ និងវិស័យសំខាន់ៗ ផ្សេងទៀត ក្នុងគោលដៅពង្រឹង សមត្ថភាពអភិវឌ្ឍ ដោយម្ចាស់ការខ្លួនឯង និង ពង្រឹងការការពារ អធិបតេយ្យរបស់កម្ពុជា៕
