(ភ្នំពេញ)៖ ដោយទទួលបាន គោលការណ៍អនុញ្ញាត ដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការ នគរបាលជាតិ នាព្រឹកថ្ងៃសុក្រ ទី២៩ ខែសីហា ឆ្នាំ២០២៥ នេះ ឯកឧត្តម ឧត្តមសេនីយ៍ឯក ស៊ាង ធារិទ្ធ អគ្គស្នងការ រងនគរបាលជាតិ និងជាប្រធានក្រុមការងារ ប្រឆាំងការសម្អាតប្រាក់ និងហិរញ្ញប្បទានភេរវកម្ម នៃអគ្គស្នងការដ្ឋាន នគរបាលជាតិ ( បសប.ហភ ) បានអញ្ជើញដឹកនាំ កិច្ចប្រជុំបូកសរុបលទ្ធ ផលការងារប្រចាំឆមាសទី១ និងលើកទិសដៅ ការងារបន្ត ឆ្នាំ២០២៥។
ដោយមានការ អញ្ជើញចូលរួមពី ប្រធាន-អនុប្រធាន នាយកដ្ឋាន នាយក-នាយករងមន្ទីរ ស្នងការ-ស្នងការ រងរាជធានី-ខេត្ត ឧត្តមសេនីយ៍ វរសេនីយ៍ និងសមាជិកក្រុម ប្រតិបត្តិការផ្ទាល់ សរុបចំនួន ៣២រូប នៅសាលប្រជុំនាយកដ្ឋានអង្គរក្ស រួមទាំងលោក ឧត្តមសេនីយ៍ស្នងការ ស្នងការរង រាជធានី-ខេត្ត អញ្ជើញចូលរួមកិច្ច ប្រជុំតាមប្រព័ន្ធអនឡាញ (ZOOM)។
ឆ្លៀតក្នុងឱកាសនេះ ឯកឧត្តម ឧត្តមសេនីយ៍ឯក អគ្គស្នងការរង និងជាប្រធានក្រុមការងារ បសប.ហភ បានអនុញ្ញាតឱ្យ លោកវរសេនីយ៍ឯក មៀច ឈួនស៊ីម៉ូលីន តំណាងស្នងការដ្ឋាន នគរបាលរាជធានីភ្នំពេញ និងលោកវរសេនីយ៍ទោ ប៉ាន ចាន់រិទ្ធ តំណាងស្នងការដ្ឋាន នគរបាលខេត្តបាត់ដំបង ចូលរួមធ្វើបទបង្ហាញដើម្បី ចែករំលែកបទពិសោធន៍ និងបច្ចេកទេស ក្នុងការស្រាវជ្រាវ ស៊ើបអង្កេតបទល្មើស សម្អាតប្រាក់ ដែលបានអនុវត្តកន្លងមក ជូនអង្គប្រជុំទាំងមូល ជ្រាបជាជំនួយស្មារតីបន្ថែម ដើម្បីឱ្យការស៊ើប អង្កេតបទល្មើសសម្អាតប្រាក់ កាន់តែមានប្រសិទ្ធភាព និងនិរន្តភាព។
ជាមួយគ្នានេះ ឯកឧត្តម ឧត្តមសេនីយ៍ឯក ស៊ាង ធារិទ្ធ ក៏បានថ្លែងនូវ ការកោតសរសើរ និងលើកទឹកចិត្ត ដល់ក្រុមការងារ របស់អគ្គស្នងការដ្ឋាន នគរបាលជាតិ ក្នុងការចូលរួមចំណែក បំពេញការងារឱ្យបានពេញលេញ និងអនុវត្តឱ្យបានខ្ជាប់ខ្ជួន លើទិសដៅការងារ បន្តក្នុងឆ្នាំ២០២៥ ឱ្យបានល្អ ប្រសើរបន្ថែមទៀត៕
