ខេត្តតាកែវ៖ នាព្រឹកថ្ងៃទី២៩ ខែសីហា ឆ្នាំ២០២៥ ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានអញ្ជើញចូលរួមជាអធិបតីកាត់ស្រោមវិញ្ញាសាប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នៅមណ្ឌលប្រឡងវិទ្យាល័យប៊ុន រ៉ានី ហ៊ុនសែនបាទី។ ក្នុងឱកាសនោះ ឯកឧត្តមបានផ្តល់ជាអនុសាសន៍ និងលើកទឹកចិត្ដក្មួយៗទាំងអស់ឱ្យខិតខំប្រឹងប្រែងធ្វើវិញ្ញាសាដោយសមត្ថភាពពិតប្រាកដរបស់ខ្លួន ដើម្បីទទួលបានលទ្ធផលល្អប្រសើរ។
ឯកឧត្តមអភិបាលខេត្តបានសង្កត់ធ្ងន់ថា ការប្រឡងបាក់ឌុបឆ្នាំនេះ នៅតែតឹងតែងដូចឆ្នាំមុនៗដដែល គឺ «អ្នកចេះគឺជាប់»។ ឯកឧត្តមបានបន្ថែមថា នេះគឺជាឱកាសដ៏សំខាន់សម្រាប់ក្មួយៗគ្រប់រូបដើម្បីបង្ហាញនូវសមត្ថភាពដែលខ្លួនបានខិតខំរៀនសូត្រអស់រយៈពេល ១២ឆ្នាំកន្លងមក។ ការទទួលបាននិទ្ទេសល្អ នឹងក្លាយជាកិត្តិយសដ៏ធំធេងសម្រាប់ខ្លួនឯង គ្រួសារ សាលារៀន និងជាពិសេសរួមចំណែកដល់ការអភិវឌ្ឍធនធានមនុស្សសម្រាប់សង្គមជាតិទាំងមូល។ ក្រៅពីនេះ រដ្ឋបាលខេត្តក៏បានត្រៀមរង្វាន់លើកទឹកចិត្តផងដែរសម្រាប់ក្មួយៗដែលទទួលបាននិទ្ទេសល្អផងដែរ។
ឯកឧត្តម វ៉ី សំណាង ក៏បានក្រើនរំលឹកដល់ក្មួយៗទាំងអស់ឱ្យគោរពយ៉ាងម៉ឺងម៉ាត់តាមបទបញ្ជាផ្ទៃក្នុងនៃការប្រឡង ដោយមិនត្រូវលួចមើល ឬចម្លងគ្នាឡើយ។ ឯកឧត្តមក៏បានបញ្ជាក់ផងដែរថា បេក្ខជនមិនត្រូវបានអនុញ្ញាតឱ្យយកសំណៅឯកសារ សៀវភៅ ទូរស័ព្ទដៃ ឬឧបករណ៍អេឡិចត្រូនិចណាមួយចូលក្នុងមណ្ឌលប្រឡងឡើយ។ បើអនុរក្សរកឃើញ បេក្ខជននឹងត្រូវផាកពិន័យរហូតដល់ ពិន្ទុសូន្យ ឬអាចធ្លាក់ដោយស្វ័យប្រវត្តិតែម្តង។
ជាចុងក្រោយ ឯកឧត្តមអភិបាលខេត្តបានជូនពរបេក្ខជនទាំងអស់ឱ្យប្រឡងបានជោគជ័យ និងទទួលបានលទ្ធផលល្អដូចបំណងប្រាថ្នា៕
