ស្ទឹងត្រែង – នៅព្រឹកថ្ងៃទី២៨ ខែសីហា ឆ្នាំ២០២៥ រដ្ឋបាលខេត្តស្ទឹងត្រែងបានរៀបចំកិច្ចប្រជុំមួយដើម្បីពិនិត្យមើលវឌ្ឍនភាពនៃការអនុវត្តគោលនយោបាយ “ភូមិ ឃុំ សង្កាត់ មានសុវត្ថិភាព” សម្រាប់ឆមាសទី១ ឆ្នាំ២០២៥។
កិច្ចប្រជុំនេះបានប្រព្រឹត្តទៅក្រោមអធិបតីភាពឯកឧត្តម ទូច ណារ៉ុថ រដ្ឋលេខាធិការក្រសួងមហាផ្ទៃ និងមានការចូលរួមពីមន្ត្រីជាន់ខ្ពស់ជាច្រើនទៀត រួមទាំងឯកឧត្តម ឈាង ឡាក់ ប្រធានក្រុមប្រឹក្សាខេត្ត និងឯកឧត្តម សរ សុពុត្រា អភិបាលនៃគណៈអភិបាលខេត្តផងដែរ។
ក្នុងសុន្ទរកថារបស់ខ្លួន ឯកឧត្តម សរ សុពុត្រា អភិបាលខេត្តស្ទឹងត្រែងបានលើកឡើងថា ទោះបីប្រទេសកម្ពុជាកំពុងប្រឈមនឹងការឈ្លានពានពីប្រទេសសៀមក៏ដោយ ក៏ខេត្តស្ទឹងត្រែងនៅតែរក្សាបាននូវសន្តិសុខ និងសណ្តាប់ធ្នាប់ល្អប្រសើរគួរឲ្យកត់សម្គាល់។ ឯកឧត្តមបានគូសបញ្ជាក់ថា កងកម្លាំងសមត្ថកិច្ចគ្រប់លំដាប់ថ្នាក់បានសហការគ្នាយ៉ាងសកម្ម ដើម្បីបង្កើនការល្បាត និងដាក់វេនយាមប្រចាំការក្នុងការទប់ស្កាត់បទល្មើសនានា។
អភិបាលខេត្តក៏បានបន្ថែមថា អាជ្ញាធរខេត្តបានបង្ក្រាបបទល្មើសគ្រឿងញៀនជាបន្តបន្ទាប់ ហើយថ្មីៗនេះក៏បានបំបែកករណីជំរិតទារប្រាក់តាមរយៈបណ្ដាញសង្គមហ្វេសប៊ុក ដែលកើតឡើងនៅក្នុងពន្ធនាគារខេត្តទៀតផង។
ឯកឧត្តម ទូច ណារ៉ុថ រដ្ឋលេខាធិការក្រសួងមហាផ្ទៃបានវាយតម្លៃខ្ពស់ និងកោតសរសើរចំពោះការខិតខំប្រឹងប្រែងរបស់ថ្នាក់ដឹកនាំ និងអាជ្ញាធរខេត្តស្ទឹងត្រែងក្នុងការរក្សាសន្តិសុខ និងចូលរួមអនុវត្តគោលនយោបាយ “ភូមិ ឃុំ សង្កាត់ មានសុវត្ថិភាព”។
ឯកឧត្តមបានជំរុញឲ្យកងកម្លាំងមានសមត្ថកិច្ចគ្រប់លំដាប់ថ្នាក់បន្តទប់ស្កាត់បទល្មើសសំខាន់ៗដែលជាកង្វល់របស់ប្រជាពលរដ្ឋ រួមមាន ចោរលួច ចោរប្លន់ និង គ្រឿងញៀន។ ឯកឧត្តមបានសង្កត់ធ្ងន់ថា ភាពជោគជ័យនៃការអនុវត្តគោលនយោបាយនេះទាមទារឲ្យមានការចូលរួមពីគ្រប់ភាគីពាក់ព័ន្ធទាំងអស់ ទាំងអាជ្ញាធរ កងកម្លាំងមានសមត្ថកិច្ច មន្ទីរ អង្គភាព អាជ្ញាធរមូលដ្ឋាន និងប្រជាពលរដ្ឋផ្ទាល់។Samneang
