(ភ្នំពេញ)៖ អគ្គលេខាធិការ គណៈកម្មាធិការ វិនិយោគកម្ពុជានៃ ក្រុមប្រឹក្សាអភិវឌ្ឍន៍កម្ពុជា បានលើកទឹកចិត្ត ឱ្យកម្មវិធី ICONE ពង្រីកវិសាលភាព នៃការអនុវត្តកម្មវិធីនេះ ទៅកាន់ខេត្តដទៃដែល មានសក្ដានុពល ផ្នែកកសិកម្ម ដើម្បីរួមចំណែក ដល់ការអភិវឌ្ឍ សេដ្ឋកិច្ចជាតិ។
ក្នុងឱកាសទទួល ជួបពិភាក្សា ការងារជាមួយបណ្ឌិត ស្ទេហ្វាន់ ហាន់សែលម៉ាន់ ប្រធានកម្មវិធី ICONE និងក្រុមការងារ ដើម្បីពិភាក្សាអំពី ទិសដៅនៃការ អនុវត្តកម្មវិធី ICONE នៅកម្ពុជា កាលពីថ្ងៃទី២៨ ខែសីហា ឆ្នាំ២០២៥ ឯកឧត្តម ជា វុទ្ធី អគ្គលេខាធិការ គណៈកម្មាធិការវិនិយោគ កម្ពុជានៃក្រុមប្រឹក្សា អភិវឌ្ឍន៍កម្ពុជា បានថ្លែងអំណរគុណ និងវាយតម្លៃខ្ពស់ ដល់កម្មវិធី ICONE ដែលបាន និងកំពុងអនុវត្ត យ៉ាងជោគជ័យនូវ គម្រោងរបស់ខ្លួននា ខេត្តគោលដៅចំនួនបី នៃប្រទេសកម្ពុជា រួមមាន ខេត្តបាត់ដំបង បន្ទាយមានជ័យ និងខេត្តសៀមរាប។
ឯកឧត្តមអគ្គលេខាធិការ បានលើកឡើងអំពី លទ្ធភាពនៃការពង្រីក វិសាលភាពនៃកា រអនុវត្តកម្មវិធីនេះទៅ កាន់ខេត្តដទៃដែល មានសក្ដានុពល ផ្នែកកសិកម្ម ព្រមទាំងរំលេច អំពីវិស័យសក្ដា នុពលមួយចំនួនដែល អាចពិចារណាបញ្ចូល ក្នុងកម្មវិធី ICONE ដំណាក់កាលទី២ មានដូចជា វិស័យឧស្សាហកម្មឈើដាំ ការកែច្នៃកៅស៊ូ និងការកែច្នៃកាក សំណល់ក្នុងស្រុក ជាដើម។
ឯកឧត្តមអគ្គ លេខាធិការបានថ្លែង អំណរគុណ និងបង្ហាញពីការគាំទ្រ យ៉ាងពេញទំហឹង ដល់កម្មវិធី ICONE របស់ទីភ្នាក់ងារ GIZ ដែលបានបន្តការ ចូលរួមចំណែកបន្ថែមទៀត ដល់ការអភិវឌ្ឍ សង្គមសេដ្ឋកិច្ច នៅកម្ពុជា។
លោកបណ្ឌិត ស្ទេហ្វាន់ ហាន់សែលម៉ាន់ បានថ្លែងអំណរគុណ ដល់ឯកឧត្តមអគ្គ លេខាធិការដែលបាន ចំណាយពេលវេលា ដ៏មានតម្លៃទទួល ជួបពិភាក្សាការងារ និងបានទទួលយក នូវការលើកឡើងរបស់ ឯកឧត្តមអគ្គលេខាធិការ សម្រាប់ធ្វើជាធាតុចូល ដើម្បីក្រុមការងារមាន មូលដ្ឋានសម្រាប់ពិចារណា និងសិក្សាលម្អិតដាក់ ក្នុងកម្មវិធី ICONE ដំណាក់កាលទី២។
សូមបញ្ជាក់ជូនថា កម្មវិធី ICONE ដំណាក់កាលទី១ ត្រូវបានអនុវត្តរយៈពេលជាង ៣ឆ្នាំមកហើយ ដោយចាប់ផ្ដើមអនុវត្ត កាលពីខែមេសា ឆ្នាំ២០២២ ហើយគ្រោងនឹង បញ្ចប់នៅខែមីនា ឆ្នាំ២០២៦ ខាងមុខ។ ដើម្បីបន្តពង្រឹង ភាពប្រកួតប្រជែង របស់វិស័យឯកជនកម្ពុជា ឱ្យកាន់តែខ្លាំងក្លា និងចូលរួមចំណែក ដល់ការអភិវឌ្ឍសេដ្ឋកិច្ច ប្រកបដោយចីរភាព ទីភ្នាក់ងារ GIZ កំពុងសិក្សាអំពីការ បន្តកម្មវិធី ICONE ទៅដំណាក់កាលទី២៕
