(ខេត្តកែប)៖ នៅព្រឹកថ្ងៃព្រហស្បតិ៍ ទី២៨ ខែសីហា ឆ្នាំ២០២៥ ឯកឧត្តមបណ្ឌិត សោម ពិសិដ្ឋ អភិបាលនៃគណៈ អភិបាលខេត្តកែប បានអញ្ជើញចុះពិនិត្យ សំណេះសំណាល និងបើកវិញ្ញាសាប្រឡង សញ្ញាបត្រមធ្យមសិក្សា ទុតិយភូមិ(បាក់ឌុប) ឆ្នាំសិក្សា២០២៤-២០២៥ នៅវិទ្យាល័យ ប៊ុនរ៉ានី ហ៊ុន សែន ចរិយាវង្ស ស្ថិតនៅភូមិដំណាក់ចំបក់ សង្កាត់អូរក្រសារ ក្រុងកែប ខេត្តកែប។
តាមរយៈរបាយការណ៍ របស់លោក ងួន ចន្ទសុជាតា ប្រធានមន្ទីរអប់រំ យុវជន និងកីឡាខេត្តកែប ខេត្តមានមណ្ឌល ប្រឡងចំនួនពីរគឺ៖ ទី១-មណ្ឌលវិទ្យាល័យ ប៊ុនរ៉ានី ហ៊ុនសែន ចរិយាវង្ស (ជើង) សម្រាប់ថ្នាក់វិទ្យាសាស្ត្រសង្គម ដោយប្រើប្រាស់ អគារសិក្សាចំនួន ១ខ្នង ៣ជាន់ មាន ១៨បន្ទប់ មានបេក្ខជន សរុប៣១៩នាក់ ស្រី១៨៥នាក់ និងទី២-មណ្ឌលវិទ្យាល័យ ប៊ុនរ៉ានី ហ៊ុនសែន ចរិយាវង្ស (ត្បូង) សម្រាប់ថ្នាក់វិទ្យាសាស្ត្រ ប្រើប្រាស់អគារសិក្សាចំនួន ១ខ្នង ៤ជាន់ មានចំនួន ២៤បន្ទប់ មានបេក្ខជនសរុប ៣០៧នាក់ ស្រី ១៨២នាក់។ មណ្ឌលទាំង ២នេះ មានទីតាំងស្ថិតនៅ ភូមិដំណាក់ចំបក់ សង្កាត់អូរក្រសារ ក្រុងកែប ខេត្តកែប ដែលមានអគ្គីសនី ទឹកស្អាត និងបន្ទប់ទឹក ប្រើប្រាស់គ្រប់គ្រាន់។
ក្នុងឱកាសនោះដែរ ឯកឧត្តមបណ្ឌិត សោម ពិសិដ្ឋ អភិបាលនៃគណៈ អភិបាលខេត្តកែប ក៏បានលើកទឹក ចិត្តដល់ក្មួយៗសិស្សានុសិស្ស ដែលជាបេក្ខជន ប្រឡងទាំងអស់ត្រូវ ប្រមូលអារម្មណ៍ និងខិតខំឱ្យអស់ពីសមត្ថភាព សរសេរដោយភាព ប្រុងប្រយ័ត្នខ្ពស់ ដោយបានគូសបញ្ជាក់ ថាអ្នកចេះគឺជាប់៕
