(ខេត្តបន្ទាយមានជ័យ)៖ នៅព្រឹកថ្ងៃព្រហស្បតិ៍ ទី២៨ ខែសីហា ឆ្នាំ២០២៥ នេះ ឯកឧត្តម អ៊ុំ រាត្រី អភិបាល នៃគណៈ អភិបាលខេត្ត បន្ទាយមានជ័យ អមដំណើរដោយ អភិបាលរងខេត្ត គណៈមេប្រយោគ អង្គភាពប្រឆាំងអំពើពុករលួយ បានអញ្ជើញបើកហិប វិញ្ញាសាប្រឡងមធ្យម សិក្សាទុតិយភូមិ នៅមណ្ឌលប្រឡងវិទ្យាល័យ សិរីសោភ័ណ។
នាឱកាសនោះ ឯកឧត្ដម អ៊ុ រាត្រី ក៏បានជូនពរដល់បេក្ខជន ដែលមានឈ្មោះ ប្រឡងទាំងអស់ ទទួលបានលទ្ធផល ល្អទាំងអស់គ្នា ដោយគោរព តាមគោលទាំង៤ នៃការប្រឡង គឺគោលការណ៍ច្បាប់ យុត្តិធម៌ តម្លាភាព និងលទ្ធផល ទទួលយកបាន ពោលគឺ “អ្នកចេះជាប់”។
បើតាមការបញ្ជាក់ពីលោក ឈូ ប៊ុនរឿង ប្រធានមន្ទីរអប់រំ យុវជន និងកីឡាខេត្តបន្ទាយមានជ័យ បានឱ្យដឹងថា ក្នុងឆ្នាំ២០២៥នេះ នៅក្នុងខេត្តបន្ទាយមានជ័យ មានមណ្ឌលប្រឡង មានបន្ទប់២៦៣បន្ទប់ បេក្ខជនមាន ឈ្មោះក្នុងបញ្ជី ៦៥៥២នាក់ /ស្រី៣៧២៥នាក់។
មានមណ្ឌលប្រឡងចំនួន៨ មណ្ឌល បែងចែកពីរមាន ថ្នាក់វិទ្យាសាស្ត្រចំនួន ៣មណ្ឌល រួមមាន៖ ១-សាលាបឋមសិក្សា ហ៊ុនសែន សូភី, ២-វិទ្យាល័យ ហ៊ុន សែន ខ្លាកូន, ៣-សាកលវិទ្យាល័យជាតិ មានជ័យ។ ចំពោះថ្នាក់វិទ្យាសាស្ត្រសង្គម មាន៥មណ្ឌល រួមមាន៖ ១-វិទ្យាល័យ សិរីសោភ័ណ, ២-វិទ្យាល័យ សម្តេចឪ, ៣- សាកលវិទ្យា ល័យ UME សាខាខេត្តបន្ទាយមានជ័យ, ៤-វិទ្យាល័យ អូរអំបិល និងទី៥ អនុវិទ្យាល័យ ទឹកថ្លា។
សូមបញ្ជាក់ថា បើតាមរបាយការណ៍ របស់មន្ទីរអប់រំយុវជន និងកីឡាខេត្ត បានបញ្ជាក់ថា បន្ទប់ប្រឡង នៅឆ្នាំ២០២៤ មាន២៥០បន្ទប់ ឆ្នាំ២០២៥នេះមាន ២៦៣បន្ទប់ ពោលកើនឡើង១៣បន្ទប់, ដោយឡែក បេក្ខជនដែលមាន ឈ្មោះក្នុងបញ្ជី ឆ្នាំ២០២៤ មានចំនួន ៦ ២៣៥នាក់/ស្រី៣៥៦៩នាក់, ឆ្នាំ២០២៥ បេក្ខជនមានឈ្មោះក្នុងបញ្ជីចំនួន ៦ ៥៥២នាក់/ស្រី៣៧២៥នាក់ ពោលនៅឆ្នាំ២០២៥នេះ មានការកើនឡើង ៣១៧នាក់៕
