(ភ្នំពេញ)៖ នៅរសៀលថ្ងៃពុធ ទី២៧ ខែសីហា ឆ្នាំ២០២៥ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានទទួលជួប សម្តែងការគួរសម និងពិភាក្សាការងារ ជាមួយលោក អេនរីកូ ហ្គាវេលីយ៉ា (Enrico Gaveglia) តំណាងប្រចាំប្រទេសថ្មី របស់កម្មវិធីអភិវឌ្ឍន៍ សហប្រជាជាតិនៅកម្ពុជា នៅទីស្តីការក្រសួងបរិស្ថាន។ ឯកឧត្តមរដ្ឋមន្រ្តី បានថ្លែងកោតសរសើរ ចំពោះកិច្ចសហប្រតិបត្តិការដ៏ល្អ និងភាពជាដៃ គូយូរអង្វែងរបស់ UNDP ក្នុងការរួមចំណែក លើកកម្ពស់ការអភិវឌ្ឍ ប្រកបដោយចីរភាព និងរក្សាបាននូវ តុល្យភាពបរិស្ថានល្អប្រសើរ។
ចំពោះលទ្ធផលការងារ ល្អប្រសើរនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានពេញចិត្តជា ខ្លាំងចំពោះលទ្ធផលនេះ និងបានអនុញ្ញាតឱ្យ ប្រកាសជាផ្លូវការ នៅមហាសន្និបាតអង្គ ការសហប្រជាជាតិ ក្នុងខែកញ្ញាខាងមុខ។ ជាមួយគ្នានេះ ការបង្រៀន និងបណ្តុះបណ្តាលជំនាញ ដល់ប្រជាសហគមន៍ មូលដ្ឋាន ឱ្យពួក គេមានចំណេះដឹង ជំនាញ ក្លាយជាសហគ្រិនភាព ដើម្បីចូលរួមចំណែក ក្នុងការអភិវឌ្ឍសហគមន៍ នៅក្នុងមូលដ្ឋាន ផ្ទាល់របស់ពួកគេ គឺជាវត្ថុបំណងដ៏ចម្បង របស់ប្រមុខរាជរដ្ឋាភិបាលកម្ពុជា តាមរយៈកម្មវិធី គោលនយោបាយជាតិ ដែលមានយុទ្ធសាស្រ្ត ចក្រាវិស័យបរិស្ថានជាត្រីវិស័យ។ ហើយគំនិតផ្តួចផ្តើមនេះ នឹងជួយលើកកម្ពស់ ជីវភាពប្រជាសហគមន៍ ធ្វើឱ្យគម្រោងអភិវឌ្ឍ មាននិរន្តភាពប្រកប ដោយការចូលរួម និងអាចជួយ ប្រែក្លាយឥរិយាបថ ប្រជាសហគមន៍ពី ការចូលព្រៃកាប់ឈើ មកជាអ្នកការពារព្រៃឈើ និងអភិរក្សធនធានធម្មជាតិវិញ។
តំណាងកម្មវិធីអភិវឌ្ឍន៍ សហប្រជាជាតិនៅកម្ពុជា UNDP បានគាំទ្រចំពោះគំនិត ផ្តួចផ្តើមក្នុងវិស័យបរិស្ថានមួយនេះ ដែលអាចជួយលើក កម្ពស់ជីវភាពប្រជា សហគមន៍ផង និងប្រយុទ្ធប្រឆាំងនឹង ការប្រែប្រួល អាកាសធាតុផង។ UNDP នឹងបន្តធ្វើការយ៉ាងជិតស្និទ្ធ ជាមួយក្រសួងបរិស្ថាន ដើម្បីជួយប្រមូលមូលនិធិ និងរៀបចំយន្តការ ហិរញ្ញប្បទានចម្រុះ ដើម្បីធានាថាគម្រោងទាំងនោះ នឹងអាចបន្តទៅមុខប្រកប ដោយចីរភាព និងផ្តល់ផលប្រយោជន៍ ដល់ប្រជាពលរដ្ឋកម្ពុជា៕
