(កំពង់ចាម)៖ រសៀលថ្ងៃទី២៥ ខែសីហា ឆ្នាំ២០២៥ ឯកឧត្តម អ៊ុន ចាន់ដា អភិបាលនៃគណៈ អភិបាលខេត្តកំពង់ចាម និងជាប្រធានគណៈ បញ្ជាការឯកភាពខេត្ត ឯកឧត្តម ឡៅ ឈីវអ៊ាវ អនុរដ្ឋលេខាធិការ ក្រសួងអប់រំយុវជន និងកីឡា និងជាប្រធានគណៈ មេប្រយោគទូទាំងប្រទេស ប្រចាំខេត្តកំពង់ចាម និងលោកជំទាវវេជ្ជ. ម៉ា សូយ៉ិនដា ឧបការី នៃអង្គភាពប្រឆាំង អំពើពុករលួយ និងជាប្រធានក្រុមការងារ អ.ប.ព. បានចូលរួមកិច្ចប្រជុំ រៀបចំការប្រឡង សញ្ញាបត្រមធ្យម សិក្សាទុតិយភូមិ (BacII) សម្រាប់ឆ្នាំសិក្សា នាសម័យប្រលង ២៨-សីហា សម្រាប់ឆ្នាំសិក្សា ២០២៤-២០២៥។ កិច្ចប្រជុំនេះមាន ការអញ្ជើញចូលរួម ពីប្រតិភូក្រសួងអប់រំយុវជន និងកីឡា ក្រុមការងារអង្គភាព ប្រឆាំងអំពើពុករលួយ គណៈកម្មការខេត្ត ក្រុង ស្រុក និងមន្ត្រីពាក់ព័ន្ធមួយចំនួនទៀត នៅសាលប្រជុំសាលា ខេត្តកំពង់ចាម។
កិច្ចប្រជុំបានដាក់ ចេញនូវគោលការណ៍ សំខាន់ៗ រួមមាន៖
១-ការផ្អាកជាបណ្ណោះ អាសន្នចំពោះទីតាំង អាជីកម្មថតចម្លង ឯកសារអ៉ិនធឺណេត និងអាជីវកម្ម លក់សម្ភារសិក្សា គ្រប់ប្រភេទ។
២-ការផ្អាកជាបណ្តោះ អាសន្ននូវអាជីវកម្មនានា ភោជនីយដ្ឋាន អាហារដ្ឋាន ការដ្ឋានសំណង់នានាដែល ស្ថិតនៅក្នុង និងជុំវិញបរិវេណ មណ្ឌលប្រឡង។
៣-ទីតាំងអាជីវកម្មផ្សេងទៀត ដែលស្ថិតនៅជិត បរិវេណមណ្ឌលប្រឡង ហាមបង្កសំឡេងរំខាន ឫសកម្មភាពនានា ដែលធ្វើឱ្យប៉ះពាល់ ដល់ដំណើរការនៃ ការប្រឡងរបស់បេក្ខជន។
៤- មន្ទីរសុខាភិបាល នៃរដ្ឋបាលខេត្ត ត្រូវរៀបចំក្រុមគ្រូពេទ្យ និងរថយន្តសង្គ្រោះ រួមនឹងការបាញ់ ថ្នាំសម្លាប់មូស នៅគ្រប់មណ្ឌលប្រឡង ឱ្យបានមុន។
៥-សម្រាប់ការផ្ញើ ទោចក្រយានយន្ត កង់-ម៉ូតូ នៅតាមមណ្ឌលប្រឡង សហភាពសហព័ន្ធ យុវជនកម្ពុជា ខេត្តកំពង់ចាម សម្របសម្រួល ជាកម្លាំងសន្តិសុខ មើលការខុសត្រូវ ទទួលផ្ញើមិនតម្រូវឱ្យ បង់ប្រាក់ឡើយ និងចែកជូន នូវទឹកបរិសុទ្ធ និងភេសជ្ជៈ ដែលឧបត្ថម្ភដោយ ក្រុមហ៊ុនវឌ្ឍនៈ តាមរយៈ ឯកឧត្តម អភិបាលខេត្តកំពង់ចាម។
ឯកឧត្តមអភិបាលខេត្ត បានណែនាំដល់ គ្រប់កងកម្លាំងមាន សមត្ថកិច្ចនិងអ្នកពាក់ ព័ន្ធទាំងអស់ ត្រូវពង្រឹងក្នុងការថែរក្សា សុវត្ថិភាព សន្តិសុខ សណ្តាប់ធ្នាប់ ឱ្យបានល្អប្រសើរ និងជួយសម្រប សម្រួលដល់ បេក្ខជន ដែលមកប្រឡង ធ្វើយ៉ាងណា ឱ្យដំណើរនៃការ ប្រឡងសញ្ញាបត្រមធ្យម សិក្សាទុតិយភូមិ (បាក់ឌុប) ឆ្នាំ២០២៥នេះ បានប្រព្រឹត្តទៅដោយ រលូន និងជោគជ័យ។
ជាមួយគ្នានោះ ឯកឧត្តមអភិបាលខេត្ត ក៏បានណែនាំដល់ និងអាជ្ញាធរ ក្រុង/ស្រុកទាំងអស់ ត្រូវផ្សព្វផ្សាយ និងជួយសម្របសម្រួល ធ្វើយ៉ាងណាកុំឱ្យមានការ ដំឡើងថ្លៃ ម្ហូបអាហារ សណ្ឋាគារ ផ្ទះសំណាក់ និងបន្ទប់ជួល នៅក្នុងកំឡុង ពេលប្រឡងផងដែរ។
