(ភ្នំពេញ)៖ ខណៈបច្ចេកវិទ្យាហិរញ្ញវត្ថុ មានការរីកចំរើន ទន្ទឹមនេះក៏កើតមាន ហានិភ័យផងដែរដូចជា ការឆបោកផ្នែក ហិរញ្ញវត្ថុតាមប្រព័ន្ធអនឡាញ (Facebook, Telegram, TikTok) ការលួចក្លែងបន្លំ អត្តសញ្ញាណកម្ចីអនឡាញ កម្ចីក្រៅប្រព័ន្ធ កម្ចីខុសច្បាប់ ការខ្ចីលុយពីចិន ការខ្ចីលុយពីអង្គការ ដែលប្រតិបត្តិ ការនៅក្រៅក្របខ័ណ្ឌច្បាប់ ហើយគិតអត្រាការ ប្រាក់ហួសហេតុ ឬប្រើល្បិចបង្ខិតបង្ខំ ដើម្បីប្រមូលបំណុល ដែលកំពុងតែរាតត្បាត មកលើប្រជាពលរដ្ឋ តាមតំបន់មូលដ្ឋាន។
កម្ចីក្រៅប្រព័ន្ធដែល កំពុងរាតត្បាតនៅកម្ពុជានេះ បាននាំឱ្យប្រជាពលរដ្ឋរង ការជំពាក់បំណុល វ័ណ្ឌកដោះខ្លួនមិនរួច នាំឱ្យកើតទៅជាវិបត្តិផ្លូវចិត្ត។ លើសពីនេះទៅទៀត ប្រជាពលរដ្ឋអាចប្រឈមមុខ នឹងការគំរាមកំហែង គៀបសង្កត់ គ្រោះថ្នាក់ ឬរូបភាពផ្សេងៗ ដើម្បីបង្ខំឲ្យសងប្រាក់ដើម ការប្រាក់ និង ប្រាក់ពិន័យខុស គោលការណ៍ហើយ ធ្ងន់ធ្ងរជាងនេះទៀតគឺ ទ្រព្យប្រជាជនទាំង អស់ត្រូវបានរឹបអូស ដោយពុំឆ្លងកាត់ ការសម្រេចពី តុលាការជាដើម។
ទាក់ទិនបញ្ហាហិរញ្ញវត្ថុនេះ ធនាគារជាតិនៃកម្ពុជា បាននិងកំពុងយក ចិត្តទុកដាក់ ក្នុងការបញ្ជ្រាបចំណេះ ដឹងផ្នែកហិរញ្ញវត្ថុ និង លើកកម្ពស់ការប្រើប្រាស់ សេវាហិរញ្ញវត្ថុ ប្រកបដោយ ការប្រុងប្រយ័ត្ន និងការទទួលខុសត្រូវ សម្រាប់ប្រជាពលរដ្ឋគ្រប់រូប ជាពិសេស កុមារ ស្ត្រី និងប្រជាពលរដ្ឋ នៅតាមតំបន់មូលដ្ឋាន។
ចាប់ពីដើឆ្នាំ២០២៥មក ធនាគារជាតិបាន ចុះក្រុងក្រចេះ ខេត្តក្រចេះ ក្រុងឧដុង្គម៉ែជ័យ ខេត្តកំពង់ស្ពឺ និង ស្រុកសន្ទុក ខេត្តកំពង់ធំ ដើម្បីអប់រំប្រជាពលរដ្ឋ កុំអោយចាញ់ឧបាយកល ការឆបោកផ្នែក ហិរញ្ញវត្ថុតាម ប្រព័ន្ធអនឡាញតាមរយ: ការរៀបចំសិក្ខាសាលាស្តីពី «ចំណេះដឹងផ្នែកហិរញ្ញវត្ថុ និងកិច្ចការពារអតិថិជន»។ ការបញ្ជ្រាប ចំណេះដឹងផ្នែកហិរញ្ញវត្ថុ និងកិច្ចការពារអតិថិជន គឺជាកាតព្វកិច្ចអទិភាព និងចាំបាច់ ដែលធនាគារជាតិ បាននិងកំពុងអនុវត្ត និងសហការជា មួយស្ថាប័នពាក់ព័ន្ធ និងដៃគូអភិវឌ្ឍនានា ដើម្បីបញ្ជៀបការ យល់ដឹងនេះ ដល់ប្រជាជនតាមមូលដ្ឋាន កម្មករ-កម្មការិនីនៅតាមរោងចក្រ សិស្ស-និស្សិត នៅតាមគ្រឹះស្ថានឧត្តមសិក្សា និងគ្រប់វិស័យពាក់ព័ន្ធ ដែលជាកាតាលីករ ជួយជំរុញ និងលើកកម្ពស់បិរយា បន្នហិរញ្ញវត្ថុនៅកម្ពុជា។
តាមរយៈសិក្ខាសាលានេះ បានអំពាវនាវអោយ អ្នកចូលរួមទាំងអស់ កុំឱ្យចាញ់បោកល្បិច កលជនទុច្ចរិត ដោយត្រូវ ចេះបែងចែកឱ្យដាច់ រវាងកម្ចីជាមួយ ស្ថាប័នស្របច្បាប់ និងកម្ចីជាស្ថាប័នក្រៅច្បាប់ ។
កម្ចីជាមួយស្ថាប័នស្របច្បាប់ គឺខ្ចីពីគ្រឹះស្ថានធនាគារ និងមីក្រូហិរញ្ញវត្ថុ ដែលមានទីតាំងច្បាស់លាស់ មានអត្រាការប្រាក់សមរម្យ និងស្របតាមច្បាប់ គិតអត្រាជាភាគរយប្រចាំឆ្នាំ អតិថិជនទទួលបានការ ការពារត្រឹមត្រូវ។
បន្ថែមពីនេះ ធនាគារជាតិក៏បានអនុវត្ត នូវវិធានការពង្រឹង កិច្ចការពារអតិថិជន ដែលមានលក្ខណៈ បុរសកម្មជាច្រើន ព្រមទាំងបានគាំទ្រ និង សហការជាមួយ ភាគីពាក់ព័ន្ធនានា ដើម្បីបន្តលើកកម្ពស់ ការផ្តល់សេវាហិរញ្ញវត្ថុ ប្រកបដោយ ក្រមសីលធម៌វិជ្ជាជីវៈ ធានានូវការប្រកួត ប្រជែងដោយយុត្តិធម៌ និងតម្លាភាព និង ការការពារសិទ្ធិ និងអត្ថប្រយោជន៍ របស់អតិថិជន។
លើសពីនេះ ធនាគារជាតិបាន សហការជាមួយ ក្រសួងមហាផ្ទៃ ក្នុងការពង្រឹងប្រព័ន្ធ Smart Hotline Scam ពង្រឹងយន្ត ការដោះស្រាយបណ្តឹង, បង្កើតក្រុមការងារ រៀបចំយន្តការ ឯករាជ្យ ក្នុងការពិគ្រោះយោបល់ និងសម្រុះសម្រួលបំណុល, និងលើកកម្ពស់ ចំណេះដឹង ផ្នែក ហិរញ្ញវត្ថុ ដល់អតិថិជន៕
