(ភ្នំពេញ)៖ ក្រុមព្រះខ័នរាជស្វាយរៀង ដែលជាក្រុមជើងឯក លីគកំពូលកម្ពុជាត្រូ វប្រកួតបើកឆាកជាមួយក្រុម Shan United របស់ប្រទេស មីយ៉ានម៉ា នៅកីឡដ្ឋាន Thuwunnas ទីក្រុងYangon ប្រទេសមីយ៉ាន់ម៉ា នៅម៉ោង ១៨:៣០ (ម៉ោងនៅកម្ពុជា) ថ្ងៃទី២១ ខែសីហា ឆ្នាំ២០២៥ ដែលជាប្រកួតវគ្គ សន្សំពិន្ទុក្នុងពូល B នៃពានរង្វាន់ ជើងឯកក្លឹបអាស៊ាន-ASEAN Club Championship Shopee Cup ឆ្នាំ២០២៥-២០២៦។
គូសបញ្ជាក់នៅក្នុង សន្និសីទសារព័ត៌មានមុនការប្រកួត គ្រូបង្គោលក្លឹប ព្រះខ័នរាជស្វាយរៀង លោក MCCONKEY MATTHEW MERVYN បានលើកឡើងថា លោកបានវិភាគលើ២ ប្រកួតចុងក្រោយ របស់ក្រុម Shan United (មីយ៉ានម៉ា) ដែលជាគូប្រជែងជាមួយគ្នា ក្នុងប្រកួតដំបូងនេះ ហើយលោកបានរៀបចំកីឡាកររបស់ខ្លួនត្រៀម ប្រកួតដោយផ្អែក តាមភាពជាក់ស្តែង ដែលបានឃើញ។
គ្រូបង្គោល ជនជាតិអង់គ្លេស រូបនេះបន្ថែមថា ក្រៅពីការប្រកួតដំបូងនេះ ក៏យើងពិនិត្យមើល ក្រុមផ្សេងៗទៀត ដែលត្រូវជួបគ្នាក្នុងពូល B នេះ ហើយការប្រកួតនឹងលំបាក។ យើងមិនចង់ដាក់ គោលដៅខ្លាំងពេកលើ កូនក្រុមរបស់យើង ហើយយើងនឹង គិតលើការប្រកួត បន្ទាប់ម្តងមួយៗ។ យើងនឹងព្យាយាម ប្រកួតទៅតាមលទ្ធភាព របស់យើងដែល អាចធ្វើបាន។
ASEAN Club Championship Shopee Cup នេះមាន១២ក្រុម ចូលរួមប្រជែងជើងឯក ដោយចែកចេញជា២ពូល ក្នុងនោះព្រះខ័នរាជ ស្វាយរៀងស្ថិតក្នុងពូល B ជាមួយ៥ក្រុមផ្សេងទៀត ដូចជាក្លឹប Bangkok United FC របស់ថៃ, ក្លឹប Johor Darul Ta’zime FC ម៉ាឡេស៊ី, Nam Dinh FC វៀតណាម, Lion City Sailors FC សិង្ហបុរី និងក្លឹប Shan United FC របស់ប្រទេសមីយ៉ាន់ម៉ា ដែលឡើងមកពី វគ្គជម្រុះបឋម-Play-Off។
ក្រៅពីជំនួបបើក ឆាកជាមួយក្រុម Shan United FC នៅថ្ងៃនេះ គឺព្រះខ័នរាជស្វាយរៀង បន្តជួប៤ប្រកួតទៀត រួមមាន៖ ត្រូវប៉ះជាមួយក្លឹប Nam Dinh FC វៀតណាម នាថ្ងៃទី២៥ ខែកញ្ញា ឆ្នាំ២០២៥, បន្តប៉ះជាមួយក្លឹប Johor Darul Ta’zime FC ម៉ាឡេស៊ី នាថ្ងៃទី០៤ ខែធ្នូ ឆ្នាំ២០២៥, បន្តប៉ះជាមួយក្រុម ក្លឹប Bangkok United FC របស់ថៃ នាថ្ងៃទី២៩ ខែមករា ឆ្នាំ២០២៥ និងចុងក្រោយប៉ះក្លឹប Lion City Sailors FC សិង្ហបុរី នាថ្ងៃទី០៥ ខែកុម្ភៈ ឆ្នាំ២០២៦។
ក្នុងចំណោម៥ប្រកួត ក្នុងពូល B នេះ គឺព្រះខ័នរាជស្វាយរៀង ទទួលធ្វើម្ចាស់ផ្ទះ២ប្រកួត ដែលជាជំនួបជាមួយក្លឹប Johor Darul Ta’zime FC ម៉ាឡេស៊ី និងប៉ះក្លឹប Bangkok United FC របស់ថៃ។ វគ្គសន្សំពិន្ទុ ក្នុងពូលទាំងពីរ គឺក្រុមនីមួយៗប៉ះគ្នា ចំនួន១ជើងប៉ុណ្ណោះ ហើយក្រោយបញ្ចប់ ការប្រកួតក្នុងពូល ២ក្រុម លើកំពូលតារាងនៃពូល A និងពូល B នឹងឡើងទៅ ប្រកួតវគ្គពាក់ កណ្តាលផ្តាច់ព្រ័ត្រ៕ (រូបភាព៖ ព្រះខ័នរាជស្វាយរៀង)
