(ភ្នំពេញ)៖ លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិបានថ្លែងថា គិតមកទល់ពេលនេះ សភាពការណ៍ជួរមុខ ក្នុងខេត្តព្រះវិហារ ខេត្តឧត្តមរមានជ័យ និងខេត្តបន្ទាយជ័យ គឺមានសភាពស្ងប់ស្ងាត់ ជាធម្មតា និងស្ថិតក្រោមការ គ្រប់គ្រងរបស់កងកម្លាំង របស់យើងជាមួយ នឹងស្មារតីប្រុងប្រយ័ត្ន ខ្ពស់ជានិច្ចនៅក្នុងការ បំពេញតួនាទីរបស់ខ្លួន យ៉ាងខ្ជាប់ខ្ជួនបំផុត ដើម្បីការពារបូរណភាពទឹកដី។
ការថ្លែងឱ្យដឹងយ៉ាងដូច្នេះ ពីអ្នកនាំពាក្យក្រសួង ការពារជាតិធ្វើឡើង ក្នុងការធ្វើសេចក្តី សង្ខេបព័ត៌មាន ស្តីពីលទ្ធផលនៃការ អនុវត្តបទឈប់បាញ់ រវាងកម្ពុជា-ថៃ នាព្រឹកថ្ងៃទី២០ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។
លោកជំទាវអ្នកនាំ ពាក្យបានគូសបញ្ជាក់ថា កងកម្លាំងកម្ពុជា គោរពបានយ៉ាងម៉ឺងម៉ាត់ និងអនុវត្តយ៉ាង ខ្ជាប់ខ្ជួននូវបទឈប់ បាញ់ដែលសម្រចបាន កាលពីថ្ងៃទី២៨ ខែកក្កដា ឆ្នាំ២០២៥ រួមទាំងគោលការណ៍ ឯកភាពទាំង១៣ចំណុច នៃកិច្ចប្រជុំវិសាមញ្ញ គណៈកម្មាធិការព្រំដែន ទៅទៅកម្ពុជា-ថៃ កាលពីថ្ងៃទី០៧ ខែសីហា ឆ្នាំ២០២៥។
លោកជំទាវ ឧត្តមសេនីយ៍ឯក ម៉ាលី សុជាតា បានឱ្យដឹងដែរថា នៅព្រឹកថ្ងៃទី២០ ខែសីហា ឆ្នាំ២០២៥នេះ ក្រសួងការពារជាតិ នៃព្រះរាជាណាចក្រ កម្ពុជាបានសម្រប សម្រួលជូនក្រុមអ្នក សង្កេតការណ៍អន្តរជាតិ (IOT) ដែលមានតំណាង មកពីប្រទេសចំនួន៥ ដឹកនាំដោយ លោកវរសេនីយ៍ឯក NAZLEE BIN ABDUL RAHIM អនុព័ន្ធយោធាម៉ាឡេស៊ី ប្រចាំកម្ពុជាបានចេញ ដំណើរពីក្រសួងការពារជាតិ កម្ពុជាឆ្ពោះទៅខេត្តព្រះវិហារ ដើម្បីសង្កេតការណ៍ផ្ទៀងផ្ទាត់ និងរាយការណ៍អំពី ស្ថានភាពក្រោយបទ ឈប់បាញ់ដែលបាន ចូលជាធរមាន៕
