(ភ្នំពេញ)៖ កម្មវិធី “ស្លាបសន្តិភាព” គឺជាការសម្ដែងសិល្បៈ សន្តិភាព កម្ពុជា-ចិន ដែលសហការរៀបចំ ឡើងដោយមជ្ឈមណ្ឌល កម្មវិធីភាសាតំបន់ អាស៊ីនិងអាហ្វ្រិក នៃអគ្គស្ថានីយវិទ្យុ និងទូរទស្សន៍មជ្ឈិមចិន (CMG) និង សមាគមមិត្តភាព កម្ពុជា-ចិន នារាត្រីថ្ងៃទី១៨ ខែសីហា ឆ្នាំ២០២៥ នៅរាជធានីភ្នំពេញ ។ ឯកឧត្តម ឯក សំអុល ឧត្តមប្រឹក្សាផ្ទាល់ ព្រះមហាក្សត្រ នៃព្រះរាជាណាចក្រកម្ពុជា និងជាប្រធានសមាគម មិត្តភាពកម្ពុជា-ចិន និង ឯកឧត្ដម ហួត ហាក់ រដ្ឋមន្ត្រីក្រសួង ទេសចរណ៍កម្ពុជា បានអញ្ជើញចូលរួម ជាគណៈអធិបតីក្នុងកម្មវិធីនេះ ។
កម្មវិធីនេះក៏បាន ទាក់ទាញមន្ត្រីរាជការ អ្នកតំណាង ប្រព័ន្ធផ្សព្វផ្សាយ សិស្សនិស្សិត លោកគ្រូ អ្នកគ្រូសាស្ត្រាចារ្យ មកពីសាលាចិន វិទ្យាស្ថានខុងជឺ និងសមាជិក សភាពាណិជ្ជកម្មចិន រួមទាំងភ្ញៀវជាតិ និងអន្តរជាតិ មកពីគ្រប់ មជ្ឈដ្ឋានកម្ពុជា និង ចិន សរុបជាង ២០០នាក់ ឱ្យរួម គ្នាអបអរ កម្មវិធីវប្បធម៌ដ៏ អស្ចារ្យនេះផងដែរ។
សម្រាប់ឆ្នាំនេះ គឺជាខួបលើកទី ៨០ នៃជ័យជម្នះសង្គ្រាម ប្រឆាំងហ្វាស៊ីស និយមពិភពលោក ក៏ដូចជាខួបលើកទី ៦៧ នៃការបង្កើតទំនាក់ ទំនងការទូត កម្ពុជា-ចិន និង “ឆ្នាំទេសចរណ៍កម្ពុជា-ចិន” ផងដែរ ។ ភាគីទាំងពីរ បានប្រើប្រាស់ទម្រង់ នៃ ការសម្តែងសិល្បៈ និងវប្បធម៌ ដើម្បីបង្ហាញពី ទស្សនៈសន្តិភាព ពង្រឹងចំណងមិត្តភាព រវាងប្រជាជនទាំងពីរ និងបន្តពង្រឹង មូលដ្ឋានគ្រឹះ នៃសាធារណៈមតិ សម្រាប់សហគមន៍វាសនារួមកម្ពុជា-ចិន។
ឯកឧត្តម ឯក សំអុល ឧត្តមប្រឹក្សាផ្ទាល់ ព្រះមហាក្សត្រ នៃព្រះរាជាណាចក្រកម្ពុជា និងជាប្រធានសមាគម មិត្តភាពកម្ពុជា-ចិនបានថ្លែងថា ឆ្នាំនេះជាខួបលើកទី ៦៧ នៃទំនាក់ទំនងការទូត កម្ពុជា-ចិន ហើយទំនាក់ទំនងរវាង ប្រទេសទាំងពីរ មានភាពរឹងមាំ និង ស្ថិតស្ថេរយូរអង្វែង ហើយ មនោសញ្ចេតនា រវាងប្រជាជនក៏មានភាព ស៊ីជម្រៅ។
ឯកឧត្ដមបាន លើកឡើងថា វប្បធម៌ និង សិល្បៈ គឺជាស្ពានមួយដែល អាចឆ្លងផុតព្រំដែន យើងបានរៀបចំ កម្មវិធីសម្ដែងសិល្បៈនេះ ដើម្បីផ្សព្វផ្សាយ ទស្សនៈសន្តិភាព និងបង្ហាញពីស្មារតី ប្រឆាំងសង្គ្រាម ដែលនេះមិនត្រឹមតែ ជាការរំលឹកដល់ ប្រវត្តិសាស្ត្រប៉ុណ្ណោះទេ ថែមទាំងជាការបន្ត និងពង្រឹងមិត្តភាពដ៏ ជ្រាលជ្រៅរវាងប្រទេស ទាំងពីរព្រមទាំងជាសេចក្តី ប្រកាសដ៏ម៉ឹងម៉ាត់អំពី តម្លៃសន្តិភាពដែលប្រជាជន ប្រទេសទាំងពីររួម គ្នាការពារផងដែរ។
ឯកឧត្ដមប្រធាន សមាគមមិត្តភាព កម្ពុជា-ចិន បានកត់សម្គាល់ឃើញថា ឆ្នាំនេះជាខួបលើកទី៦៧ នៃទំនាក់ទំនងការទូត កម្ពុជា-ចិន ដែល ក្នុងឆ្នាំពិសេសនេះ យើងបានរៀបចំកម្មវិធី សិល្បៈសន្តិភាព កម្ពុជា-ចិន ដែលមានចំណងជើងថា “ស្លាបសន្តិ ភាព” ដើម្បីបញ្ជាបជំនឿលើសន្តិភាព និងលើកកំពស់ស្មារតី ប្រឆាំងសង្គ្រាមតាមរយៈ សិល្បៈ។
ឯកឧត្ដមអះអាងថា នេះមិនត្រឹមតែជាការ រំលឹកដល់ប្រវត្តិសាស្ត្រ ប៉ុណ្ណោះទេ ថែមទាំងជាការបន្ត និងពង្រឹងមិត្តភាពជ្រាល ជ្រៅរវាងកម្ពុជា និងចិន ព្រមទាំងជាសេចក្តី ប្រកាសដ៏ឱឡារិក នៃប្រជាជនប្រទេស ទាំងពីរក្នុងការប្តេជ្ញា ចិនត្តរួមគ្នាការពារ តម្លៃសន្តិភាពផងដែរ។
ឯកឧត្ដមបានឱ្យដឹងទៀតថា កម្ពុជា និងចិន គឺជាមិត្តល្អ ដៃគូល្អ និងជាបងប្អូនដ៏ជិតស្និទ្ធ ហើយក្នុងរយៈពេល៦៧ឆ្នាំ កន្លងមក ទំនាក់ទំនងរវាង ប្រទេសទាំងពីរ បានរឹងមាំឡើង ការសហការទទួល បានលទ្ធ ផលផ្លែផ្កា និងអារម្មណ៍ រាប់អានរវាងប្រជាជន កាន់តែស្និទ្ធស្នាល។
ឯកឧត្ដម ឯក សំអុល បានលើកឡើងផងដែរថា ក្នុងនាមជាសមាគម មិត្តភាពកម្ពុជា-ចិន យើងតែងតែយក ការជំរុញការទំនាក់ទំនង ទំនុកចិត្តគ្នារវាង ប្រជាជនប្រទេសទាំងពីរ និងប្រឹងប្រែងស្ថាបនា ស្ពានមិត្តភាព និងស្ពានកិច្ចស ហប្រតិបត្តិការ ជាទំនួលខុស ត្រូវរបស់ខ្លួន។ លើសពីនេះទៀត វប្បធម៌ និងសិល្បៈ គឺជាសម្ព័ន្ធដែលអាចឆ្លងព្រំដែន និង ភាសា ធ្វើឱ្យចិត្តគំនិត របស់ប្រជាជនទាំង ពីរកាន់តែជិតស្និទ្ធនឹងគ្នា។ ឯកឧត្ដមបានបន្ថែមថា កម្មវិធីសិល្បៈយប់នេះ មិនត្រឹមតែជា សំឡេងរួមគ្នារបស់ ប្រជាជនទាំងពីរដើម្បី សន្តិភាពប៉ុណ្ណោះទេ ថែមទាំងជាសេចក្តី ប្រាថ្នាដ៏ស្មោះត្រង់ របស់យុវជនចំពោះ អនាគតដ៏ស្រស់បំព្រង និងរុងរឿង។
ជាមួយគ្នានេះ ឯកឧត្ដម ហួត ហាក់ រដ្ឋមន្រ្ដីក្រសួង ទេសចរណ៍បានបញ្ជាក់ថា ព្រឹត្តិការណ៍នារាត្រី ដ៏សែនមនោរម្យនេះ បានឆ្លុះបញ្ចាំងឱ្យឃើញ នូវការយកចិត្តទុកដាក់ ខ្ពស់របស់ប្រមុខ រដ្ឋាភិបាលប្រទេស កម្ពុជា និងចិន ពិសេសតាមរយៈ កិច្ចសហការដ៏ល្អ និងការសម្រប សម្រួលរបស់ស្ថានទូត នៃសាធារណរដ្ឋ ប្រជាមានិតចិន ប្រចាំកម្ពុជា និងសមាគម មិត្តភាពកម្ពុជា-ចិន ក្នុងការពង្រឹង និងពង្រីកចំណង មិត្តភាពកម្ពុជា-ចិន ស្របតាមស្មារតី មិត្តដែកថែប និងសហគមន៍ វាសនារួមកម្ពុជា-ចិន ប្រកបដោយ ភាពស៊ីជម្រៅ និងភាពជាក់ស្ដែង និងជាការរួមចំណែក យ៉ាងសកម្មដល់ការ អនុវត្តយុទ្ធសាស្ត្រខ្សែក្រវាត់ និងផ្លូវ ផងដែរ។
ឯកឧត្ដមរដ្ឋមន្រ្ដី បានលើកឡើងថា ព្រឹត្តិការណ៍នេះ ក៏ចូលរួមគាំទ្រ ដល់យុទ្ធនាការ «ឆ្នាំទេសចរណ៍ កម្ពុជា-ចិន ២០២៥» ដែលត្រូវបាន ប្រកាសបើកជាផ្លូវការ កាលពីថ្ងៃទី២៣ ខែឧសភា ឆ្នាំ២០២៥ នៅរាជធានីភ្នំពេញ ដោយមានការចូល រួមជាអធិបតីពី ឯកឧត្តម វង្ស៊ី វិស្សុត ឧបនាយករដ្ឋមន្ត្រី ប្រចាំការ រដ្ឋមន្ត្រីទីស្តី ការគណៈរដ្ឋមន្ត្រី និង ឯកឧត្តម ហ្ស៊ី ឃុនលីន អភិបាលខេត្តជាំងស៊ូ។
ឯកឧត្ដមរដ្ឋមន្រ្ដី ក៏បានជម្រាបជូន ផងដែរថា យុទ្ធនាការ «ឆ្នាំទេសចរណ៍ កម្ពុជា-ចិន ២០២៥» គឺជាលទ្ធផល ប្រវត្តិសាស្រ្ត នៃដំណើរទស្សនកិច្ច ផ្លូវរដ្ឋរបស់ឯកឧត្តម ស៊ី ជីនពីង ប្រធានាធិបតីនៃ សាធារណរដ្ឋ ប្រជាមានិតចិន មកកាន់ព្រះរាជា ណាចក្រកម្ពុជា កាលពីថ្ងៃទី១៧-១៨ ខែមេសា ឆ្នាំ២០២៥ ដោយថ្នាក់ ដឹកនាំប្រទេសទាំងពីរ បានកំណត់យកឆ្នាំ២០២៥ ជា «ឆ្នាំទេសចរណ៍កម្ពុជា-ចិន» បន្តពីឆ្នាំ២០២៤ ដែលត្រូវបានកំណត់ជា «ឆ្នាំនៃការផ្លាស់ប្តូរ រវាងប្រជាជន និងប្រជាជន កម្ពុជា-ចិន»។
ឯកឧត្ដម ហួត ហាក់ រដ្ឋមន្ត្រីក្រសួង ទេសចរណ៍ឱ្យដឹង ផងដែរថា សន្តិភាពគឺជាមូលដ្ឋានគ្រឹះ សម្រាប់ការអភិវឌ្ឍវិស័យ ទេសចរណ៍ ។ ប្រជាជនកម្ពុជាស្រឡាញ់ និង ការពារសន្តិភាព និងឱ្យតម្លៃ កាលានុវត្តភាព អភិវឌ្ឍន៍ ដែលនាំមក ដោយសន្តិភាព ។
ឯកឧត្ដមរដ្ឋមន្រ្ដី បានគូសបញ្ជាក់ថា ប្រទេសកម្ពុជា គឺជាគោលដៅ ទេសចរណ៍អន្តរជាតិមួយ ដែលប្រកបដោយសុវត្ថិភាព មេត្រីភាព និង មានភាពទាក់ទាញ ហើយប្រទេសកម្ពុជាត្រដាង “ស្លាប សន្តិភាព ” អញ្ជើញ មិត្តភក្តិ ចិន កាន់តែច្រើន មកទស្សនា ប្រទេសកម្ពុជា ដើម្បីស្វែងយល់ ពីភាពស្រស់ស្អាត នៃវប្បធម៌ខ្មែរ។
ឯកឧត្ដមរដ្ឋមន្រ្ដីបានថ្លែងឱ្យដឹងទៀតថា ជាការពិត, សុខសន្តិភាព ធានាបាននូវការ អភិវឌ្ឍវិស័យទេស ចរណ៍កម្ពុជាជាបន្តបន្ទាប់ ដែលសម្តេចអគ្គ មហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធាន ព្រឹទ្ធសភានៃ ព្រះរាជាណាចក្រកម្ពុជា ដែលជាអគ្គមគ្គុទេសក៍ឯក និងប្រតិបត្តិករឆ្នើមនៃគោលនយោបាយឈ្នះ-ឈ្នះ, បានចាត់ទុកជា «មាសបៃតង» របស់កម្ពុជា។
ជាមួយគ្នានេះ, រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំដ៏ឈ្លាសវៃ ប្រកបដោយថាមពលរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា កម្ពុជាបន្តរក្សាបាននូវសុខសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សង្គម និងការអភិវឌ្ឍលើគ្រប់វិស័យ។
ឯកឧត្ដមរដ្ឋមន្រ្ដី ក្រសួងទេសចរណ៍ក៏ បានសង្កត់ធ្ងន់ថា ក្នុងន័យនេះ រាជរដ្ឋាភិបាល បន្តចាត់ទុក វិស័យ ទេសចរណ៍ ជាវិស័យអាទិភាពដោយ «បន្តលើកកម្ពស់ វិស័យទេសចរណ៍ តាមរយៈការអភិវឌ្ឍ ទេសចរណ៍វប្បធម៌ និងទេសចរណ៍ធម្មជាតិ ដោយបន្ថែម ទេសចរណ៍បៃតង ស្អាត និងវៃឆ្លាត ការបង្កើតផលិតផល ទេសចរណ៍ថ្មីៗ ដែលមានតម្លៃបន្ថែមខ្ពស់ និងទេសចរណ៍ធុរកិច្ច តាមរយៈការលើក កម្ពស់ការអនុវត្ត គោលនយោបាយ និងផែនការមេ សម្រាប់អភិវឌ្ឍវិស័យ ទេសចរណ៍កម្ពុជា»។
ឯកឧត្ដមរដ្ឋមន្រ្ដីក្រសួង ទេសចរណ៍បាន បញ្ជាក់បន្ថែមថា ក្នុងនាមរដ្ឋមន្ត្រីក្រសួង ទេសចរណ៍នៃ ព្រះរាជាណាចក្រកម្ពុជា និងប្រជាជនកម្ពុជា ឯកឧត្ដមសូមស្វាគមន៍ មិត្តចិនទាំងអស់ដោយកក់ក្ដៅ និងស្មោះស្ម័គ្របំផុត ហើយរង់ចាំភ្ញៀវទេសចរចិន ដែលក្នុងចិត្តពោរពេញ ដោយក្តីស្រឡាញ់សន្តិភាព ប្រាថ្នាចង់បានមិត្តភាព និងចង់ស្វែងយល់ ពីវប្បធម៌សម្បូរបែប កាន់តែច្រើន។
ឯកឧត្ដមរដ្ឋមន្រ្ដីក៏សូមបើក «ស្លាបសន្តិភាព» ហោះហើរមកទស្សនាកម្ពុជា និងទទួលយកបទ ពិសោធន៍ពីភាពអច្ឆិរយ និងភាពស្រស់ស្អាត ដែលប្រទេសកម្ពុជា និងប្រជាជនកម្ពុជាផ្តល់ជូន។
ក្នុងឱកាសនោះ ឯកឧត្ដម ហួត ហាក់ រដ្ឋមន្រ្ដីក្រសួង ទេសចរណ៍ជឿជាក់ថា រាល់ដំណើរទស្សនកិច្ច របស់មិត្តចិន គឺជាការបង្ហាញយ៉ាង រស់រវើកនៃមិត្តភាព កម្ពុជា-ចិន និងការជំរុញដ៏ខ្លាំងក្លាដល់ «ស្លាបសន្តិភាព»៕
