(ភ្នំពេញ)៖ ឯកឧត្ដម ហួត ហាក់ រដ្ឋមន្រ្ដីក្រសួងទេសចរណ៍ បានគូសបញ្ជាក់ថា សម្រាប់រយៈពេល ៧ខែ ដើមឆ្នាំ២០២៥នេះ កម្ពុជាទទួលបានភ្ញៀវ ទេសចរអន្តរជាតិប្រមាណ ៣,៧១ លាននាក់ ក្នុងនោះ ភ្ញៀវទេសចរចិន មានចំនួនជិត ៦៩ ម៉ឺននាក់ កើនឡើង ៤៨,២%។ ការគូសបញ្ជាក់របស់ ឯកឧត្ដមរដ្ឋមន្រ្ដីបែបនេះ ក្នុងកម្មវិធី “ស្លាបសន្តិភាព” ការសម្ដែងសិល្បៈ សន្តិភាពកម្ពុជា-ចិន ដែលសហការរៀបចំ ឡើងដោយមជ្ឈមណ្ឌល កម្មវិធីភាសាតំបន់ អាស៊ីនិងអាហ្វ្រិក នៃអគ្គស្ថានីយវិទ្យុ និងទូរទស្សន៍មជ្ឈិមចិន (CMG) និង សមាគម មិត្តភាពកម្ពុជា-ចិន នារសៀលថ្ងៃទី១៨ ខែសីហា ឆ្នាំ២០២៥ នៅរាជធានីភ្នំពេញ ។
ឯកឧត្ដម ហួត ហាក់ បានមានប្រសាសន៍ថា វិស័យទេសចរណ៍ បានរួមចំណែកយ៉ាង សំខាន់ដល់ការអភិវឌ្ឍ សេដ្ឋកិច្ច-សង្គម ជាពិសេសលំហូរ ចូលយ៉ាងច្រើននៃភ្ញៀវ ទេសចរចិនមកកម្ពុជា នៅមុនវិបត្តិជំងឺកូវីដ-១៩ មានចំនួនប្រមាណ ២,៤ លាននាក់ នៅឆ្នាំ២០១៩។ កាលពីឆ្នាំ២០២៤ កន្លងទៅ កម្ពុជាទទួលបាន ភ្ញៀវទេសចរអន្តរជាតិ សរុបប្រមាណ ៦,៧ លាននាក់ កើនឡើងប្រមាណ ២៣% ធៀបនឹងឆ្នាំ២០២៣ ក្នុងនោះ ភ្ញៀវទេសចរចិន មានចំនួនប្រមាណ ៨៥ ម៉ឺននាក់ កើនឡើង ៥៥% ។
ឯកឧត្ដមរដ្ឋមន្រ្ដី សង្ឃឹមយ៉ាងមុតមាំថា តាមនិន្នាការនេះ ការកំណត់យកឆ្នាំ២០២៥ ជា «ឆ្នាំទេសចរណ៍ កម្ពុជា-ចិន» នឹងក្លាយជាចលករ យ៉ាងសំខាន់ ក្នុងការជំរុញកំណើន ភ្ញៀវទេសចរចិនមក ទស្សនាកម្ពុជា បង្កើន ការវិនិយោគក្នុង វិស័យទេសចរណ៍ និងការផ្លាស់ប្តូរវប្បធម៌ រវាងប្រទេសទាំងពីរ សំដៅរួមចំណែក ដល់ការសម្រេច បំណងប្រាថ្នាក្នុង ការកសាងសហគមន៍ ជោគវាសនារួម កម្ពុជា-ចិន។
ឯកឧត្ដមរដ្ឋមន្រ្ដី បានលើកឡើងថា យោងនិន្នាការ នៃស្ថិតិខាងលើ អនាគតនៃវិស័យ ទេសចរណ៍កម្ពុជា គឺមិនអាចកាត់ផ្តាច់ ពីការស្រូបទាញកំណើន នៃលំហូរទេសចរ និងវិនិយោគិន ចិនបានឡើយ។ ឯកឧត្ដមរដ្ឋម ន្រ្ដីបញ្ជាក់ថា៖ «សម្រាប់កម្ពុជា យើងបានត្រៀម លក្ខណសម្បត្តិគ្រប់គ្រាន់ ក្នុងការទទួលស្វាគមន៍ ភ្ញៀវទេសចរ និងវិនិយោគិនចិន តាមរយៈការសម្រួល បរិយាកាសទទួល បដិសណ្ឋារកិច្ច ភ្ញៀវទេសចរ និងវិនិយោគិន ចិននៅកម្ពុជា»។
បើតាមឯកឧត្ដមរដ្ឋមន្រ្ដី ក្រសួងទេសចរណ៍ ដើម្បីជំរុញលំហូរ ភ្ញៀវទេសចរ រវាងកម្ពុជា-ចិន ពិសេសតាមរយៈ យុទ្ធនាការ «ឆ្នាំនៃការផ្លាស់ប្តូរ ប្រជាជននិងប្រជាជន កម្ពុជា-ចិន» ដែលយើងបាន អនុវត្តន៍រួមគ្នា ពេញមួយឆ្នាំ២០២៤ កន្លងមក ក្រសួងទេសចរណ៍ បានសហការជាមួយមិត្តចិន បានរៀបចំឱ្យមាន ព្រឹត្តិការណ៍ និងកម្មវិធីដ៏សម្បូរបែប ច្នៃប្រឌិត មានភាពទាក់ទាញ និងរស់រវើក ដែលរួមមាន៖ ព្រឹត្តិការណ៍វប្បធម៌ ផ្សារភ្ជាប់ទេសចរណ៍, ព្រឹត្តិការណ៍ពិព័រណ៌, ព្រមជាមួយការរៀបចំ និងចូលរួមកម្ម វិធីមួយចំនួនទៀត ទាំងនៅប្រទេសកម្ពុជា និងនៅប្រទេសចិន។
ឯកឧត្ដមរដ្ឋមន្រ្ដីបានបន្ដថា សម្រាប់ឆ្នាំ២០២៥នេះ យើងក៏នឹងបន្តកិច្ច សហប្រតិបត្តិការ យ៉ាងស្អិតរមួត ដូចនេះទៀត ក្នុងរយៈពេល មួយឆ្នាំពេញ គិតចាប់ពីការ ប្រកាសបើកជាផ្លូវការ «ឆ្នាំទេសចរណ៍ កម្ពុជា-ចិន» កាលពីខែឧសភា ឆ្នាំ២០២៥ រហូតដល់ខែឧសភា ឆ្នាំ២០២៦ និងបន្តទៅឆ្នាំ បន្តបន្ទាប់ទៀត ខាងមុខ។
ជាមួយគ្នានេះ ដែរឯកឧត្ដម ហួត ហាក់ រដ្ឋមន្រ្ដីក្រសួងទេសចរណ៍ ជឿជាក់យ៉ាងមុតមាំថា តាមរយៈការ រៀបចំកម្មវិធី ការសម្តែងសិល្បៈរួមគ្នា កម្ពុជា-ចិន ក្រោមប្រធានបទ «ស្លាបនៃសន្តិភាព» រួមចិត្ត រួមដៃ វាសនារួម នាពេលនេះ នឹងមិនត្រឹមតែចូល រួមដល់ការពង្រឹង ចំណងមិត្តភាព និងការផ្លាស់ប្តូរ វប្បធម៌គ្នាទៅ វិញទៅមករវាង កម្ពុជា-ចិន ប៉ុណ្ណោះទេ ប៉ុន្តែនឹងជួយលើក កម្ពស់កិច្ចសហ ប្រតិបត្តិការលើ វិស័យទេសចរណ៍ និងវប្បធម៌ តាមរយៈការបង្ហាញ ពីសក្តានុពលទេសចរណ៍ សិល្បៈ និងវប្បធម៌ដ៏សម្បូរ បែប ការពង្រីក ការផ្សព្វផ្សាយពី សក្តានុពលទាំងនេះ ឱ្យកាន់តែទូលំទូលាយ ទៅកាន់ប្រជាជន នៃប្រទេសទាំងពីរ ក៏ដូចជាទៅកាន់ ប្រជាជននៅទូទាំង ពិភពលោក។ទន្ទឹមនេះ ឯកឧត្ដមរដ្ឋមន្រ្ដីចាត់ ទុកប្រធានបទ «ស្លាបនៃសន្តិភាព» នារាត្រីនេះ ក៏បានរម្លឹកអំពីគុណតម្លៃនៃ «សន្តិភាព» ដែលជាកត្តាដែល មិនអាចខ្វះបាន នៃការរីកចម្រើន របស់ប្រជាជាតិនីមួយៗ៕
