(ភ្នំពេញ)៖ គណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន (គណៈកម្មការទី៤)នៃរដ្ឋសភា ដឹកនាំដោយឯកឧត្តម កែប ជុតិមា ប្រធានគណៈកម្មការ សហការជាមួយគណៈ កម្មការនីតិកម្ម និងយុត្តិធម៌ (គណៈកម្មការទី៦) ឯកឧត្តម អង្គ វង្សវឌ្ឍានា ប្រធានគណៈកម្មការ ព្រមទាំងមានការចូលរួម ពីតំណាងគណៈកម្មការ ជំនាញនានានៃរដ្ឋសភា នៅរសៀលថ្ងៃទី១៨ ខែសីហា ឆ្នាំ២០២៥ បានជួបប្រជុំ ជាមួយតំណាង រាជរដ្ឋាភិបាល ដឹកនាំដោយឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី និងជារដ្ឋមន្ត្រី ក្រសួងមហាផ្ទៃ និងសហការី ដើម្បីពិនិត្យពិភាក្សា លើសេចក្តីព្រាងច្បាប់ស្តីពី “វិសោធនកម្ម ច្បាប់ស្តីពីសញ្ជាតិ” នៅវិមានរដ្ឋសភា។
ឯកឧត្តម កែប ជុតិមា បានជម្រាបជូន ឯកឧត្តមឧបនាយករដ្ឋមន្ត្រី ថា៖ បន្ទាប់ពីបានទទួល ភារកិច្ចពីគណៈ កម្មាធិការអចិន្ត្រៃយ៍ រដ្ឋសភាកាល ពីថ្ងៃទី១៣ខែសីហា ឆ្នាំ២០២៥ គណៈកម្មការទី៤ក៏ បានប្រជុំផ្ទៃក្នុង ហើយបានពិភាក្សា គ្នាដោយមានវត្តមាន ក្រុមប្រឹក្សាអ្នកច្បាប់ ចូលរួមផងដែរ។ បន្ទាប់មកគណៈ កម្មការទី៤ក៏បានទទួល របាយការណ៍ពីគណៈ កម្មការទី៦ដែលជាគណៈ កម្មការសហការនៅ ក្នុងការពិនិត្យសិក្សា សេចក្ដីព្រាងច្បាប់ស្តីពី “វិសោធនកម្មច្បាប់ ស្តីពីសញ្ជាតិ“ នេះ។
ឯកឧត្តមអភិសន្តិបណ្ឌិត ស សុខា បានលើកឡើងអំពី ដំណើរការនិងសាវតា នៃសេចក្តីព្រាងច្បាប់ នេះថានាពេលថ្មីៗនេះ ប្រទេសកម្ពុជា កំពុងស្ថិតក្នុង ស្ថានភាពតានតឹង និងកំពុងប្រឈម នឹងការឈ្លានពាន ទឹកដី ពីសំណាក់រដ្ឋបរទេស បែរជាមាន ប្រជាពលរដ្ឋ ខ្មែរមួយក្តាប់តូច បានធ្វើសកម្មភាព និងកំពុងធ្វើសកម្មភាព នានាដែលនាំឱ្យអន្តរាយ ដល់ខឿនការពារជាតិ សន្តិសុខជាតិ និងអន្តរាយដល់ ផលប្រយោជន៍ស្នូល របស់ព្រះរាជាណាចក្រកម្ពុជា ។
ដោយពិនិត្យឃើញ នូវភាពចាំបាច់ និងផ្អែកតាម មាត្រា១៥៣ថ្មី នៃរដ្ឋធម្មនុញ្ញ សម្តេចមហា បវរធិបតី ហ៊ុន ម៉ាណែត នាយករដ្ឋមន្ត្រី និងសម្តេចមហា រដ្ឋសភាធិការបតី ឃួន សុដារី ប្រធានរដ្ឋសភា ព្រមទាំងតាមសេចក្តី ស្នើសុំពីតំណាងរាស្ត្រ ទាំង១២៥រូប រាជរដ្ឋាភិបាលបាន ផ្តួចផ្តើមធ្វើវិសោធនកម្ម មាត្រា៣៣នៃរដ្ឋធម្មនុញ្ញកម្ពុជា ដែលជាមូលដ្ឋាន គតិយុត្តនិងបើកផ្លូវ ដល់ការធ្វើវិសោធនកម្ម ដោយបន្ថែមឱ្យមានការដក សញ្ជាតិខ្មែរ ចំពោះជនដែលធ្វើ សកម្មភាពនានា ដែលធ្វើឱ្យប៉ះពាល់ ដល់ឧត្តមប្រយោជន៍ជាតិ នាំឱ្យអន្តរាយដល់សន្តិភាព ការឯកភាពជាតិ អធិបតេយ្យភាព បូរណភាពជាតិ និងសន្តិសុខជាតិ ក៏ដូចជាទឹកចិត្ត ស្នេហាជាតិរបស់ ប្រជាពលរដ្ឋខ្មែរ និងជាតិមាតុភូមិកម្ពុជា។
សេចក្តីព្រាងច្បាប់ស្តី ពីវិសោធនកម្មច្បាប់ ស្តីពីសញ្ជាតិ នឹងផ្តល់ប្រយោជន៍ សំខាន់ៗដូចដូចជា ធ្វើឱ្យច្បាប់ស្តីពីសញ្ជាតិ ស្របតាមមាត្រា៣៣ថ្មី នៃរដ្ឋធម្មនុញ្ញនៃ ព្រះរាជាណាចក្រកម្ពុជា ជាឧបករណ៍គតិយុត្ត សំខាន់មួយ ដើម្បីធានាបាន នូវសន្តិភាព ខឿនការពារជាតិ ឯកភាពជាតិអធិបតេយ្យ បូរណភាពទឹកដី សន្តិសុខជាតិ និងឧត្តមប្រយោជន៍ ជាតិជាក្របខ័ណ្ឌ គតិយុត្តដ៏រឹងមាំក្នុ ងការទប់ស្កាត់ និងប្រឆាំងការជ្រៀតជ្រែក ពីខាងក្រៅចូលក្នុងកិច្ចការ ផ្ទៃក្នុងរបស់កម្ពុជា ជាពិសេសការប្រឆាំង នឹងអំពើក្បត់ជាតិនិង អំពើឃុបឃិតជាមួយរដ្ឋបរទេស ឬភ្នាក់ងារបរទេស ពង្រឹងនូវការអនុវត្ត កាតព្វកិច្ចជាប្រជាពលរដ្ឋ ខ្មែរស្របតាមមាត្រា៤៩ថ្មី នៃរដ្ឋធម្មនុញ្ញនៃ ព្រះរាជាណាចក្រកម្ពុជា ពង្រឹងការអនុវត្តនៃ ការទទួលបានសញ្ជាតិខ្មែរ ស្របតាមនីតិវិធីនៃច្បាប់នេះ ពង្រឹងភាពស្មោះ ត្រង់ចំពោះជាតិ មនសិកាស្នេហាជាតិ និងឧត្តមប្រយោជន៍ជាតិ។ ការដកសញ្ជាតិខ្មែរ គឺជាការកាត់ផ្តាច់ ចំណងគតិយុត្តនិង នយោបាយចំពោះជន ដែលក្បត់ជាតិតែប៉ុណ្ណោះ។
ឯកឧត្តម កែប ជុតិមា ប្រធានគណៈកម្មការទី៤ នៃរដ្ឋសភា បានបញ្ជាក់ថា សេចក្តីព្រាងច្បាប់នេះ នឹងក្លាយទៅជាឧបករណ៍ គតិយុត្តដែលមានលក្ខណៈ ពេញលេញនិងគ្រប់ ជ្រុងជ្រោយដ៏រឹងមាំក្នុង ការទប់ស្កាត់ការ ប្រឆាំងនឹងការជ្រៀតជ្រែក ចូលកិច្ចការផ្ទៃក្នុង របស់កម្ពុជា ជាពិសេសការប្រឆាំង នឹងអំពើក្បត់ជាតិ និងអំពើឃុបឃិត ជាមួយរដ្ឋបរទេស ឬភ្នាក់ងារបរទេស ដែលធ្វើឱ្យប៉ះពាល់ធ្ងន់ធ្ងរ ដល់ប្រទេសជាតិ សេចក្តីសុខសាន្ត របស់ប្រជាជននិង ឧត្តមប្រយោជន៍ របស់ប្រទេសជាតិ ។
ឯកឧត្តមបានបញ្ជាក់ថា « សេចក្តីព្រាងច្បាប់នេះ មិនបង្កផលប៉ះពាល់ ដល់វិស័យសេដ្ឋកិច្ច សង្គមកិច្ច វប្បធម៌ និងមិនប៉ះពាល់ដល់សិទ្ធិ និងផលប្រយោជន៍ របស់ពលរដ្ឋខ្មែរឡើយ»។
ឯកឧត្តម អង្គ វង្សវឌ្ឍនា ប្រធានគណៈកម្មការទី៦ បានកោតសរសើរ និងវាយតម្លៃខ្ពស់ទៅ លើសេចក្ដីព្រាងច្បាប់នេះ ដែលជាច្បាប់មួយ មានភាពចាំបាច់ សម្រាប់ប្រទេសជាតិ និងស្របទៅតាម កាលៈទេសៈត្រូវការ របស់ប្រទេសកម្ពុជា។
បន្ទាប់ការពិភាក្សាជា មួយតំណាងរាជរដ្ឋាភិបាល យ៉ាងល្អិតល្អន់ ដោយមានការលើឡើង នូវចម្ងល់ពីគណៈ កម្មការរដ្ឋសភា និងការបកស្រាយ ឆ្លើយបំភ្លឺពីតំណាងរាជ រដ្ឋាភិបាលរួចមក គណៈកម្មការរដ្ឋសភា បានឯកភាពគ្នា បញ្ជូន សេចក្ដីព្រាងច្បាប់ ស្ដីពីវិសោធនកម្មច្បាប់សញ្ជាតិ ទៅគណៈកម្មាធិការ អចិន្រ្តៃយ៍រដ្ឋសភាវិញ ដើម្បីពិនិត្យសម្រេច ដាក់បញ្ចូលក្នុង របៀបវារៈសម័យប្រជុំ រដ្ឋសភានាពេលខាងមុខ។
