(ភ្នំពេញ)៖ ឯកឧត្ដម ហេង រតនា អះអាងថា ថៃដាក់បង្ហាញគ្រាប់មីន PMN-2 ដោយចោទកងទ័ពកម្ពុជាដាក់ក្នុងដីថៃនោះជាគ្រាប់មីនមិនទាន់ដកគន្លឹះសុវត្ថិភាព ដើម្បីបង្កផ្ទុះឡើយ ជាក់ស្ដែងគឺជាគ្រាប់មីនថ្មីទាំងអស់។
ថ្លែងក្នុងសន្និសីទសារព័ត៌មាន ស្ដីពី ជំហរកម្ពុជាក្នុងការ ប្រយុទ្ធប្រឆាំងនឹងគ្រាប់មីន «កម្ពុជាស្រឡាញ់សន្តិភាព» ដែលរៀបចំឡើង ដោយអាជ្ញាធរមីន នៅថ្ងៃទី១៨ ខែសីហា ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃមជ្ឈមណ្ឌលសកម្មភាព កំចាត់មីនកម្ពុជា (CMAC)បានគូសញ្ជាក់ថា គ្រាប់មីនដែលថៃយកមក តាំងបង្ហាញឱ្យ គណៈប្រតិភូចំនួន ៣៣ប្រទេស និងដៃគូមួយចំនួន បានមើលនោះ ភាគច្រើននៅមានសល់គន្លឹះ ដែលនោះជាមីនថ្មី មិនមែនជាគ្រាប់មីន យកចេញពីចម្ការមីននោះទេ។
ឯកឧត្តម បានបញ្ជាក់ទៀតថា គ្រាប់មីនបើសិននៅ ជាប់គន្លឹះដូចនេះ ទោះបីជាដើរជាន់ យ៉ាងណាក៏មិនផ្ទុះនោះដែរ Bហើយបើកងទ័ពគេដាក់មែន គឺគេដកគន្លឹះចេញ ដើម្បីដាក់ឱ្យផ្ទុះហើយ បើដាក់មិនឱ្យផ្ទុះដដែល មិនដឹងជាដាក់ធ្វើអីនោះទេ ដែលនេះគឺនៅក្នុង លក្ខណៈបច្ចេកទេសបាន បញ្ជាក់ច្បាស់ណាស់។
«ខ្ញុំសូមបញ្ជាក់ពីលក្ខណៈ បច្ចេកទេសខ្លះៗ ពាក់ព័ន្ធការផ្ទុះមីននៅតំបន់ ព្រំដែនដែលភាគីថៃ ធ្វើការគឺចោទ ប្រកាន់មកលើកម្ពុជា »។
ឯកឧត្តម ហេង រតនា បន្ថែមថា គ្រាប់មីនប្រភេទ PMN2 នេះ គឺផលិតនៅទសវត្សរ៍ ឆ្នាំ១៩៧០ ហើយប្រភេទគ្រាប់មីននេះ ធ្លាប់បាននាំចូល ក្នុងប្រទេសកម្ពុជា នៅទសវត្សរ៍ឆ្នាំ ១៩៨០ ហើយក្រោយពីប្រទេសកម្ពុជា ទទួលបានសន្តិភាពមក ក៏បានកម្ទេចចេញពី ក្នុងស្តុកអស់តាំងពី ឆ្នាំ១៩៩០មកម្ល៉េះ ហើយក៏មាន អន្តរជាតិបានមកត្រួត ពិនិត្យច្បាស់លាស់ផងដែរ៕
