(ភ្នំពេញ)៖ ឯកឧត្តម លី ធុជ ទេសរដ្ឋមន្ត្រី អនុប្រធានទី១ នៃអាជ្ញាធរមីន បានឲ្យដឹងថា កម្ពុជា គឺជាប្រទេសនាំមុខ គេដែលត្រូវបាន ទទួលស្គាល់ថា «ជាប្រទេសដែលបាន ប្រយុទ្ធប្រឆាំងនឹងមីន» និងទាត់ចោលទាំង ស្រុងចំពោះការលើក ឡើងរបស់ភាគីថៃ ថា «កម្ពុជា ដាក់មីនថ្មី»។
ក្នុងសន្និសីទសារព័ត៌មានស្តីពី «ការចោទប្រកាន់គ្មាន មូលដ្ឋានរបស់ថៃ មកលើកម្ពុជាអំពី ការដាក់មីនថ្មី និងជំហរកម្ពុជាក្នុ ងនាមជារដ្ឋភាគី នៃអនុសញ្ញាហាមប្រាម ការប្រើប្រាស់មីន ប្រឆាំងមនុស្ស (អនុសញ្ញាអូតាវ៉ា)» នៅថ្ងៃទី១៨ ខែសីហា ឯកឧត្តម លី ធុជបានថ្លែងថា កម្ពុជាទាត់ចោល ទាំងស្រុងនូវការលើកឡើង របស់ភាគីថៃដែលចោទ ប្រកាន់កម្ពុជាថា បានប្រើ ប្រាស់មីនថ្មីនៅ តាមបន្ទាត់ព្រំដែន ។
ឯកឧត្តមទេសរដ្ឋមន្ដ្រីបន្ថែមថា តំបន់ដែលទាហានថៃ រងគ្រោះដោយសារ ដើរជាន់មីន គឺជាតំបន់ដែល កម្ពុជាបានចាត់ទុក ជាតំបន់អតីតសមរ ភូមិពីជំនាន់សង្រ្គាមស៊ីវិល ផ្ទៃក្នុងរបស់កម្ពុជា ដោយកាលនោះ បណ្តាក្រុមប្រដាប់ អាវុធឈរជើង នៅតំបន់នោះ បានដាក់មីនយ៉ាងច្រើន។
ឯកឧត្តមបន្តថា កម្ពុជាមិនត្រូវការមីនថ្មី ដើម្បីយកមកសម្លាប់ ប្រជាពលរដ្ឋ បង្កការលំបាកដល់ ប្រជាជននោះទេ ព្រោះកម្ពុជាមានមីន គ្រប់គ្រាន់ហើយ នៅលើទឹកដីរបស់ខ្លួន ។ ឯកឧត្តមសង្កត់ធ្ងន់ថា មីនគឺជាសត្រូវរបស់កម្ពុជា និងប្រជាជនខ្មែរ ដែលគ្រប់គ្នា ស្អប់ខ្ពើមជាទីបំផុត ។
សូមបញ្ជាក់ថា ក្នុងរយៈពេល ៣៣ឆ្នាំមកនេះ មជ្ឈមណ្ឌលសកម្មភាព កម្ចាត់មីនកម្ពុជា (CMAC) បានរកឃើញ និងបំផ្លាញចោល មីនប្រឆាំងមនុស្ស ជាង១លាន២សែនគ្រាប់ , មីនប្រឆាំងរថក្រោះ ជិត៣ម៉ឺនគ្រាប់ និងសំណល់ជាតិផ្ទុះ ពីសម័យសង្គ្រាម ជាង៣លាន២សែនគ្រាប់ ៕
