(ភ្នំពេញ)៖ ឯកឧត្ដមទេសរដ្ឋមន្ដ្រី លី ធុជ អនុប្រធានទី១ អាជ្ញាធរមីនកម្ពុជា បានបដិសេធ និងប្រកាសទាត់ ចោលទាំងស្រុងការចោទ ប្រកាន់របស់ភាគីថៃដែលថា កម្ពុជាបានលួចដាក់មីនថ្មី តាមបន្ទាតព្រំដែន និងស្តុកទុកមីន ដែលការចោទប្រកាន់ របស់ថៃនេះគឺជាការ លើកឡើងដោយគ្មានមូលដ្ឋាន និងមានចរិក ជាលក្ខណៈនយោបាយ ដោយចេតនាបង្កាច់បង្ខូច មកលើកម្ពុជាទាំងស្រុង។
ឯកឧត្ដមទេសរដ្ឋមន្ដ្រី លី ធុជ បានបញ្ជាក់បែបនេះ ក្នុងសន្និសីទសារព័ត៌មាន ដែលមានការចូលរួមពី ឯកឧត្ដម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយក ស៊ីម៉ាក់ នាថ្ងៃទី១៨ ខែសីហា ឆ្នាំ២០២៥ នៅទីស្នាក់ការ អាជ្ញាធរមីនកម្ពុជា។
ឯកឧត្ដម លី ធុជ បានបញ្ជាក់ថា ក្នុងនាមជាប្រជាជាតិ មួយដែលរងគ្រោះ ដោយសារមីន ហើយបានចាត់ទុកមីន គឺជាសត្រូវរបស់ជាតិ និងប្រជាជនខ្មែរ កម្ពុជាសូមទាត់ចោល ការចោទប្រកាន់របស់ ថៃទាំងស្រុង។ កម្ពុជាមានមីនគ្រប់គ្រាន់ ហើយនៅលើទឹកដីរបស់ខ្លួន មិនត្រូវការមីនថ្មីណា មួយទៀតទេ ដើម្បីមកសម្លាប់ប្រជាពលរដ្ឋ បង្កការលំបាកដល់ ប្រជាជនរបស់ខ្លួនទេ។ មីនគឺជាសត្រូវរបស់យើង និងប្រជាជនខ្មែរ ដែលគេស្អប់ខ្ពើម។ នៅលើពិភពលោក កម្ពុជាគឺជាប្រទេសនាំមុនគេ ដែលបានទទួលស្គាល់ថា ជាប្រទេសដែលបាន ប្រយុទ្ធប្រឆាំងនឹងមីន និងបានចូលរួមជា មួយប្រទេសដទៃទៀត ក្នុងការទប់ស្កាត់ ការប្រើប្រាស់មីន។
តំបន់ដែលទាហានថៃ រងគ្រោះដោយសារ ដើរជាន់មីនគឺជាតំបន់ ដែលកម្ពុជាបានចាត់ទុកជា តំបន់អតីតសមរភូមិ ពីជំនាន់សង្រ្គាមស៊ីវិល ផ្ទៃក្នុងរបស់កម្ពុជា ដោយកាលនោះ បណ្តាក្រុមប្រដាប់អាវុធ ឈរជើងនៅតំបន់នោះ បានដាក់មីនយ៉ាងច្រើន។ វត្តមានគ្រាប់មីនដ៏ច្រើននេះ បានបង្កគ្រោះថ្នាក់ដល់ ជនស៊ីវិលកម្ពុជា ហើយអ្នកណាក៏ដោយ ដែលមកតំបន់នេះ ក៏នឹងត្រូវរងគ្រោះថ្នាក់ដូច្នេះ។
ឯកឧត្ដម លី ធុជ បានសម្តែងការ សោកស្តាយដែលថៃ បានយកបញ្ហាមីន មកបង្កឱ្យមានការ ឈ្លានពាន ប្រដាប់អាវុធមកលើកម្ពុជា បំពានមកលើធិបតេយ្យកម្ពុជា ដែលជាប្រទេស ភូមិផងរបងជាប់គ្នា កាន់ព្រះពុទ្ធសាសនាដូចគ្នា ព្រមទាំងមានរបររកស៊ី និងរាប់អានគ្នា។
នៅតាមព្រំដែន គឺជាតំបន់នៅសេសសល់ មីនដែលកម្ពុជាត្រូវបន្ត បោសសម្អាតមីនបន្ថែមទៀត ខណៈកន្លងមក អាជ្ញាធរមីនបានសហការ ជាមួយស៊ីម៉ាក់ អនុវត្តគម្រោងបោសសម្អាតមីន ដែលមានការគាំទ្រ ពីប្រទេសអូស្រ្តាលី ញូវហ្សេលែន កូរ៉េ និងអង្គការ UNDP ចូលរួមលើកនូវផ្លាកសញ្ញា ហាមឃាត់ ព្រោះជាតំបន់មានមីនច្រើន និងគ្រោះថ្នាក់ ជាច្រើនឆ្នាំមកហើយ ដើម្បីឱ្យប្រជាពលប្រុងប្រយ័ត្ន និងកុំដើរចូលក្នុងតំបន់នេះ។
សូមបញ្ជាក់ថា ក្នុងរយៈពេល៣៣ឆ្នាំ មកនេះមជ្ឈមណ្ឌល សកម្មភាពកម្ចាត់មីនកម្ពុជា (CMAC) បានរកឃើញ និងបំផ្លាញចោលមីន ប្រឆាំងមនុស្សចំនួន ១ ២០៣ ៦២៣គ្រាប់ មីនប្រឆាំងរថក្រោះចំនួន ២៦ ៦៩២គ្រាប់ និងសំណល់ជាតិផ្ទុះ ពីសង្គ្រាមចំនួន ៣ ២២២ ៥៤៩គ្រាប់។
ដោយឡែកនៅក្នុងឆ្នាំ២០២៥ គិតត្រឹមខែកក្កដា ផ្ទៃដីចំនួន១៤១គីឡូម៉ែត្រការ៉េ ត្រូវបានបោស សម្អាតរួច ក្នុងនោះ បានរកឃើញ និងបំផ្លាញចោលមីន ប្រឆាំងមនុស្ស ចំនួន៦៤០៥ គ្រាប់មីនប្រឆាំង រថក្រោះចំនួន១២៥គ្រាប់ និងសំណល់ជាតិផ្ទុះ ពីសង្គ្រាមចំនួន២៥៨៤៥គ្រាប់ ចំនួនជនរងគ្រោះ បានថយចុះពី៤៣២០នាក់ ក្នុងឆ្នាំ១៩៩៦មកត្រឹម៤៩នាក់ ក្នុងឆ្នាំ២០២៤៕
