(ព្រៃវែង)៖ នៅព្រឹកថ្ងៃទី ១១ ខែសីហា ឆ្នាំ២០២៥ រដ្ឋបាលខេត្ត មន្ទីរព័ត៌មានខេត្តព្រៃវែង បានរៀបចំយុទ្ធនាការ “និយាយថាទេចំពោះ ព័ត៌មានក្លែងក្លាយ ក្នុងគោល បំណងកាត់បន្ថយ ឱ្យមកនៅកម្រិតអប្បបរិមា នូវព័ត៌មានក្លែងក្លាយ ពីលំហព័ត៌មាន ក្នុងសង្គមកម្ពុជា សំដៅ ធានាសន្តិសុខព័ត៌មាន គឺការទទួលព័ត៌មាន ប្រកបដោយគុណភាព និងសុវត្ថិភាពសម្រាប់ ប្រជាពលរដ្ឋ ដែលពិធីនេះ ស្ថិតក្រោមអធិបតី ឯកឧត្ដម ម៉ែន សាម៉ន អនុរដ្ឋលេខាធិការ ក្រសួងព័ត៌មាន ទទួលបន្ទុកមន្ទីរ ព័ត៌មានខេត្តព្រៃវែង និងលោក អន ភារៈ អភិបាលរងខេត្តព្រៃវែង ព្រមទាំងមានការអញ្ជើញ អភិបាលក្រុងស្រុកទាំង១៣ មន្ទីរអង្គភាព កងកម្លាំងទាំបី សិស្សានុសិស្ស ប្រមាណជាង ៣០០ នាក់។
លោក ញ៉ែម សៅគ្រី ប្រធានមន្ទីរព័ត៌មាន ខេត្តព្រៃវែង បានលើកឡើងថា យុទ្ធនាការ “និយាយថាទេចំពោះ ព័ត៌មានក្លែងក្លាយ សម្រាប់បញ្ជ្រាបការយល់ដឹង ឱ្យដល់ពលរដ្ឋក្នុង សហគមន៍មូលដ្ឋាន ដើម្បីចូលរួមប្រឆាំង ព័ត៌មានក្លែងក្លាយ។ ក្នុងន័យនេះ មន្ទីរព័ត៌មានដើរ តួនាទីស្នូលក្នុងការរៀបចំ និងសម្របសម្រួលការ អនុវត្តជាមួយ ថ្នាក់ដឹកនាំ អាជ្ញាធរ និងអ្នកពាក់ព័ន្ធទាំងអស់ ដើម្បីធ្វើឱ្យយុទ្ធនាការនេះ លេចចេញជារូបរាងឡើង។
លោក ប្រធានមន្ទីរព័ត៌មានបន្តថា យុទ្ធនាការនេះមានសារៈសំខាន់ ទាំងក្នុងក្របខណ្ឌនៃការ ប្រយុទ្ធប្រឆាំងព័ត៌មាន នៅប្រទេសកម្ពុជា និង ក្នុងតំបន់។ យុទ្ធនាការនឹងប្រើវិធីសាស្ត្រ និងទម្រង់រៀបចំ ស្របតាមបរិបទនៃ សង្គមឌីជីថល ក្នុងគោលដៅផ្លាស់ ប្តូរឥរិយាបទរបស់ពលរដ្ឋ ដែលជាអ្នកប្រើប្រាស់បណ្តាញ ទំនាក់ទំនងសង្គម និងប្រព័ន្ធផ្សព្វផ្សាយ ទំនើប ក្នុងការទប់ស្កាត់ការរីក សាយភាយនូវព័ត៌មានក្លែងក្លាយ។
លោក អន ភារៈ អភិបាលរងខេត្តព្រៃវែង មានប្រសាសន៍ថា យុទ្ធនាការ “និយាយថាទេចំពោះព័ត៌មានក្លែងក្លាយនេះផ្តល់ឱកាសនិងលើកទឹក ចិត្តឱ្យតួអង្គពាក់ព័ន្ធទាំងអស់ក្នុងសង្គមចូលរួម ដើម្បីទទួលព័ត៌មាន ចំណេះដឹងបន្ថែមអំពីផលវិបាក និង គ្រោះថ្នាក់ ដែលព័ត៌មានក្លែងក្លាយបង្កឡើង។ យុទ្ធនាការនេះលើក កម្ពស់ការយល់ដឹង របស់ប្រជាពលរដ្ឋ និងអ្នកផលិតមាតិកា លើបណ្តាញសង្គម អំពីការកំណត់អត្តសញ្ញាណ ព័ត៌មានក្លែងក្លាយ វិធានការទប់ស្កាត់ ការរីកសាយភាយ និងបន្សាបព័ត៌មានក្លែងក្លាយ និងបំផុសឆន្ទៈ ចូលរួមតាមរយៈការ អនុវត្តវិធានការបង្ការ និងសកម្មភាពនានា ចាំបាច់ក្នុងការធានា សុវត្ថិភាពព័ត៌មានក្នុងសង្គម។
លោក អភិបាលរងខេត្ត មានប្រសាសន៍បន្តថា ការបញ្ជ្រាបការយល់ ដឹងឱ្យដល់ពលរដ្ឋក្នុងសហគមន៍ មូលដ្ឋាន និងពង្រឹង អក្ខរកម្មព័ត៌មាននិងប្រព័ន្ធ ផ្សព្វផ្សាយ ជាកត្តាដ៏សំខាន់មួយ ដើម្បីផ្លាស់ប្តូរឥរិយាបទ របស់ពលរដ្ឋដែលជាអ្នក ប្រើប្រាស់បណ្តាញទំនាក់ទំនង សង្គម និងប្រព័ន្ធផ្សព្វផ្សាយទំនើប ឱ្យមកចូលរួមទប់ស្កាត់ការរីក សាយភាយនូវព័ត៌មានក្លែងក្លាយ។
ឯកឧត្ដម ម៉ែន សាម៉ន អនុរដ្ឋលេខាធិការ ក្រសួងព័ត៌មាន ទទួលបន្ទុកមន្ទីរ ព័ត៌មានខេត្តព្រៃវែង មានប្រសាសន៍ដែរថា គ្រប់ប្រភេទនៃ ព័ត៌មានក្លែងក្លាយ សុទ្ធតែមានឥទ្ធិពល អវិជ្ជមានមកលើ ផ្នែកសន្តិសុខ សណ្តាប់ធ្នាប់ សង្គម សេដ្ឋកិច្ច និងនយោបាយ ពោលគឺព័ត៌មានក្លែងក្លាយ អាចបង្កអស្ថិរភាព បង្កើតអំពើហិង្សា ដែលបណ្តាល ឱ្យកើតមានអរិភាពសង្គម ប្រជាពលរដ្ឋបាត់ ទំនុកចិត្តលើការដឹកនាំ និងនាំឱ្យមានការបែក បាក់សាមគ្គីភាព ក្នុងសង្គម។ គោលដៅរបស់យុទ្ធនាការ គឺកាត់បន្ថយព័ត៌មានក្លែងក្លាយ ឱ្យមកនៅកម្រិតអប្បបរិមា សំដៅធានាសន្តិសុខព័ត៌មាន៖ គឺការទទួលព័ត៌មាន ប្រកបដោយគុណភាព និង សុវត្ថិភាពរបស់ប្រជាពលរដ្ឋ។
ឯកឧត្ដម អនុរដ្ឋលេខាធិការ បន្ថែមទៀតថា ក្នុងបរិបទនៃការរីក ចម្រើនឥតឈប់ឈរ នៃបច្ចេកវិទ្យា ការទទួល និងផ្សព្វ ផ្សាយព័ត៌មានបែបទំនើប តាមប្រព័ន្ធឌីជីថល ជាពិសេសលើបណ្តាញ ទំនាក់ទំនងសង្គម បានកើនឡើងជាលំដាប់ ខណៈគ្រោះថ្នាក់នៃ ព័ត៌មានក្លែងក្លាយដែល ចរាចរតាមមធ្យោបាយ ទំនើបទាំងនេះ រឹតតែមានលក្ខណៈ ស្រួចស្រាល់ឡើង។ ទាំងអស់នេះទាមទារឱ្យ ពលរដ្ឋដែលជាអ្នកប្រើប្រាស់ ផលិត ឬចែកចាយ ព័ត៌មាន ស្វែងយល់ដឹង ឲ្យបានច្បាស់អំពីផល វិបាកនៃព័ត៌មានក្លែងក្លាយ ហើយចេះបង្កើនការ ប្រុងប្រយ័ត្នក្នុងការប្រើប្រាស់ ប្រកបដោយ ការទទួលខុសត្រូវ ពិសេសមុនចែកចាយ ព័ត៌មានណាមួយ ត្រូវផ្ទៀងផ្ទាត់ព័ត៌មាន ទាំងនោះជាមុនសិន៕
