(ភ្នំពេញ)៖ រាជរដ្ឋាភិបាលកម្ពុជា បានត្រៀមឱកាសការងារចំនួន ១៨១,៤៩៣ កន្លែង នៅទូទាំង ២៥ រាជធានី-ខេត្ត ដើម្បីផ្ដល់ជូនបងប្អូនពលករខ្មែរដែលបានត្រឡប់មកពីប្រទេសថៃវិញ។ នេះគឺជាការយកចិត្តទុកដាក់ខ្ពស់របស់រាជរដ្ឋាភិបាល ដែលបានសហការ ជាមួយក្រសួងការងារ និងបណ្ដុះបណ្ដាលវិជ្ជាជីវៈ រួមទាំងអាជ្ញាធរពាក់ព័ន្ធ ដើម្បីជួយសម្រួលដល់ ជីវភាពប្រចាំថ្ងៃរបស់ពលរដ្ឋ។
ឱកាសការងារទាំងនេះមាន នៅក្នុងបណ្ដាសហគ្រាស រោងចក្រ និងគ្រឹះស្ថានជាច្រើន ដោយផ្ដល់ជូននូវប្រាក់ខែសមរម្យ។ ក្រសួងការងារនឹងខិតខំ ស្វែងរកការងារបន្ថែមទៀត ដើម្បីធានាថាពលរដ្ឋ គ្រប់រូបអាចទទួលបានការងារធ្វើ និងមានចំណូលគ្រប់គ្រាន់ សម្រាប់ទ្រទ្រង់ជីវភាព គ្រួសារឱ្យកាន់តែប្រសើរឡើង៕
