(ភ្នំពេញ)៖ នារសៀលថ្ងៃសុក្រ ទី០៨ ខែសីហា ឆ្នាំ២០២៥នេះ ឯកឧត្តមសាស្ត្រាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានអញ្ជើញជាអធិបតី ក្នុងពិធីប្រគល់វិញ្ញាបនបត្រ ដល់មន្ទីរពិសោធន៍ដែល បានទទួលស្គាល់គុណភាព ស្តង់ដាអន្តរជាតិ ISO 15189 Plus ដល់មន្ទីរពិសោធន៍ចំនួន ៣ រួមមាន វិទ្យាស្ថានជាតិសុខភាព សាធារណៈ មជ្ឈមណ្ឌលជាតិប្រយុទ្ធ នឹងជំងឺអេដស៍ សើស្បែក និងកាមរោគ (NCHADS) និងមន្ទីរពេទ្យបង្អែកខេត្តសៀមរាប ដែលមានសុពល ភាពចាប់ពីឆ្នាំ ២០២៥ ដល់ ២០២៩។
ឯកឧត្តមសាស្រ្តាចារ្យរដ្ឋមន្រ្តី បានណែនាំឱ្យ មន្រ្តីមន្ទីរពិសោធន៍ ទូទាំងប្រទេសហ៊ានដាក់ គោលដៅខ្ពស់ សម្រាប់ គុណភាពមន្ទីរពិសោធន៍ ហើយត្រូវខិតខំប្រឹងប្រែង រក្សានិរន្តរភាពនៃគុណភាព មុននឹងឈានទៅពង្រីក និងពង្រឹងសេវាថ្មីបន្ថែមទៀត ដែលលទ្ធផលចុងក្រោយ ប្រទេសកម្ពុជានឹងមាន មន្ទីរពិសោធន៍វេជ្ជសាស្រ្ត ដែលមានគុណភាព នៅទូទាំងប្រទេស។ បន្ថែមពីលើនេះ មន្ទីរពិសោធន៍វេជ្ជសាស្រ្ត ទាំងអស់ត្រូវចូលរួមបង្កើត ជាប្រពន្ធ័ប្រទាក់ក្រឡា គ្នាមួយសម្រាប់តាមដាន និងគ្រប់គ្រងមេរោគ ដែលអាចបង្ករជាជំងឺរាត ត្បាតនៅក្នុងប្រទេស ឬក្នុងតំបន់ ឬនៅលើសកលលោក។
ឆ្លៀតក្នុងឱកាសនេះ ឯកឧត្តមសាស្រ្តាចារ្យ បានផ្តល់អនុសាសន៍មួយចំនួន ដើម្បីពង្រឹងដល់ការងារ គ្រប់គ្រងគុណភាពមន្ទីរ ពិសោធន៍ ដូចខាងក្រោម៖
– អ្នកបច្ចេកទេសមន្ទីរ ពិសោធន៍ត្រូវខិតខំ សិក្សាបន្ថែម ដើម្បីបង្កើនសមត្ថភាពបច្ចេកទេស ឈានឡើងមួយកម្រិតទៀត
– វិទ្យាស្ថានត្រូវចូលរួមគិតគូរ និងរៀបចំគោលនយោបាយ គ្រប់គ្រងគុណភាព សេវាមន្ទីរពិសោធន៍នៅកម្ពុជា ឱ្យស្របទៅនឹងបរិបទរបស់ប្រទេស និងមានលក្ខណៈកាន់តែប្រសើរ ដើម្បីធានាបាននូវនិរន្តរភាព នៃគុណភាពមន្ទីរពិសោធន៍
– មន្ទីរពិសោធន៍ទាំងសាធារណៈ និងឯកជនទាំងអស់ ត្រូវអនុវត្តកម្មវិធីកែលំអ គុណភាពជាប្រចាំ ដើម្បីធានាបានសេវាធ្វើតេស្ត ដែលមានគុណភាព ជូនដល់ប្រជាជន និងទទួលស្គាល់ គុណភាពថ្នាក់ជាតិ និងអន្តរជាតិ
– រៀបចំប្រព័ន្ធមន្ទីរ ពិសោធន៍សាធារណៈមួយ ដែលមានគុណភាព ប្រទាក់ក្រទ្បាគ្នា និងឆ្លើយឆ្លងបានទាន់ ពេលវេលា ក្នុងការត្រៀមខ្លួនឆ្លើយ តបទៅនឹងការផ្ទុះជំងឺ និងបម្រើសេវាសុខាភិបាល កាន់តែទូលំទូលាយ
– វិទ្យាស្ថានជាតិសុខភាពសាធារណៈ ត្រូវចូលរួមក្នុងការពង្រឹង គុណភាពមន្ទីរពិសោធន៍ សាធារណៈ និង ឯកជន
– អ្នកមន្ទីរពិសោធន៍ និងមន្រ្តីរាជការទាំងអស់ ខិតខំអភិវឌ្ឍសមត្ថភាព ខ្លួនឯងឱ្យកាន់តែខ្លាំង ដើម្បីក្លាយជាធនធានរបស់ប្រទេសជាតិ
មុននឹងបញ្ជប់ ឯកឧត្តមសាស្រ្តាចារ្យរដ្ឋមន្រ្តី ថ្លែងអំណរគុណ ដល់អង្គការដៃគូទាំងអស់ ជាពិសេសមជ្ឈមណ្ឌលត្រួតពិនិត្យ និងបង្ការជំងឺឆ្លង របស់សហរដ្ឋអាមេរិក (US-CDC) ប្រចាំនៅកម្ពុជា ដែលបានគាំទ្រទាំងបច្ចេកទេស និងថវិកា ដល់វិទ្យាស្ថានជាតិសុខភាពសាធារណៈ ក្នុងការអនុវត្តផែនការកន្លងមក ដែលនាំឱ្យសម្រេច បានសមិទ្ធផល ជាវិជ្ចមានដូចថ្ងៃនេះ។
ឯកឧត្តមសាស្រ្តចារ្យ ក៏បានអំពាវនាវដល់ដៃគូ អភិវឌ្ឍទាំងអស់ ជួយផ្តល់ឱកាសអាហារូបករណ៍ ជូនមន្រ្តីជំនាញវេជ្ជសាស្រ្ត ដើម្បីពង្រឹងនូវគុណភាព និងសមត្ថភាព ឱ្យកាន់តែល្អ។
ពិធីនេះមានការចូលរួមពី ឯកឧត្តម លោកជំទាវ ថ្នាក់ដឹកនាំ ក្រសួងសុខាភិបាល តំណាងស្ថានទូត សហរដ្ឋអាមេរិក ប្រចាំនៅកម្ពុជា ប្រធានមជ្ឈមណ្ឌលត្រួតពិនិត្យ និងបង្ការជំងឺឆ្លង របស់សហរដ្ឋអាមេរិក ប្រចាំនៅកម្ពុជា មន្ទីរសុខាភិបាល ខេតសៀមរាប តាកែវ បាត់ដំបង មន្ទីរពិសោធន៍នៃ មន្ទីរពេទ្យថ្នាក់ជាតិ និងថ្នាក់ក្រោមជាតិ អង្គការដៃគូអន្តរជាតិ និងមន្រ្តីបច្ចេកទេស មន្ទីរពិសោធន៍៕
