(ភ្នំពេញ)៖ ទីក្រុងសាយបឺរចាយ៉ា ប្រទេសម៉ាឡេស៊ី ថ្ងៃទី ៦-៧ ខែសីហា ឆ្នាំ២០២៥ – ក្រុមការងាររដ្ឋាភិបាល-ឧស្សាហកម្មម៉ាឡេស៊ីសម្រាប់បច្ចេកវិទ្យាខ្ពស់ (MIGHT) និងវិទ្យាស្ថានអន្តរជាតិនៃការទូតវិទ្យាសាស្ត្រ និងនិរន្តរភាពនៃសាកលវិទ្យាល័យ UCSI បានរៀបចំសន្និសីទ អន្តរជាតិដ៏ធំមួយស្តីពី «ការទូតវិទ្យាសាស្ត្រ ដើម្បីវិបុលភាពអាស៊ាន»។
សន្និសីទរយៈពេលពីរថ្ងៃនេះ មានការចូលរួមពីអ្នករៀប ចំគោលនយោបាយ អ្នកការទូត អ្នកវិទ្យាសាស្ត្រ និងអ្នកជំនាញអន្តរជាតិ មកពីទូទាំងតំបន់ អាស៊ីអាគ្នេយ៍ និងប្រទេសផ្សេងៗទៀត។ សន្និសីទនេះត្រូវបានរៀបចំឡើង ខណៈដែលតំបន់អាស៊ាន កំពុងប្រឈមនឹងបញ្ហា ឆ្លងព្រំដែនកាន់តែស្មុគស្មាញ ដូចជាការប្រែប្រួលអាកាសធាតុ សន្តិភាពនិងស្ថិរភាពក្នុងតំបន់ សន្តិសុខស្បៀង បញ្ហាបរិស្ថានជាដើម។
អង្គសន្និសីទបានពិភាក្សា អំពីការប្រើប្រាស់ការ ទូតវិទ្យាសាស្ត្រ ជាមូលដ្ឋានគ្រឹះយុទ្ធសាស្ត្រ សម្រាប់ទម្រង់ការ ទូតផ្សេងទៀត ដូចជាការទូតសេដ្ឋកិច្ច កិច្ចការទូតបៃតង កិច្ចការទូតថាមពល ដោយផ្តោតលើតួនាទី ក្នុងការជំរុញកិច្ចសហការ លើកកម្ពស់នវានុវត្តន៍ និងកសាងវិបុលភាព ក្នុងចំណោមរដ្ឋជាសមាជិក។ កម្ពុជាបានស្នើគោលគំនិតនេះ នៅក្នុងកិច្ចប្រជុំគណៈ កម្មាធិការអាស៊ាន ស្តីពីវិទ្យាសាស្ត្រ បច្ចេកវិទ្យា និងនវានុវត្តន៍លើកទី ៨០ (COSTI-80) ក្នុងឆ្នាំ២០២១ ដើម្បីឱ្យរដ្ឋជាសមាជិក អាស៊ានយកទៅអនុវត្ត។
តំណាងព្រះរាជា ណាចក្រកម្ពុជា ឯកឧត្តម ហ៊ុល សៀងហេង អនុរដ្ឋលេខាធិការនៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងពីការ ប្តេជ្ញាចិត្តរបស់កម្ពុជាក្នុងការ លើកកម្ពស់វិទ្យាសាស្ត្រ បច្ចេកវិទ្យា និងនវានុវត្តន៍ ជាកាតាលីករ សម្រាប់ការអភិវឌ្ឍ សេដ្ឋកិច្ច-សង្គម និងសមាហរណកម្ម អាស៊ានកាន់តែស៊ីជម្រៅ។
ឯកឧត្តម បានលើកឡើងថា៖ “ព្រឹត្តិការណ៍នេះគឺ ជាវេទិកាដ៏សំខាន់សម្រាប់ រដ្ឋជាសមាជិកស្វែងយល់ អំពីរបៀបដែល កិច្ចការទូតវិទ្យាសាស្ត្រ អាចជំរុញផលប្រយោជន៍រួម និងវិបុលភាពក្នុងតំបន់ ហើយកិច្ចការទូតនេះ នឹងជំរុញការ ប្រើប្រាស់ភស្តុតាង និងឧបករណ៍វិទ្យាសាស្ត្រ កាន់តែច្រើនឡើង។”
ការទូតវិទ្យាសាស្ត្រ ដែលជាការអនុវត្ត កិច្ចសហប្រតិបត្តិការ បែបវិទ្យាសាស្ត្រ ដើម្បីដោះស្រាយ បញ្ហាប្រឈមជាសកល និងជំរុញទំនាក់ ទំនងអន្តរជាតិ បានបង្ហាញគុណតម្លៃជាសកល ដូចជាករណី ជោគជ័យជាប្រវត្តិសាស្ត្រ នៃទំនាក់ទំនងរវាង សហរដ្ឋអាមេរិក និងសហភាពសូវៀត ក្នុងអំឡុងសង្គ្រាមត្រជាក់។ សន្និសីទនេះមាន គោលបំណងប្រែក្លាយ គំរូសកលបែបនេះ ទៅជាយុទ្ធសាស្ត្រក្នុង តំបន់ដែលអាចអនុវត្ត បានសម្រាប់អាស៊ាន។
សន្និសីទនេះត្រូវបានគាំទ្រ ដោយលេខាធិការដ្ឋាន អាស៊ាន អង្គការ INGSA-Asia, Atri Advisory, ISC, IDFR, និង UNESCO ដោយមានកម្មវិធីជាច្រើន ដូចជាកិច្ចពិភាក្សាក្រុម និងបទបង្ហាញលើ ប្រធានបទសំខាន់ៗ ដូចជាសេដ្ឋកិច្ចអវកាស សេដ្ឋកិច្ចខៀវ សន្តិសុខទឹក និងការកសាង សមត្ថភាពសម្រាប់កិច្ច សហប្រតិបត្តិការ វិទ្យាសាស្ត្រអន្តរជាតិ។
