(ភ្នំពេញ)៖ ឯកឧត្តម ជុំ សុន្ទរី រដ្ឋលេខាធិការ និងជាអ្នកនាំពាក្យ ក្រសួងការបរទេស និងសហប្រតិបត្តិការ អន្តរជាតិកម្ពុជា បានគូសរំលេចថា កម្ពុជាសូមបដិសេធ យ៉ាងដាច់អហង្កា ចំពោះការចោទប្រកាន់ មួយចំនួនរបស់ថៃ ដែលបានចាត់ទុកថា កម្ពុជាគឺជាអ្នកឈ្លានពាន ជាអ្នករំលោភបំពាន ទៅលើបទឈប់បាញ់ និងជាអ្នកយកប្រជាជន ស៊ីវិលធ្វើជាគោលដៅ។
ការបញ្ជាក់យ៉ាងដូច្នេះ របស់អ្នកនាំពាក្យ ក្រសួងការបរទេស និងសហប្រតិបត្តិការ អន្តរជាតិកម្ពុជានេះ ក្នុងឱកាសនៃការ ធ្វើសេចក្តីសង្ខេប ព័ត៌មានប្រចាំថ្ងៃ ស្តីពីលទ្ធផលនៃការ អនុវត្តបទឈប់បាញ់ រវាងកម្ពុជា-ថៃ នាព្រឹកថ្ងៃទី០៧ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។
តាម ឯកឧត្តម ជុំ សុន្ទរី អ្នកនាំពាក្យ ក្រសួងការបរទេស និងសហប្រតិបត្តិការ អន្តរជាតិកម្ពុជា បានធ្វើការគូសបញ្ជាក់ នូវចំណុចមួយចំនួន ដូចតទៅនេះ ទី១. កម្ពុជាបានបង្ហាញឱ្យ ឃើញយ៉ាងច្បាស់ និងជាប់ជានិច្ចនូវសុឆន្ទៈ ការអត់ធ្មត់ និងការតាំងចិត្ត ចំពោះសន្តិភាពរបស់ខ្លួន ជាពិសេសគឺតាមរយៈ ការគោរពដោយពេញលេញ ចំពោះកិច្ចព្រមព្រៀង ឈប់បាញ់ដែលសម្រេចបាន នៅក្នុងកិច្ចប្រជុំពិសេស កាលពីថ្ងៃទី២៨ ខែកក្កដា ឆ្នាំ២០២៥ នៅម៉ាឡេស៊ី ដោយកម្ពុជាកំពុង ចូលរួមយ៉ាងសកម្ម និងដោយសុទ្ធចិត្ត នៅក្នុងការដោះស្រាយបញ្ហា ដោយផ្លូវការទូត។
ទី២. កម្ពុជាសូមបដិសេធយ៉ាងដាច់ អហង្កាចំពោះការចោទ ប្រកាន់មួយចំនួនរបស់ថៃ ដែលបានចាត់ទុកថាកម្ពុជា គឺជាអ្នកឈ្លានពាន ជាអ្នករំលោភបំពាន ទៅលើបទឈប់បាញ់ និងជាអ្នកយកប្រជាជន ស៊ីវិលធ្វើជាគោលដៅ។
ទី៣. កម្ពុជាសូមអំពាវនាវដល់ ប្រទេសថៃឱ្យបញ្ឈប់នូវ រាល់ការផ្សព្វផ្សាយ ព័ត៌មានមិនពិត និងសូមវិលត្រឡប់មក រកកិច្ចសន្ទនាដោយសុទ្ធចិត្តវិញ ដោយអ្នកនាំពាក្យ ក្រសួងការបរទេសកម្ពុជា បានគូសបញ្ជាក់ថា យុទ្ធនាការនៃការផ្សព្វ ផ្សាយព័ត៌មានមិនពិត របស់ថៃគឺបានធ្វើឱ្យប៉ះពាល់ ទៅដល់ទំនុកចិត្តរវាង កម្ពុជា-ថៃ និងក៏ជាការគម្រាមកំហែង ចំពោះវឌ្ឍនភាពដែលសម្រច បានក្រោមកិច្ចព្រមព្រៀង នៃបទឈប់បាញ់ផងដែរ។
និងទី៤. កម្ពុជាសូមអំពាវនាវដល់ សហគមន៍អន្តរជាតិ រួមទាំងបណ្តាប្រទេស ជាសមាជិកអាស៊ាន បណ្តាទីភ្នាក់ងារអង្គការ សហប្រជាជាតិ បណ្តាប្រទេស អ្នកសង្កេតការណ៍ ជាពិសេសគឺ ម៉ាឡេស៊ីដែល ជាប្រធានអាស៊ាន បច្ចុប្បបន្ន រួមនឹងសហរដ្ឋអាមេរិក និងប្រទេសចិន សូមឱ្យគាំទ្រចំពោះយន្តការ សត្យានុម័តដើម្បីត្រួតពិនិត្យ សភាពការណ៍ ហើយក៏សូមអំពាវនាវ ដល់បណ្តាប្រព័ន្ធឃោសនា ទូទៅឱ្យស្វែងរកការពិតជា សត្យានុម័តដើម្បីគាំទ្រ ដល់យន្តការផ្ទៀងផ្ទាត់ ដោយឯករាជ្យ ចៀសវាងការបកស្រាយ ដោយឯកតោភាគីដែល មិនបានគិតគូទៅដល់ការ ពិតដែលបានកើតមានឡើង។
