(ភ្នំពេញ)៖ កាលពីថ្ងៃទី០៦ ខែសីហាឆ្នាំ២០២៥នេះ ឯកឧត្ដម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានអំពាវនាវទៅ ដល់ប្រជាពលរដ្ឋ សូមឈប់ជាបន្ទាន់នូវ ការផ្សព្វផ្សាយនិងចែករំលែក ព័ត៌មានក្លែងក្លាយ ព្រោះព័ត៌មានទាំងអស់នេះ ធ្វើឱ្យប៉ះពាល់យ៉ាងខ្លាំង ដល់សន្តិសុខជាតិ បង្កអស្ថិរភាព និងធ្វើឱ្យមានភាព ច្របូកច្របល់នៅក្នុងសង្គម ។
ឯកឧត្ដម បានមានប្រសាសន៍ថា ចាប់តាំងពីមានបញ្ហា ប្រយុទ្ធគ្នារវាងកងទ័ពកម្ពុជា-ថៃ គឺសង្កេតឃើញថា ព័ត៌មានក្លែងក្លាយបានរីក សាយភាយយ៉ាងខ្លាំង ដែលផ្តល់ផលអវិជ្ជមានយ៉ាងច្រើន ទៅដល់ប្រជាពលរដ្ឋនិងសង្គមជាតិ ។
ឯកឧត្ដម បានបន្តថា ដើម្បីចូលរួមទប់ស្កាត់ព័ត៌មាន ក្លែងក្លាយឱ្យមានប្រសិទ្ធភាព ក្រសួងព័ត៌មាន ក៏បានចេញសេចក្ដីណែនាំ ស្តីពី «ការផ្សព្វផ្សាយនិងការចែក រំលែកព័ត៌មានដែលផ្តល់ ផលអវិជ្ជមានដល់សន្តិសុខជាតិ» ដោយរាល់ការផ្សព្វ ផ្សាយព័ត៌មាន និងចែករំលែកព័ត៌មាន របស់សាធារណជន គឺត្រូវធានាថា មិនធ្វើឱ្យអន្តរាយ ដល់សន្តិសុខជាតិ ការបែកបាក់សាមគ្គីជាតិ ការបំបាក់ទឹកចិត្តកងទ័ព ទំនាក់ទំនងជាមួយប្រទេសដទៃ ការបង្កអរិភាពជាតិ សិទ្ធិបុគ្គល សាធារណៈមតិជាតិនិងអន្តរជាតិ ដែលចាំបាច់ត្រូវផ្ទៀងផ្ទាត់ ព័ត៌មានជាមួយប្រភពព័ត៌មាន ផ្លូវការរបស់ថ្នាក់ដឹកនាំជាតិ រាជរដ្ឋាភិបាលកម្ពុជា ក្រសួងការពារជាតិ ក្រសួងការបរទេសនិង កិច្ចសហប្រតិបត្តិការអន្តរជាតិ ក្រសួងព័ត៌មាន និងក្រសួងស្ថាប័ន ពាក់ព័ន្ធផ្សេងៗទៀត ។
ក្នុងនាមជាអ្នកនាំពាក្យ នៃក្រសួងព័ត៌មាន ឯកឧត្តមក៏សូមអំពាវនាវ ទៅដល់បងប្អូនប្រជាពលរដ្ឋ កុំចូលរួមចែកចាយ ឬផ្សព្វផ្សាយនូវព័ត៌មានមិនពិត ដែលធ្វើឱ្យប៉ះពាល់ ដល់សន្តិសុខជាតិ ជាពិសេសបង្កើតការភាន់ ច្រឡំទៅដល់ប្រជាពលរដ្ឋ ទូទាំងប្រទេស ។
« សូមតាមដានព័ត៌មានផ្លូវការ ទៅតាមប្រភពផ្លូវការ ហើយក៏សូមបញ្ឈប់ ជាបន្ទាន់នូវការបង្កើត ការចែកចាយនូវ ព័ត៌មានក្លែងក្លាយ ដែលបានបង្កើតឡើង នៅក្នុងរយៈពេលប៉ុន្មាន ថ្ងៃចុងក្រោយនេះ គឺធ្វើឱ្យមានភាពច្របូក ច្របល់ខ្លាំងណាស់ ដោយនេះមិនទាន់បូក រួមបញ្ចូលពីក្របខ័ណ្ឌ ច្បាប់នៅឡើយទេ ក្របខ័ណ្ឌច្បាប់គឺមានការគ្រប់គ្រងយ៉ាងត្រឹមត្រូវ មិនឱ្យមានការចុះផ្សាយពីសន្តិសុខជាតិនោះទេ គឺច្បាប់ស្ដីពីរបប សារព័ត៌មានមាត្រា១២នេះ គឺពុំអាចឡើយការផ្សាយ ព័ត៌មានពាក់ព័ន្ធ នឹងសន្តិសុខជាតិ » ។
យោងតាមរយៈសេចក្ដីណែនាំស្តីពី ការផ្សព្វផ្សាយនិង ការចែករំលែកព័ត៌មាន ផ្តល់ផលអវិជ្ជមានដល់សន្តិសុខជាតិ បានបញ្ជាក់ថា រាល់ការធ្វើដំណើរនិង ការចុះយកព័ត៌មាន នៅសមរភូមិជួរមុខ គឺត្រូវមានការជូនដំណឹង និងស្នើសុំការអនុញ្ញាត ពីក្រសួងព័ត៌មាន និងសមត្ថកិច្ចនៅសមរភូមិមុខ ហើយត្រូវកាត់បន្ថយជាអតិបរមា ដើម្បីធានាសុវត្ថិភាពផ្ទាល់ខ្លួននិងសន្តិសុខ និងត្រូវគោរពក្រមសីលធម៌ វិជ្ជាជីវៈសារព័ត៌មានច្បាប់ស្ដីពី របបសារព័ត៌មាននិងលិខិត បទដ្ឋានគតិយុត្តជាធរមាននៃ ព្រះរាជាណាចក្រកម្ពុជា ។
ហាមផ្សព្វផ្សាយ និងចែករំលែកព័ត៌មាន អំពីទីតាំងឈរជើង ការចល័តទ័ព លេណដ្ឋានកងទ័ព ការប្រើប្រាស់គ្រឿងសព្វាវុធ យោធោប្បករណ៍ និងការសម្ងាត់របស់កងទ័ព ដែលធ្វើឱ្យអន្តរាយដល់ សន្តិសុខជាតិនិងបង្កគ្រោះថ្នាក់ ដល់អ្នកបំពេញ បេសកកម្មជនជាតិ ៕
