រុមហ៊ុនមកពី១៥ប្រទេស ចូលរួមតាំងពិព័រណ៍ និងបង្ហាញសក្តានុពល កំណើនឧស្សាហកម្ម របស់កម្ពុជា

(ភ្នំពេញ)៖ កាលពីរសៀលថ្ងៃទី ០៦ ខែ សីហា ឆ្នាំ២០២៥ ពិព័រណ៍ឧស្សាហកម្ម គ្រឿងយន្តកម្ពុជាអន្តរជាតិ (CIMIF 2025) និងពិព័រណ៍ឧស្សាហកម្មសម្លៀកបំពាក់ និងវាយនភ័ណ្ឌកម្ពុជាអន្តរជាតិ (CTG 2025) បានបើកជាផ្លូវការ នៅរាជធានីភ្នំពេញ ដោយបង្ហាញចក្ខុវិស័យ នៃបរិវត្តកម្មឧស្សាហកម្មកម្ពុជា។

ពិព័រណ៍នេះបាន ប្រមូលផ្តុំក្រុមហ៊ុនផលិត នវានុវត្តន៍ករ និងវិនិយោគិនជាង២០០ក្រុមហ៊ុន មកពី១៥ ប្រទេស ដើម្បីស្វែងយល់អំពី ដំណាក់កាលបន្ទាប់នៃកំណើន ឧស្សាហកម្មរបស់កម្ពុជា។

ក្នុងសុន្ទរកថាបើកពិព័រណ៍ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា៖ “ទោះបីកម្ពុជាកំពុង ប្រឈមនឹងការគំរាមកំហែង លើបូរណភាពទឹកដី និងអធិបតេយ្យភាពរបស់ខ្លួនក្តី ស្មារតីសាមគ្គីឯកភាពជាតិដ៏រឹងមាំ និងការបំពេញភារកិច្ច និងកាតព្វកិច្ចរៀងៗខ្លួន ទាំងជួរមុខនិងជួរក្រោយ បានក្លាយជាថាមពលដ៏ខ្លាំងក្លា សម្រាប់ភាពធន់ និងការបន្តវឌ្ឍនភាពរបស់យើង។”

ឯកឧត្តមបានកោតសរសើរ ចំពោះការរៀបចំពិព័រណ៍ នេះថាជាសក្ខីកម្មបង្ហាញនូវ ដំណើរឆ្ពោះទៅមុខ និងការប្តេជ្ញាចិត្តរួមគ្នារវាងរាជរដ្ឋាភិបាល និងផ្នែកឯកជន ដើម្បីអភិវឌ្ឍវិស័យឧស្សាហកម្ម និងកម្មន្តសាលរបស់កម្ពុជាឱ្យកាន់តែរឹងមាំ។

ពិព័រណ៍ CIMIF និង CTG ឆ្នាំ២០២៥ ដែលរៀបចំឡើង ដោយក្រុមហ៊ុន Yorkers Trade & Marketing Service ជាក្រុមហ៊ុនរៀបចំពិព័រណ៍ ឈានមុខមួយក្នុងតំបន់អាស៊ី បាននាំយកក្រុមហ៊ុនសកល មកតាំងបង្ហាញគ្រឿងយន្ត គ្រឿងម៉ាស៊ីនទំនើបៗ ដំណោះស្រាយស្វ័យប្រវត្តិកម្ម និងបច្ចេកវិទ្យាផលិតកម្ម សម្រាប់គាំទ្រឧស្សាហកម្មក្នុងស្រុក ពិសេសឧស្សាហកម្មវាយនភ័ណ្ឌ និងសម្លៀកបំពាក់ ដែលកំពុងផ្តល់ការងារ ជាងមួយលានកន្លែង និងបន្តជាវិស័យនាំមុខសម្រាប់ ការនាំចេញរបស់កម្ពុជា។

ឯកឧត្តម ហែម វណ្ណឌី បានគូសរំលេចការវិវត្តថ្មីៗ នៃគោលនយោបាយ ពាណិជ្ជកម្មសកល ពិសេសការ បន្ថយអត្រាពន្ធបដិកា របស់សហរដ្ឋអាមេរិកមកលើកម្ពុជា ដោយលើកឡើងថា៖ “គោលនយោបាយពន្ធ បដិកាថ្មីរបស់សហរដ្ឋអាមេរិក បានផ្តល់ឱ្យកម្ពុជានូវ ភាពប្រាកដប្រជា និងឱកាសប្រកួតប្រជែងមួយ ដែលយើងទាំងអស់គ្នាត្រូវចាប់យក ក្នុងការពង្រីកការវិនិយោគ និងពង្រឹងសមត្ថភាព ដើម្បីប្រែក្លាយកម្ពុជា ជាមូលដ្ឋានផលិតកម្មចម្រុះសម្រាប់តំបន់ និងពិភពលោក។”

ឯកឧត្តមក៏បានជំរុញឱ្យ បន្តកិច្ចខិតខំប្រឹងប្រែងធ្វើ ទំនើបកម្មហេដ្ឋារចនាសម្ព័ន្ធ និងគោលនយោបាយ ដើម្បីទាក់ទាញការវិនិយោគថ្មីៗបន្ថែមទៀត។

សូមបញ្ចាក់ថា ព្រឹត្តិការណ៍ពិព័រណ៍ មានរយៈពេល៤ថ្ងៃ ចាប់ពីថ្ងៃទី៦ ដល់ថ្ងៃទី៩ ខែសីហានេះ ផ្តល់នូវវេទិកាយុទ្ធសាស្ត្រ មួយសម្រាប់ការផ្លាស់ប្តូរចំណេះដឹង ការស្វែងរកដៃគូអាជីវកម្ម និងការទាក់ទាញវិនិយោគផ្ទាល់ពីបរទេស។

ឯកឧត្តមរដ្ឋមន្ត្រីបានបន្ថែមថា៖ “យើងទាំងអស់គ្នាត្រូវប្តេជ្ញាបោះជំហានចូលទៅកាន់សករាជថ្មី ដែលប្រើប្រាស់បច្ចេកវិទ្យា បច្ចេកទេស គ្រឿងម៉ាស៊ីន និងឧបករណ៍ទំនើបៗ រួមទាំងស្វ័យប្រវត្តិកម្ម ដើម្បីកសាងមូលដ្ឋានឧស្សាហកម្ម និងសេវាកម្ម ប្រកបដោយស្តង់ដា គុណភាព និងផលិតភាពខ្ពស់។”

លោក Akai Lin នាយកក្រៅប្រទេសនៃក្រុមហ៊ុន Yorkers បានលើកឡើងថា៖ “គ្រឿងម៉ាស៊ីន និងបច្ចេកវិទ្យាមានសារៈសំខាន់កាន់តែខ្លាំង សម្រាប់ដំណាក់កាលបន្ទាប់នៃការអភិវឌ្ឍឧស្សាហកម្ម ហើយទីតាំងភូមិសាស្ត្រដ៏ល្អរបស់កម្ពុជានៅក្នុងតំបន់ ធ្វើឱ្យកម្ពុជាក្លាយជាគោលដៅសម្រាប់អ្នកវិនិយោគ និងក្រុមហ៊ុនផ្គត់ផ្គង់អន្តរជាតិ។”

ពិព័រណ៍ CIMIF និង CTG ឆ្នាំ២០២៥ មានតាំងបង្ហាញគ្រឿងម៉ាស៊ីន និងខ្សែច្រវាក់ផលិតកម្មច្រើនប្រភេទ រួមមានផ្នែកផ្លាស្ទិច និងកៅស៊ូ ការវេចខ្ចប់ ការបោះពុម្ព ឧបករណ៍កែច្នៃអាហារ គ្រឿងបន្លាស់រថយន្ត ម៉ាស៊ីន និងឧបករណ៍ស្វ័យប្រវត្តិកម្ម។ ទន្ទឹមនឹងនេះ ពិព័រណ៍ក៏មានផ្នែកវាយនភ័ណ្ឌ សម្លៀកបំពាក់ គ្រឿងបន្លាស់ សរសៃអំបោះ កប្បាស ក្រណាត់ និងបច្ចេកវិទ្យាពាក់ព័ន្ធផងដែរ៕