(ខេត្តបាត់ដំបង)៖ នៅព្រឹកថ្ងសទី០៦ ខែសីហាឆ្នាំ២០២៥នេះ ឯកឧត្តម សុខ លូ អភិបាលខេត្តបាត់ដំបង បានឱ្យដឹងក្រោយមាត់ទ្វារច្រកព្រំដែន ដែលភាគីថៃបិទ នៅម៉ោង៣រសៀល បន្ទាប់ពីបើកនៅម៉ោង៩ព្រឹក បានឱ្យដឹងថា ពលករខ្មែរធ្វើការនៅ ប្រទេសថៃបានសម្រុក វិលត្រឡប់មកស្រុកកំណើត វិញតាមច្រកអន្តរជាតិដូង ស្រុកកំរៀង ខេត្តបាត់ដំបង មានការកើន ឡើងរហូតដល់ជាង១២ម៉ឺននាក់ ។
គួរកត់សម្គាល់ថា ចំនួនពលករថ្ងៃនេះ ជាថ្ងៃដែលមានពលករខ្មែរ ធ្វើការនៅប្រទេសថៃត្រឡប់ មកស្រុកកំណើតវិញ តាមច្រកអន្តរជាតិដូង មានចំនួនច្រើនជាងគេបំផុត ក្រោយផ្ទុះសង្គ្រាមនៅ តំបន់ព្រំដែនរវាងកងទ័ពកម្ពុជាថៃ ដែលបង្កឡើងដោយកងទ័ពថៃមុន កាលពីថ្ងៃទី២៤ ខែកក្កដា ឆ្នាំ២០២៥។ ថ្ងៃដែលពលករ ច្រើនទីពីរ គឺថ្ងៃទី២៧ ខែកក្កដា ឆ្នាំ២០២៥ មានពលករវិលចូលជាង១១ម៉ឺន៩ពាន់នាក់ និងច្រើនទី៣ គឺ ថ្ងៃទី០៥ ខែសីហា ឆ្នាំ២០២៥ មានចំនួនជាង១០ម៉ឺនប្រាំរយនាក់។
បើតាមរបាយការណ៍ ដោយផ្តល់ប្រចាំថ្ងៃដោយ ឯកឧត្តម សឿម ប៊ុនរិទ្ធ អភិបាលរងខេត្ត និងជាអ្នកនាំពាក្យ រដ្ឋបាលខេត្តបាត់ដំបងឱ្យដឹងថា ចាប់ពីថ្ងៃទី២៥ ខែកក្កដា ឆ្នាំ២០២៥ ដល់ថ្ងៃទី០៦ ខែសីហា ឆ្នាំ ២០២៥ ពោលគឺ១៣ថ្ងៃក្រោយផ្ទុះសង្គ្រាម រវាងកងទ័ពកម្ពុជានិងថៃ មានប្រជាពលរដ្ឋ និងពលករ ដែលស្នាក់នៅធ្វើការនៅប្រទេសថៃ វិលចូលប្រទេស វិញតាមច្រកអន្តរជាតិដូង កើនឡើងចំនួនជាង៥០ម៉ឺននាក់ ។
ខណៈដែលពលករបន្ត សម្រុកមកជាច្រើនថ្ងៃនេះ ឃើញវត្តមានឯកឧត្តម សុខ លូ អភិបាលខេត្តបាត់ដំបង និងលោកជំទាវ ម៉េត រ៉ាវីចិត្រ សុខ លូ ព្រមទាំងក្រុមការងារគ្រប់ផ្នែកទាំងអស់ កំពុងសស្រាក់សស្រាំ ក្នុងការជួយសម្របសម្រួល ដំណើរវិលត្រឡប់របស់ពលករខ្មែរ មកពីប្រទេសថៃតាមច្រកទ្វារ ព្រំដែនអន្តរជាតិដូង ស្រុកកំរៀង នេះជាប្រចាំ ដើម្បីកុំឱ្យមានការកកស្ទះ និងវិលត្រឡប់ទៅស្រុក កំណើតវិញដោយរលូន។
មន្រ្តីពាក់ព័ន្ធ និងយុវជន ស.ស.យ.ក ក្រោមការចុះដឹកនាំផ្ទាល់ ឯកឧត្តម សុខ លូ បានប្រកាសមេក្រូ ជួយសម្រួលការជញ្ជូនឥវ៉ាន់, ផ្តល់អាហារសម្រន់ , មានមណ្ឌលសំចត សម្រាប់អង្គុយរង់ចាំ ,មានក្រុមគ្រូពេទ្យប្រចាំ ការពិនិត្យ, ផ្តល់ព័ត៌មានពី ឱកាសការងារ និងមានរថយន្តរាប់រយ គ្រឿងដែលផ្តល់ដោយ រាជរដ្ឋាភិបាលបណ្តា រាជធានីខេត្ត ដឹកពួកគាត់ទៅស្រុកកំណើត វិញដោយមិនគិតថ្លៃជាដើម៕
