(ខេត្តតាកែវ)៖ នៅក្នុងឱកាសចុះជួបបងប្អូនពលករ ទើបត្រលប់មកពីប្រទេសថៃ ប្រមាណជិត ៣រយនាក់ នៅក្នុង ស្រុកកោះអណ្ដែត អភិបាលខេត្តតាកែវ ឯកឧត្តម វ៉ី សំណាង បានលើកឡើងប្រាប់បងប្អូនពលករ ទាំងអស់កុំអោយ មានការព្រួយបារម្ភ ពាក់ព័ន្ធទៅការស្វែង ការងារធ្វើនៅក្នុងស្រុក ព្រោះគ្រាន់តែស្រុកកោះអណ្ដែត មួយមានរោងចក្រ ទើបបើកថ្មីចំនួន ៦រោងចក្រ និងត្រូវការកម្មករ បំរើការងារចំនួនជាង ១ពាន់នាក់។
ឯកឧត្តម វ៉ី សំណាង បានមានប្រសាសន៍បន្តថា ក្នុងរយៈពេលប៉ុន្មានថ្ងៃ កន្លងមកនេះក្រោយ ពីយើងមាន ជំលោះជាមួយប្រទេសថៃ ដែលបានបញ្ជូនទាហ៊ាន មកឈ្លានពានទឹកដីកម្ពុជា យើងរហូតមានការផ្ទុះអាវុធ រយៈពេល៥ថ្ងៃ មានបងប្អូនពលករខ្មែរ នៅប្រទេសថៃ បានមកវិលត្រលប់ មកប្រទេសវិញជាច្រើន។ បញ្ហានេះរាជរដ្ឋាភិបាលកម្ពុជា និងអាជ្ញាធមិនបាន បន្ទោសបងប្អូននោះទេ តែផ្ទុយទៅវិញយើងមានតែ ការយកចិត្តទុកដាក់ ពីសុខទុក្ខបងប្អូន និង បានធ្វើការទាក់ទងជាមួយ បណ្ដាលក្រុមហ៊ុន នៅក្នុងខេត្តដើម្បីស្វះស្វែង រកការងារជូនបងប្អូន ពលករទាំងអស់ ដែលទើប ត្រលប់មកពីប្រទេសថៃ។
ឯកឧត្តមអភិបាលខេត្តតាកែវ បានថ្លែងបន្តថា សម្រាប់ខេត្តតាកែវរយៈពេល ៦ខែដើមឆ្នាំ២០២៥ នេះ ខេត្តតាកែវ ទទួលបានអ្នកវិនិយោគ ចូលមកបណ្ដាក់ទុនចំនួន ៣១ក្រុមហ៊ុន ដែលមានទំហ៊ំទឹកប្រាក់ចំនួនជាង ៩៧លានដុល្លារ អាមេរិក។ គម្រោងវិនិយោគនេះបានបង្កើត ការងារជូនបងប្អូនប្រជាពលរដ្ឋ ក្នុងខេត្តតាកែវ បានចំនួនជិត២ម៉ឺនកន្លែង ហើយបច្ចុប្បន្នក៍មាន ក្រុមហ៊ុនមួយចំនួនទៀត កំពុងតែដាក់សំណើរចូល មកបណ្ដាក់ទុនថែមទៀតផងដែរ។
ឯកឧត្តម វ៉ី សំណាង បានថ្លែងបន្តថា មូលហេតុដែលខេត្តតាកែវ ទទួលបានក្រុមអ្នកវិនិយោគ ចូលមកបណ្ដាក់ទុនច្រើន ដោយសារតែខេត្តតាកែវ មានសក្ដានុពលជាច្រើន លើវិស័យឧស្សាហមកម្ម កសិកម្ម ទេសចរណ៍ ហេថារចនាសម្ព័ន្ធ ល្អប្រសើរ មានប្រជាពលរដ្ឋ ឧស្សាហ៍ព្យាយាម ជាពិសេសអាជ្ញាធខេត្ត បានយកចិត្តទុកដាក់ ជួយសម្របសម្រួល គ្រប់បែបយ៉ាង ជូនអ្នកវិនិយោគទុន៕
