(ខេត្តបាត់ដំបង)៖ ឯកឧត្តមសុខលូ អភិបាលខេត្តបាត់ដំបង បានឱ្យដឹងថាតាមព័ត៌មានបឋម ត្រឹមព្រឹក ថ្ងៃទី០៦ខែសីហាឆ្នាំ២០២៥ នេះមានពលករខ្មែរ ប្រមាណ៨ម៉ឺននាក់ បន្ថែមទៀតត្រៀម វិលចូលប្រទេស វិញតាមច្រកអន្តរជាតិដូង ខណៈម្សឹលមិញមានពលករ ចូលតាមច្រកនេះជាង១០ម៉ឺននាក់។ ការថ្លែងបញ្ជាក់នេះខណៈ ឯកឧត្តមបានដឹកនាំមន្រ្តី ពាក់ព័ន្ធចុះទៅ ពិនិត្យស្ថានភាព និងទទួលស្វាគមន៍ ពលករដល់មាត់ច្រកទ្វារ ព្រំដែនផ្ទាល់។
បើតាមរបាយការណ៍ ដែលផ្តល់ដោយលោក សឿម ប៊ុនរិទ្ធ អភិបាលរងខេត្តបាត់ដំបង អ្នកនាំពាក្យ រដ្ឋបាលខេត្តបាត់ដំបង គិតចាប់ពីក្រោយផ្ទុះសង្គ្រាម រវាងកងទ័ពកម្ពុជាថៃ ដែលបង្កឡើងដោយទាហាន ថៃមុននោះ គឺចាប់ថ្ងៃទី២៥ខែកក្កដាឆ្នាំ២០២៥ ដល់០៥ខែសីហា ពោលគឺរយៈពេល១២ថ្ងៃ មានចំនួនប្រជាពលរដ្ឋ និងពលករខ្មែរដែលស្នាក់នៅ និងធ្វើការនៅប្រទេសថៃ វិលត្រឡប់មកប្រទេសវិញ ចំនួនជាង ៤៥ម៉ឺននាក់ ។ តួលេខនេះបើបូកថ្ងៃទី០៦សីហា ចំនួន៨ម៉ឺននាក់ទៀត គឺកើនជាង៥០ម៉ឺននាក់ ។
ថ្ងៃនេះក៏ដូចម្សឹលមិញឧត្តម សុខ លូ អភិបាលខេត្តបាត់ដំបង បានណែនាំដល់អាជ្ញាធរ មន្រ្តីជំនាញ កងកម្លាំង និងគ្រប់ភាគីពាក់ព័ន្ធ ទាំងអស់ដែលកំពុងប្រចាំការ នៅច្រកទ្វារព្រំដែនអន្តរជាតិដូង ស្រុកកំរៀង ត្រូវបន្តខិតខំយកចិត្ត ទុកដាក់បង្កលក្ខណៈ ងាយស្រួលនិងជួយ សម្របសម្រួលដំណើរវិល ត្រឡប់របស់ពលករខ្មែរមកពីប្រទេសថៃ ។
សូមបញ្ជាក់ថាបើតាមក្រសួងការងារ ការវិលត្រឡប់មកមាតុ ប្រទេសវិញរបស់ប្រជាពលករខ្មែរពីថៃ ពីថ្ងៃទី៨ មិថុនា មកដល់ល្ងាចថ្ងៃទី៥ ខែសីហា ឆ្នាំ២០២៥ មានចំនួនសរុប ៦៧០ ៨៣៩ នាក់ ៕
