(ភ្នំពេញ)៖ លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួង ការពារជាតិថ្លែងក្នុងសេចក្តី សង្ខេបព័ត៌មានប្រចាំថ្ងៃស្តីពី «លទ្ធផលនៃការអនុវត្ត បទឈប់បាញ់រវាងកម្ពុជា-ថៃ» នាព្រឹកថ្ងៃទី០៦ ខែសីហា ឆ្នាំ២០២៥ បានមានប្រសាសន៍ថា គិតត្រឹមម៉ោង ៦:០០នាទីព្រឹក ថ្ងៃទី០៦ ខែសីហា ឆ្នាំ២០២៥នេះ សភាពការណ៍នៅ ជួរមុខតាមបន្ទាត់ ព្រំដែនខេត្តខេត្តព្រះវិហារ និងខេត្តឧត្តរមានជ័យ មានសភាពស្ងប់ស្ងាត់ ហើយកងកម្លាំង របស់យើងស្ថិតក្នុងការ ប្រុងប្រយ័ត្នខ្ពស់នៅក្នុងការ បំពេញតួនាទីរបស់ខ្លួន យ៉ាងខ្ជាប់ខ្ជួន។
លោកជំទាវ ឧត្តមសេនីយ៍ឯក ម៉ាលី សុជាតា បានគូសបញ្ជាក់ថា កងកម្លាំងកម្ពុជា នៅតែបន្តព្យាយាម និងជំរុញអោយភាគីថៃ បញ្ឈប់សកម្មភាពរំលោភបំពាន ដែលនាំមកនូវភាពតានតឹង និងរំខានដល់ដំណើរ ការដោះស្រាយតាមសន្តិវិធី ឆ្ពោះទៅស្ថានភាពល្អប្រសើរ ដូចដែលជាបំណងប្រាថ្នា របស់កម្ពុជាក្នុងការចូលរួមចំណែក ដល់សន្តិភាព និងស្ថិរភាពក្នុង តំបន់យូរអង្វែង។
អ្នកនាំពាក្យខាងលើ បានបន្ថែមថា ក្រោយពីភាគីកម្ពុជា ព្យាយាមទាក់ទងទៅភាគីថៃ ដែលប្រចាំការនៅតំបន់ អានសេះបានពិភាក្សា និងចរចាយ៉ាងស្វិតស្វាញ ជាមួយភាគីថៃនៅវេលាម៉ោង ៣និង១៤ នាទីរសៀល កងកម្លាំងរបស់យើង បានដឹកនាំកម្លាំង ចុះរុះរើលួសបន្លាចេញ រហូតដល់ម៉ោង ៥និង៣០នាទីល្ងាចថ្ងៃទី០៥ ខែសីហា ឆ្នាំ២០២៥ លួសបន្លាត្រូវបានរុះរើ និងគ្រឿងចក្រថៃត្រូវ បានផ្អាកការធ្វើសកម្មភាព។
អ្នកនាំពាក្យក្រសួងការពារជាតិ ក៏បានបញ្ជាក់ថា ទីតាំងអានសេះគឺស្ថិត ក្រោមអធិបតេយ្យកម្ពុជា និងក្រោមការគ្រប់គ្រង របស់កងកម្លាំង ប្រដាប់អាវុធកម្ពុជា បន្ទាប់ពីបទឈប់បាញ់ចូល ជាធរមានកាលពីរំលងអាធា្រត ថ្ងៃទី២៨ ខែកក្កដា ឆ្នាំ២០២៥ យ៉ាងពិតប្រាកដ៕
