(ភ្នំពេញ)៖ ឯកឧត្តម ប៉ែន បូណា រដ្ឋមន្ត្រីប្រតិភូ អមនាយករដ្ឋមន្ត្រី និងជាប្រធានអង្គភាព អ្នកនាំពាក្យរាជរដ្ឋាភិបាល បានឆ្លើយតបចំពោះ មន្ត្រីថៃជាច្រើន មានទាំងស៊ីវិល យោធា និងសារព័ត៌មាន បានប្រឌិតព័ត៌មាន ភូតកុហកយ៉ាងច្រើន ក្នុងចេតនាមួលបង្កាច់ រាជរដ្ឋាភិបាលកម្ពុជា និង ថ្នាក់ដឹកនាំកម្ពុជា ក្នុងចេតនាបញ្ឆេះកំហឹង ប្រជាពលរដ្ឋខ្មែរឱ្យខឹងសម្បា ជាមួយថ្នាក់ដឹកនាំ ដើម្បីបំបែកបំបាក់មហា សាមគ្គីភាពដ៏រឹងមាំរបស់កម្ពុជា។
ការឆ្លើយតប របស់ឯកឧត្តម ប៉ែន បូណា ធ្វើឡើងនៅក្នុងការ ធ្វើសេចក្តីសង្ខេបព័ត៌មាន ប្រចាំថ្ងៃស្តីពីលទ្ធផលនៃ ការអនុវត្តបទឈប់ បាញ់រវាងកម្ពុជា-ថៃ នាល្ងាចថ្ងៃទី០៥ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី ដោយឯកឧត្តម បានគូសបញ្ជាក់ថា អ្វីដែលគួរឱ្យកត់ សម្គាល់ម៉្យាងទៀតគឺ នៅពេលដែលពួកគេ ជាអ្នកបង្កើតព័ត៌មានក្លែងក្លាយ តែបែរជាមន្ត្រី ម្នាក់ៗនិយាយថា កម្ពុជាជាអ្នកបង្កើត ព័ត៌មានក្លែងក្លាយ និយាយគ្រាន់តែបិទបាំងអ្វីដែលពួកគេបានធ្វើប៉ុណ្ណោះ។
ប៉ុន្តែអ្នកនាំពាក្យរាជរដ្ឋាភិបាល សូមបញ្ជាក់ជូនឡើងវិញថា «ការនិយាយភូតកុហក ទាំងអស់នេះមិនសម ទំនងទាល់តែសោះ ពោលគឺជាការភូតកុហក មួលបង្កាច់ចំពោះរឿងដែល គ្រប់គ្នាបានដឹងអស់បាត់ទៅហើយ។ ដូច្នេះពួកគេប្រហែល ជាធ្វើឱ្យប្រជាជនថៃ ខ្លួនឯងមួយចំនួនតូចជឿ តែប្រជាពលរដ្ឋខ្មែរ និងសាធារណៈមតិ ជាតិជាទូទៅ មិនជឿទាល់តែសោះ ពីព្រោះពេលនេះ អ្វីៗគ្រប់យ៉ាង ត្រូវបានបើកចំហនៅ ចំពោះមុខក្រសែភ្នែក មហាជន និងសហគមន៍អន្តជាតិ យ៉ាងទូលំទូលាយ»។
អ្នកនាំពាក្យសូម បញ្ជាក់ជូនភាគីថៃវិញថា «ពេលនេះគឺជាពេលវេលា ដែលភាគីទាំងពីរត្រូវ បង្ហាញការពិត ការប្ដេជ្ញាចិត្ត ដោយភាពស្មោះត្រង់ និងសុឆន្ទៈនៅក្នុងការ អនុវត្តកិច្ចព្រមព្រៀង ឈប់បាញ់ឱ្យមានប្រសិទ្ធភាព ដើម្បីរក្សាសុខសន្តិភាព និងភាពសុខសាន្ត របស់ប្រជាជននៃ ប្រទេសទាំងពីរ។
បើភាគីថៃមានអ្វីត្រូវដោះស្រាយ ជាមួយប្រជាជនរបស់ខ្លួន សូមដោះស្រាយបញ្ហាផ្ទៃ ក្នុងរបស់ខ្លួនឯងចុះ មិនចាំបាច់បង្វែរ ស្ថានការណ៍ទម្លាក់ កំហុសមកកម្ពុជាតាមរយៈ ការបង្កើតព័ត៌មានភូតកុហក នោះឡើយបាទ ពីព្រោះវិធីសាស្ត្រ នេះគ្មានប្រសិទ្ធភាពទៀតទេ ដែលមហាជនទូទៅ គេទទួលបានព័ត៌មានយ៉ាង ទូលំទូលាយរួច ស្រេចទៅហើយ»។
ដោយឡែកប្រជាជនកម្ពុជា មានការយល់ដឹង គ្រប់គ្រាន់និងចេះបែង ចែកអាក្រក់និងល្អ សនិងខ្មៅយ៉ាងច្បាស់ ដូច្នេះហើយការបញ្ចេញ ព័ត៌មានភូតកហកចោទ ប្រកាន់ថ្នាក់ដឹកនាំកម្ពុជា ក្នុងចេតនាបំបែកបំបាក់ ប្រជាពលរដ្ឋខ្មែរ ពីថ្នាក់ដឹកនាំរបស់ខ្លួន គឺជារឿងអត់ប្រយោជន៍ ផ្ទុយទៅវិញចេតនាអាក្រក់បែបនេះវា កាន់តែជួយពង្រឹង សាមគ្គីភាពរវាងខ្មែរ និងខ្មែរឱ្យកាន់តែរឹងមាំរឿង ដើម្បីការពារអធិបេត្យភាពជាតិ បូរណភាពទឹកដី និងការពារសេក្ដីថ្លៃថ្នូរ របស់ខ្លួនចេញពីការ ប្រមាទមាក់ងាយ។
មហាសាមគ្គីជាតិខ្មែរ នៅជុំវិញថ្នាក់ដឹកនាំ នៅជុំវិញកងទ័ព នៅជុំវិញកងកម្លាំង ប្រដាប់អាវុធដ៏អង់អាច ក្លាហានការពារអធិប តេយ្យភាពជាតិ បូរណភាពទឹកដី គ្មានឥទ្ធិពលអ្វីមកបំបែកបានឡើយ ជាពិសេសគឺព័ត៌មាន មិនពិតរឹតតែគ្មានប្រយោជន៍ ទាល់តែសោះក្នុងគោលបំណង បំបែកបំបាក់មហាសាមគ្គីជាតិខ្មែរ៕
