(ខេត្តព្រៃវែង)៖ នៅរសៀលថ្ងៃទី៥ ខែសីហា ឆ្នាំ២០២៥ នេះ ឯកឧត្តម អ៊ូ វណ្ណា អនុរដ្ឋលេខាធិការក្រសួងមហាផ្ទៃ និងជានាយករងខុទ្ទកាល័យប្រចាំការ និងឯកឧត្តម សួន សុម៉ាលីន អភិបាល នៃគណៈអភិបាលខេត្តព្រៃវែង ជាតំណាងដ៏ខ្ពង់ខ្ពស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញដឹកនាំមន្ត្រីរាជការ កងកម្លាំង គោរពវិញ្ញាណក្ខន្ធសពលោកអនុសេនីយ៍ត្រី មឿន សាម៉េត វីរកងទ័ពជួរមុខ នៃកងពលធំអន្តរាគមន៍លេខ២ ដែលបានទទួលមរណភាពដោយរោគាពាធ ក្នុងពេលបំពេញបេសកកម្មការពារបូរណភាពទឹកដី តាមបណ្តោយព្រំដែន ក្នុងជន្មាយុ ៣៦ឆ្នាំ។ ពិធីបុណ្យសពលោកអនុសេនីយ៍ត្រី មឿន សាម៉េត ប្រារព្ធធ្វើនៅភូមិដងទង់ ឃុំប្រាសាទ ស្រុកកំពង់ត្របែក ខេត្តព្រៃវែង។
ក្នុងឱកាសនោះ ឯកឧត្តម អ៊ូ វណ្ណា និងឯកឧត្តម សួន សុម៉ាលីន ក៏បាននាំយកថវិកា របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ចំនួន ៤០លានរៀល និងថវិការបស់សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ និងលោកជំទាវ ចំនួន ៥លានរៀល ព្រមទាំងថវិកា ឯកឧត្តមអភិសន្តិបណ្ឌិត និងលោកជំទាវ ចំនួន ២លានរៀល ប្រគល់ជូនក្រុមគ្រួសារ នៃសពផងដែរ។
សូមចូលរួមរំលែកមរណទុក្ខ ដ៏ក្រៀមក្រំជាមួយ ក្រុមគ្រួសារនៃសព និងសូមឧទ្ទិសបួងសួង ដល់ដួងវិញ្ញាណក្ខន្ធ របស់លោកអនុសេនីយ៍ត្រី មឿន សាម៉េត វីរកងទ័ពជួរមុខកម្ពុជា បានទៅកាន់សុគតិភព កុំបីឃ្លៀងឃ្លាតឡើយ៕
