(ភ្នំពេញ)៖ ឯកឧត្តម ប៉ែន បូណា រដ្ឋមន្រ្ដីប្រតិភូអមនាយករដ្ឋមន្រ្ដី និងជាប្រធានអង្គភាព អ្នកនាំពាក្យរាជរដ្ឋាភិបាលកម្ពុជា បានថ្លែងថា នាពេលនេះទាំង មន្រ្តីជាច្រើនរបស់ថៃ ទាំងមន្រ្តីស៊ីវិល មន្រ្តីយោធា រួមទាំងអ្នកសារព័ត៌មានថៃ តែងប្រឌិតព័ត៌មាន ក្លែងក្លាយកុហកជាច្រើន ក្នុងចេតនាមួលបង្កាច់ រាជរដ្ឋាភិបាលកម្ពុជា ថ្នាក់ដឹកនាំកម្ពុជា ក្នុងចេតនាបញ្ឆេះកំហឹង ពលរដ្ឋខ្មែរឱ្យខឹងចំពោះថ្នាក់ដឹកនាំ ដើម្បីបំបែកបំបាក់ មហាសាមគ្គីភាពជាតិ ដ៏រឹងមាំរបស់កម្ពុជា។ ការថ្លែងរបស់ឯកឧត្ត្ដម អ្នកនាំពាក្យបែបនេះ ក្នុងសន្និសីទសារព័ត៌មានស្តីពី «លទ្ធផលនៃការ អនុវត្តបទឈប់បាញ់ រវាងកម្ពុជា-ថៃ» នៅរសៀលថ្ងៃទី០៥ ខែសីហា ឆ្នាំ២០២៥ នាទីស្តីការគណៈរដ្ឋមន្ត្រី។
ឯកឧត្តម ប៉ែន បូណា មានប្រសាសន៍ថា ក្រៅពីការបង្កើតព័ត៌មាន ក្លែងក្លាយហើយ អ្វីដែលហួសចិត្តមួយទៀត នោះ គឺនៅពេលដែលពួកគេបង្កើត ព័ត៌មានក្លែងក្លាយ តែមន្រ្តីម្នាក់ៗរបស់ ប្រទេសមួយនេះបែរជា និយាយថា កម្ពុជាជាអ្នកបង្កើតព័ត៌មាន ក្លែងក្លាយទៅវិញ ដែលការណ៍នេះធ្វើឡើង ដើម្បីគ្រាន់តែបិទបាំង នូវអ្វីដែលពួកគេ បានប្រព្រឹត្តអាក្រក់ប៉ុណ្ណោះ។
ឯកឧត្តមអ្នកនាំពាក្យបានថ្លែងបញ្ជាក់ថា៖ «ការនិយាយភូតកុហក ទាំងនេះមិនសមទំនងទា ល់តែសោះពោលគឺ ការភូតកុហក និងមួលបង្កាច់ ចំពោះរឿងដែលគ្រប់ គ្នាបានដឹងអស់ទៅហើយ ។ ដូចនេះវាប្រហែលអាចធ្វើឱ្យ ប្រជាជនថៃមួយចំនួនតូចជឿ តែប្រជាពលរដ្ឋខ្មែរ សាធារណៈមតិអន្តរជាតិជាទូទៅ មិនជឿទាល់តែសោះ។ ពេលនេះអ្វីៗទាំងអស់ បានបើកចំហរនៅចំពោះមុខ ក្រសែភ្នែកមហាជន និងសហគមន៍អន្តរជាតិ យ៉ាងទូលំទូលាយទៅហើយ។»
ជាមួយគ្នានេះ ឯកឧត្ដមអ្នកនាំពាក្យ រាជរដ្ឋាភិបាលកម្ពុជា ក៏សូមបញ្ជាក់ជូនភាគីថៃវិញថា ពេលនេះគឹជាពេលវេលា ដែលភាគីទាំងពីរត្រូវបោះ ជំហ៊ានបង្ហាញការប្តេជ្ញាចិត្ត ដ៏ស្មោះត្រង់ និងមានសុឆន្ទៈក្នុង ការអនុវត្តកិច្ចព្រមព្រៀងបទឈប់ បាញ់ឱ្យមានប្រសិទ្ធភាព និងរក្សាសុខសន្តិភាព ភាពសុខសាន្តរវាង ប្រជាពលរដ្ឋប្រទេសទាំងពីរគឺកម្ពុជា-ថៃ៕
