(ភ្នំពេញ)៖ យោងតាមសំណេរ របស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា នាយប់ថ្ងៃទី៣ ខែសីហា ឆ្នាំ២០២៥ បានបង្ហោះសារនៅ មុននេះបន្តិចថា លទ្ធភាពជាច្រើនដែល កងទ័ពថៃអាចប្រើកម្លាំង យោធាវាយមកលើកម្ពុជា នៅវេលាយប់នេះ។ ខាងក្រោមនេះជាខ្លឹមសារ ទាំងស្រុងរបស់សម្តេចតេជោ៖
យោងតាមសេចក្តីប្រកាស របស់អ្នកនាំពាក្យក្រសួង ការពារជាតិមុននេះបន្តិច បានបង្ហាញថា មានលទ្ធភាពជា ច្រើនដែលកងទ័ពថៃ អាចប្រើកម្លាំងយោធា វាយមកលើកម្ពុជានៅ វេលាយប់នេះ។
ដោយសភាពការណ៍បែបនេះ ខ្ញុំមិនអាចដឹកនាំប្រជុំព្រឹទ្ធសភា នៅព្រឹកថ្ងៃទី៤ខែសីហា ស្អែកនេះបានទេ បើទោះមានការប្រយុទ្ធ ឬគ្មានការប្រយុទ្ធគ្នាក៏ដោយ ព្រោះខ្ញុំត្រូវប្រចាំការ រួមបញ្ជាកងទ័ព២៤ម៉ោង លើ២៤ម៉ោងបន្តទៀត។
ដូចនេះការប្រជុំព្រឹទ្ធសភា ត្រូវប្រព្រឹត្តទៅក្រោម អធិបតីភាពឯកឧត្តមអ៊ុច បូរិទ្ធ អនុប្រធានទី១នៃព្រឹទ្ធសភា។
ម្យ៉ាងទៀតខ្ញុំសូមការយោគយល់ ជាមុនពីបងប្អូនដែល ជូនសារជូនពរថ្ងៃកំណើតខ្ញុំ (៥សីហា២០២៥) ដែលខ្ញុំមិនអាចបើកមើល ឬបើកមើលហើយតែមិន បានឆ្លើយតបព្រោះជាប់ រវល់រឿងសង្រ្គាមនិងសន្តិភាព ដែលជារឿង ស្លាប់រស់របស់ជាតិ៕
