(ភ្នំពេញ)៖ ជាមួយរូបថតជាភស្តុតាង រាប់សិបសន្លឹក នៅរសៀលថ្ងៃទី៣ ខែសីហា ឆ្នាំ២០២៥នេះ ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកអគ្គនាយក ស៊ីម៉ាក់បានគូសបញ្ជាក់ថា “ក្នុងរយៈពេលជាង ៣៣ឆ្នាំកន្លងមកនេះ អង្គភាពស៊ីម៉ាក់បាន បោសសម្អាតគ្រាប់មីននិង គ្រាប់យុទ្ធភណ្ឌមិនទាន់ផ្ទុះ ព្រមទាំងគ្រាប់បែក ទម្លាក់ពីយន្តហោះគ្រប់ ប្រភេទមានចំនួនជាង ៣លាន២សែនគ្រាប់។
ដូចនេះអ្នកបច្ចេកទេស នៃអង្គភាពនេះស្គាល់ច្បាស់ ចំពោះគ្រាប់បែកចាស់ឬថ្មីនោះ។ មានមូលដ្ឋានបច្ចេកទេស មួយចំនួនទាក់ទង នឹងគ្រាប់បែកMK-84 ដែលនឹងបង្ហាញច្បាស់ថា កម្ពុជាមានសច្ចៈ យ៉ាងពិតប្រាកដ ។
ការគូសបញ្ជាក់លើ បណ្ដាញសង្គមនៅ រសៀលថ្ងៃនេះ បានបន្ថែមទម្ងន់និង ជាអំណះអំណាងទៅលើ ការរកឃើញថា គ្រាប់បែកដែលកងទ័ពអាកាស ថ្ងៃបានប្រើប្រាស់ក្នុងអំឡុង ប្រយុទ្ធជាមួយកម្ពុជា គឺជាគ្រាប់បែកថ្មី យ៉ាងពិតប្រាកដ។
កាលពីថ្ងៃទី២ ខែសីហា ឯកឧត្តម ហេង រតនា បានបង្ហាញថានៅថ្ងៃសៅរ៍ទី២ ខែសីហា ឆ្នាំ២០២៥នេះ ស្ថិតនៅវត្តតាមាន់សែនជ័យ ភូមិតាហាំ ឃុំគោកមន ស្រុកបន្ទាយអំពិល ខេត្តឧត្តរមានជ័យ កម្លាំងអង្គភាពស៊ីម៉ាក់ បានធ្វើការត្រួតពិនិត្យ សុវត្ថិភាពជូនគណៈកម្មការ អាចារ្យវត្តបានរកឃើញ ភស្តុតាងដែលអាច បញ្ជាក់ច្បាស់ថា ទីតាំងអារាមនេះ ត្រូវបានពួកទ័ពអាកាសថៃ ប្រើប្រាស់យន្តហោះF-16 ទម្លាក់គ្រាប់បែកប្រភេទMK-82។
គ្រាប់បែកMK-82នេះ មានទម្ងន់ប្រមាណ ២៥០គីឡូក្រាម ហើយជាការបំពាក់ បន្ថែមនូវឧបករណ៍នាំផ្លូវ ជំនាន់ថ្មី (The GBU-12 Payway II) តាមរយៈភស្តុតាងនេះ គ្រាប់បែកទម្លាក់មាន ចំនួន២គ្រាប់ដែលមានលេខ ស៊េរី Serial No. 22002788 និងSerial No. 22002794 ផលិតនៅខែមករា ឆ្នាំ២០២៣។
ឯកឧត្តមបានបន្ថែមថា”រង់ចាំមើលការភូតភូរ កុហកបោកប្រាស់ មតិសាធារណៈជាតិ សៀមនិងអន្តរជាតិ របស់ភាគីសៀមថា គ្រាប់បែកទម្លាក់លើ ទីវត្តអារាមនេះ ជាគ្រាប់បែកសំណល់ ពីសង្គ្រាម១៩៧០-១៩៧៣ទៀតឬ យ៉ាងម៉េច? ចំពោះគ្រាប់បែកMK-84 ក៏គ្មានអ្វីចម្លែកដែរ វាអាចបន្សល់ភស្តុតាង ច្បាស់លាស់ពិតជា មិនខានឡើយ”៕
