(ភ្នំពេញ)៖ លោកជំទាវបណ្ឌិត ពេជ ចន្ទមុនី្ន ហ៊ុនម៉ាណែត នាព្រឹកថ្ងៃអាទិត្យ ទី៣ ខែសីហា ឆ្នាំ២០២៥នេះ បានអញ្ជើញដឹកនាំ ក្រុមការងារចូលរួមគោរព វិញ្ញាណក្ខន្ធយុទ្ធជនពលី នាយចំណង់ ម៉ៅ ស៊ា ស្ថិតនៅក្នុងភូមិព្រៃជួរ ឃុំពពេល ស្រុកត្រាំកក់ ខេត្តតាកែវ ជាយោធិនពលីក្នុងកងពល តូចអន្តរាគមន៍លេខ៨ នៃវរៈសេនាតូចលេខ៣៨២។
ជាមួយនឹងកាលៈទេសៈ ដ៏សោកសៅនៃក្រុមគ្រួសារ យុទ្ធជនពលី លោកជំទាវបណ្ឌិត ក៏បានពាំនាំនូវការរំលែក ទុក្ខដ៏ក្រៀមក្រំបំផុត ពីសំណាក់សម្តេចតេជោ ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ព្រមទាំង សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អមជាមួយនឹងសារ រំលែកទុក្ខរបស់ រាជរដ្ឋាភិបាលជូន ដល់ក្រុមគ្រួសារនៃយុទ្ធជនពលី រួមជាមួយនឹងអំណោយ គ្រឿងឧបភោគបរិភោគ និងថវិកាឧបត្ថម្ភរបស់រាជរដ្ឋាភិបាល ដើម្បីដោះស្រាយជីវភាពផងដែរ។
បន្ទាប់ពីគោរពវិញាណក្ខន្ធ រួចលោកជំទាវបណ្ឌិត ក៏បានពិនិត្យមើលស្ថាន ភាពផ្ទះរបស់ភរិយាវីរយុទ្ធជន ពលី ដែលមានសភាពទ្រុឌទ្រោម ហើយក៏សម្រេចនឹងរៀប ចំកសាងផ្ទះថ្មីមួយខ្នងជូន ដើម្បីផ្តល់ជាទីជម្រក សមរម្យ និងជាការដឹងគុណ នៃការលះបង់របស់យោធិន ពលីដើម្បីការពារបូរណភាពទឹកដី។