(ភ្នំពេញ)៖ ក្រសួងការពារជាតិកម្ពុជា បានប្រកាសច្រានចោល ចំពោះសារព័ត៌មាន របស់ថៃដែលបានផ្សាយ បំភ្លៃការពិតថាកម្ពុជា បានប្រើប្រាស់ដ្រូនចូល នៅក្នុងទឹកដីថៃ ដែលការផ្សាយនេះ ជាហេតុធ្វើឱ្យ បង្កើតស្ថានភាពកើនឡើង កម្តៅរវាងប្រទេសទាំងពីរ។ នេះគឺជាការថ្លែង បញ្ជាក់របស់លោកជំទាវ ឧត្តមសេនីយ៍ឯក ម៉ាលីសុជាតា អនុរដ្ឋលេខាធិការ និងជាអ្នកនាំពាក្យក្រសួង ការពារជាតិកម្ពុជាក្នុង សន្និសីទសារព័ត៌មាន នាព្រឹកថ្ងៃទី០៣ ខែសីហា ឆ្នាំ២០២៥។
លោកជំទាវឧត្តមសេនីយ៍ឯក ម៉ាលី សុជាតា បានបញ្ជាក់យ៉ាងដូច្នេះថា៖ «កម្ពុជាសូមច្រានចោល ចំពោះការផ្សព្វផ្សាយ ដោយគ្មានមូលដ្ឋានរបស់ សារព័ត៌មានថៃមួយចំនួន ដែលផ្ទុយពីការពិត ដោយថ្មីៗនេះ ថៃបានផ្សាយព័ត៌មាន មួយចំនួនដោយបាន យករូបភាពវិដេអូក្លែងក្លាយ ធ្វើការអត្ថាធិប្បាយខ្លឹមសាបំភ្លៃ មិនពិត លាបព៌ណ ថាដ្រូននោះជារបស់កម្ពុជា បានហោះចូលក្នុងទឹកដីថៃ ។ ទង្វើទាំងនេះមិនត្រឹមត្រូវតែរក្សាឱ្យមានភាពល្អប្រសើរប៉ុណ្ណោះទេ តែវាកាន់បង្កឱ្យមានការ កើនឡើងកម្តៅដោយ មិនចាំបាច់»។ លោកជំទាវឧត្តមសេនីយ៍ឯក អ្នកនាំពាក្យក្រសួងការពារជាតិ បានលើកឡើងថា កម្ពុជាទទូចឱ្យសារព័ត៌មានថៃទាំងនោះ បញ្ឈប់ជាបន្ទាន់ នូវទង្វើទាំងនោះ។
ជាមួយគ្នានោះដែរ លោកជំទាវ ឧត្តមសេនីយ៍ឯកបានបន្ថែមថា កម្ពុជាក៏អំពាវនាវ ដល់ភាគីថៃ ចៀសវាងការបង្ហោះដ្រូន របស់ខ្លួនចូលដែន អាកាសរបស់កម្ពុជា ហើយកម្ពុជាក៏មានវិធានការ ចំពោះដ្រូនដែលហោះ ចូលក្នុងទឹកដីកម្ពុជានោះដែរ។
ក្នុងឱកាសនោះដែរ លោកជំទាវឧត្តមសេនីយ៍ឯក អ្នកនាំពាក្យក្រសួង ការពារជាតិក៏បានបញ្ជាក់ឱ្យ ដឹងផងដែរថា ចំពោះកងកម្លាំង កម្ពុជាចំនួន១៨នាក់ ដែលកំពុងស្ថិតក្រោម ការគ្រប់គ្រងរបស់យោធាថៃ ភាគីថៃមិនទាន់បញ្ជូន មកឱ្យកម្ពុជាវិញនោះទេ ក្រៅពីកងកម្លាំង២រូប ដែលបានបញ្ជូនមកឱ្យ កាលពីថ្ងៃទី០១ ខែសីហាមកនេះ ដោយមានរបួស និង មានវិបត្តិស្មារតី។ លោកជំទាវឧត្តមសេនីយ៍ឯក បានឱ្យដឹងទៀតថា កម្ពុជាជំរុញឱ្យភាគីថៃធ្វើការ ប្រគល់កងកម្លាំង១៨នាក់ នោះមកកម្ពុជាវិញឱ្យ បានឆាប់រហ័សផងដែរ៕
